សន្តិសុខនុយក្លេអ៊ែរ៖ជំនួបកំពូលបានផ្តោតលើការគំរាមកំហែងរបស់ពួកជីហាតអង្គការរដ្ឋអ៊ីស្លាម
នៅថ្ងៃសុក្រ ទី១ មេសានេះជាថ្ងៃទី២ និងជាថ្ងៃបិទបញ្ចប់ជំនួបកំពូលស្តីពីសន្តិសុខនុយក្លេអ៊ែររៀបចំក្នុងទីក្រុងវ៉ាស៊ីនតោន សហរដ្ឋអាមេរិក។ ក្រៅពីជំនួបជាលក្ខណៈរួម ក៏មានជំនួបជាលក្ខណៈត្រីភាគីរវាងអាមេរិក ជប៉ុន កូរ៉េខាងត្បូង និងជំនួបជាលក្ខណៈទ្វេភាគីរវាងអាមេរិក និងចិន រវាងអាមេរិក និងបារាំង ឬមួយរវាងអាមេរិក និងតួកគីជាដើម។ បន្ទាប់ពីបាននិយាយច្រើនទាក់ទងនឹងនុយក្លេអ៊ែរកូរ៉េខាងជើង ជំនួបកំពូលក៏បានផ្តោតសំខាន់លើការគំរាមកំហែងរបស់ពួកជីហាតអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២១
នៅក្នុងជំនួបត្រីភាគីអាមេរិក ជប៉ុន និងកូរ៉េខាងត្បូង ភាគីទាំង ៣ បានលើកយកទៅនិយាយច្រើនពីបញ្ហានុយក្លរអ៊ែរកូរ៉េខាងជើង។ លោកស្រីប្រធានាធិបតីកូរ៉េខាងត្បូងប៉ាក់ គុនហេបានថ្លែងនៅក្រោយជំនួបជាមួយសមភាគីអាមេរិកលោកប៉ារ៉ាក់ អូបាម៉ា និងលោកនាយករដ្ឋមន្រ្តីជប៉ុនស្ហ៊ីនហ្ស អាបេថា ប្រទេសទាំង ៣ បានព្រមព្រៀងគ្នាក្នុងការពង្រឹងបន្ថែមកិច្ចសហប្រតិបត្តិការរវាងគ្នាដោយធ្វើយ៉ាងណា រារាំងកូរ៉េខាងជើងកុំឲ្យបន្តធ្វើការសាកល្បងនុយក្លេអ៊ែរ និងបាញ់គ្រាប់មីស៊ីលអន្តរទ្វីប។ តែលោកស្រីប៉ាក់ គុនហេមិនបានលំអិតទេថា តើមានវិធានការអ្វីខ្លះដែលជំនួបកំពូលត្រីភាគីបានអនុម័តក្នុងការកាច់បំបាក់ធ្មុងមនុស្សខ្លាំងក្រុងព្យុងយ៉ាងលោកគីម ជុនអ៊ុនកុំឲ្យបង្ករឿងជាថ្មីនោះ។
គួរជម្រាបជូនថា តាំងពីឆ្នាំ ២០០៦ មក កូរ៉េខាងជើងបានធ្វើការសាកល្បងនុយក្លេអ៊ែរចំនួន ៤ដងដែលលើកទី៤ បានធ្វើនៅក្នុងខែមករាដើមឆ្នាំ ២០១៦ នេះ។ និយាយពីការបាញ់សាកល្បងគ្រាប់មីស៊ីលអន្តរទ្វីបវិញ គ្រាន់តែនៅ ៣ខែដើមឆ្នាំ ២០១៦ នេះ មានបាញ់ចំនួន ៤ដង ដែលលើកទី៤ បានបាញ់ក្នុងថ្ងៃសុក្រ ទី១ មេសានេះចំថ្ងៃជំនួបកំពូលស្តីពីសន្តិសុខនុយក្លេអ៊ែរ។ ដូច្នេះឃើញថា កូរ៉េខាងជើងនៅតែបន្តធ្វើអ្វីស្រេចតែនឹងក្បាលចិត្ត ដោយមិនខ្វាយខ្វល់បន្តិចណាឡើយចំពោះវិធានការរបស់សហគមន៍អន្តរជាតិ ក៏ដូចជារបស់ប្រទេសបច្ចិមលោក។
កូរ៉េខាងជើងអាងខ្នងចិន
កូរ៉េខាងជើងបន្តផ្គើនសហគមន៍អន្តរជាតិដោយសារតែអាងខ្នងចិន។ ចូរកុំភ្លេចថា ទង្វើផ្គើនសហគមន៍អន្តរជាតិរបស់របបក្រុងព្យុងយ៉ាងតែងតែទទួលបានការថ្កោលទោស និងទ័ណ្ឌកម្មពីសហគមន៍អន្តរជាតិ ក៏ដូចពីប្រទេសបស្ចិមលោកនីមួយៗ ពិសេសអាមេរិក។ តែគេមិនត្រូវភ្លេចនិយាយទេថា ចិន និងរុស្ស៊ីដែលជាសមាជិកអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិតែងតែប្រើសិទ្ធិវេតូរបស់ខ្លួនដើម្បីប្រឆាំងនឹងសេចក្តីសម្រេចចិត្តណាដែលមានលក្ខណៈធ្ងន់ធ្ងរលើមិត្តកូរ៉េខាងជើងរបស់ខ្លួន។
រហូតមកដល់ពេលនេះ ចិនត្រូវបានគេចាត់ទុកជាតួអង្គឯកតែមួយគត់ដែលនឹងអាចនិយាយបញ្ចុះបញ្ចូលកូរ៉េខាងជើងឲ្យឈប់ធ្វើការសាកល្បងនុយក្លេអ៊ែរ និងបាញ់គ្រាប់មីស៊ីលអន្តរទ្វីប។ តែនៅក្នុងជំនួបដាច់ដោយឡែកជាមួយលោកប្រធានាធិបតីអាមេរិកអូបាម៉ានាឱកាសជំនួបកំពូលស្តីពីសន្តិសុខនុយក្លេអ៊ែរ លោកប្រធានាធិបតីចិនស៊ីជីនពីងហាក់ដូចជាមិនចង់ឲ្យមានវិធានការអ្វីបន្ថែមលើកូរ៉េខាងជើងទេ។
លោកស៊ី ជីនពីងបានយល់ឃើញថា មានតែការជំរុញឲ្យមានកិច្ចចរចាឡើងវិញទេទើបគេអាចដោះស្រាយបញ្ហានុយក្លេអ៊ែរកូរ៉េខាងជើងបាន ពោលមិនមែនទ័ណ្ឌកម្ម។ ទន្ទឹមគ្នានេះ លោកស៊ី ជីនពីងក៏ឆ្លៀតនិយាយបញ្ឆិតបញ្ចៀងទាក់ទងនឹងគម្រោងផែនការរបស់អាមេរិកដែលចង់ដំឡើងប្រព័ន្ធការពារផ្លូវអាកាសក្នុងទឹកដីកូរ៉េខាងត្បូងដោយអះអាងថា គ្មានភាគីណាមួយគួរលូកដៃចូលជ្រៀតជ្រែកកិច្ចការផ្ទៃក្នុងរបស់ភាគីផ្សេងដែលនឹងបង្កឲ្យបាត់បង់តុល្យភាពយុទ្ធសាស្រ្តនៅក្នុងតំបន់ទេ។
អាមេរិក និងបារាំងប្តេជ្ញាបន្តយុទ្ធនាការប្រឆាំងនឹងអង្គការរដ្ឋអ៊ីស្លាម
ដោយឡែក នៅក្នុងជំនួបទ្វេភាគីជាមួយសមភាគីបារាំងហ្រ្វង់ស័រ ហូឡង់ លោកអូបាម៉ាបាននិយាយច្រើនពីការគំរាមកំហែងរបស់ពួកជីហាតអង្គការរដ្ឋអ៊ីស្លាម និងស្ថានការណ៍ក្នុងប្រទេសអ៊ីរ៉ាក់ និងស៊ីរី។ អ្វីដែលលោកអូបាម៉ាសម្តែងក្តីបារម្ភខ្លាំង គឺសមត្ថភាពរបស់អឺរ៉ុបក្នុងការប្រឈមទប់នឹងហានិភ័យកើតចេញពីការវាយប្រហាររបស់ពួកជីហាតនៅតាមទីក្រុងអឺរ៉ុបធំៗ។ លោកអូបាម៉ាខ្លាចពួកជីហាតប្រើនុយក្លេអ៊ែរដើម្បីវាយប្រហារ។
នៅក្នុងន័យនេះ និងដើម្បីជាវិធានការបង្ការទុកមុន លោកអូបាម៉ាបានគូសបញ្ជាក់ពីភាពចាំបាច់ក្នុងការបង្កើនកិច្ចសហប្រតិបត្តិការ និងការផ្តោះប្តូរព័ត៌មានសម្ងាត់ក្នុងកម្រិតអន្តរអាត្លង់ទិក។ គោលដៅ គឺដើម្បីស្វែងដឹងមុននូវគម្រោងវាយប្រហារជាយថាហេតុ និងការកាត់ផ្តាច់ប្រភពចំណូលរបស់ពួកជីហាត។ ក្រៅពីការចាយចែកព័ត៌មានសម្ងាត់ លោកអូបាម៉ាក៏បានសំណូមពរឲ្យមានការតាមដានក្រុមយុទ្ធជនដែលបានចាកចេញពីអ៊ីរ៉ាក់ និងស៊ីរី រួចត្រឡប់ចូលក្នុងប្រទេសអឺរ៉ុប ឬប្រទេសផ្សេងទៀត។
ដោយឡែក នៅក្នុងជំនួបទ្វេភាគីជាមួយសមភាគីបារាំងលោកហ្រ្វង់ស័រ ហូឡង់ដដែល លោកអូបាម៉ាបាននិយាយកោតសរសើរលោកហូឡង់ថា៖
« លោកប្រធានាធិបតីហូឡង់ជាមេដឹកនាំម្នាក់ដើម្បីប្រមូលផ្តុំសហភាពអឺរ៉ុបឲ្យចូលរួមប្រកបដោយប្រសិទ្ធិភាពនៅក្នុងយុទ្ធនាការផ្តោះប្តូរព័ត៌មានអន្តរអាត្លង់ទិក »
ជាការឆ្លើយតបវិញ លោកហូឡង់បានសាទរពីកិច្ចសហប្រតិបត្តិការកម្រិតខ្ពស់រវាងបារាំង និងអាមេរិកក្នុងផ្នែកចែកចាយព័ត៌មានសម្ងាត់ ក៏ដូចជាការតាមដានក្រុមយុទ្ធជនបរទេសដែលបានទៅចូលរួមជាមួយអង្គការរដ្ឋអ៊ីស្លាមនៅអ៊ីរ៉ាក់ និងស៊ីរី។ នៅស៊ីរីត្រូវបានលោកហូឡង់បានបញ្ជាក់ថា បារាំងបានចូលរួមគាំទ្រទាំងផ្លូវយោធា និងផ្លូវនយោបាយ។
« យើងមានសុទិដ្ឋនិយមថា អង្គការរដ្ឋអ៊ីស្លាមបាន និងកំពុងបាត់បង់ដែនដី និងចុះខ្សោយឥទ្ធិពលមួយផ្នែករបស់វា។ ក្នុងន័យនេះ ទីក្រុងរ៉ាកាជាគោលដៅដែលត្រូវវាយដណ្តើមយកពីអង្គការរដ្ឋអ៊ីស្លាមមកវិញ។ ទន្ទឹមគ្នានេះ គេក៏មិនត្រូវភ្លេចនិយាយពីផែនការនយោបាយ ពិសេសទាក់ទងនឹងបទឈប់បាញ់នៅស៊ីរីដែលគ្រប់ភាគីជម្លោះបានគោរពត្រឹមត្រូវមកដល់ថ្ងៃនេះ។ អ្វីដែលយើងចង់បាននៅពេលខាងមុខ គឺយកឱកាសបទឈប់បាញ់ដើម្បីជំរុញកិច្ចចរចា និងឈានទៅបង្កើតរដ្ឋាភិបាលរួបរួមជាតិមួយនៅស៊ីរី »
ក្រៅពីសំណុំរឿងអ៊ីរ៉ាក់ និងស៊ីរី លោកប្រធានាធិបតីអាមេរិក និងសមភាគីបារាំងក៏បានលើកឡើងពីស្ថានការណ៍នៅក្នុងប្រទេសលីប៊ីដែរ។ ត្រង់ចំណុចនេះ វ៉ាស៊ីតោន និងប៉ារីសបានសម្តែងការគាំទ្ររដ្ឋាភិបាលស្របច្បាប់នៅលីប៊ីដោយធ្វើយ៉ាងណា កុំឲ្យលីប៊ីក្លាយជាជង្រុកថ្មីរបស់ពួកជីហាតអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ