ណាសា៖ សំណាកអាចម៍ផ្កាយ Bennuសំបូរទៅដោយកាបូន និងទឹក
នៅក្នុងសន្និសីទកាសែតកាលពីថ្ងៃពុធទី ១១តុលា ទីភ្នាក់ងារអវកាសណាសា បានបង្ហាញលទ្ធផលបឋមនៃការសិក្សាលើសំណាកអាចម៍ផ្កាយ Bennu ដែលយានអវកាស Oriris-Rex បានដឹកមកផែនដីកាលពីថ្ងៃទី ២៣កញ្ញាកន្លងទៅ។ តាមអ្នកវិទ្យាសាស្រ្តរបស់ទីភ្នាក់ងារណាសា សំណាកអាចម៍ផ្កាយBennu មានទឹក និងសំបូរដោយកាបូនដែលជាសារធាតុគីមីចម្បងសម្រាប់ជីវិត។
ចុះផ្សាយនៅថ្ងៃ៖
ស្តាប់ - ០២:៥៧
ដូចការសន្យា ទីភ្នាក់ងារអវកាសអាមេរិក ណាសាបានធ្វើសន្និសីទកាសែត កាលពីថ្ងៃទី ១១តុលា ដើម្បីបង្ហាញលទ្ធផលបឋមនៃការស្រាវជ្រាវលើសំណាកអាចម៍ផ្កាយBennu ដែលយានអវកាសOriris-Rex បានដឹកយកមកផែនដី កាលពី២សប្តាហ៍មុន។
តាមប្រធានទីភ្នាក់ងារណាសា លោក Bill Nelson សំណាក អាចម៍ផ្កាយBennu សំបូរដោយកាបូន និងម៉ូលេគុលទឹក សារធាតុសំខាន់ដែលទីភ្នាក់ងារណាសាទន្ទឹងចង់បាន។ សម្រាប់ប្រធានណាសា កាបូន និងទឹក ជាសារធាតុគីមីចម្បងសម្រាប់ការកកើតភពផែនដី។ ម្យ៉ាងវានឹងជួយឲ្យគេកំណត់បាននូវប្រភពសារធាតុសំខាន់ៗ ដែលជួយឲ្យមានការកកើតជីវិតនៅលើផែនដី។
នៅក្នុងរូបភាពដំបូងរបស់សំណាកអាចម៍ផ្កាយBennuដែលទីភ្នាក់ងារណាសាបង្ហាញ កាលពីថ្ងៃពុធ គេឃើញលំអងធូលី និងគ្រាប់ដុំខ្មៅៗ។ អ្នកវិទ្យាសាស្រ្តរបស់ទីភ្នាក់ងារណាសាស្រមៃចង់បានសំណាកអាចម៍ផ្កាយBennuមកសិក្សា តាំងពីយូរណាស់មកហើយ។ ណាសាបាននិយាយថា ការជ្រើសរើសយកអាចមន៍ផ្កាយBennuមកសិក្សាគឺជាជម្រើសដ៏ល្អ។
លោក Daniel Glavin អ្នកវិទ្យាសាស្រ្តរបស់ទីភ្នាក់ងារណាសា បានបញ្ជាក់ពីសារៈសំខាន់នៃការរកឃើញកាបូននៅក្នុងសំណាកអាចម៍ផ្កាយ Bennu ក្នុងហេតុផលថា កាបូនដើរតួនាទីសំខាន់សម្រាប់ជីវិតនៅលើផែនដី។ គេជឿថា ដោយហោះបុកផែនដី កាលពីប៉ុន្មានលានឆ្នាំមុន អាចម៍ផ្កាយដទៃទៀត ដូចជាអាចម៍ផ្កាយBennu បានពាំនាំយកកាបូនមកផែនដី។
ចំណែកទឹកដែលជាប់នៅក្នុងរ៉ែសំណើម ក្នុងសំណាកអាចម៍ផ្កាយជួយឲ្យគេវាយតម្លៃថា ទឹកអាចមកដល់ផែនដីក៏ដោយសារតែការហោះបុករបស់អាចម៍ផ្កាយដែរ។ សម្រាប់អ្នកវិទ្យាសាស្រ្ត ផែនដីអាចមានជីវិតរស់នៅ មានមហាសមុទ្រ ទឹកទន្លេ ក៏ដោយមកពីរ៉ែដែលមានសំណើមទឹក ធ្លាក់មកគរនៅលើផែនដី កាលពីជាង ៤ពាន់លានឆ្នាំមុន។
តាមទីភ្នាក់ងារណាសា ការវិភាគបឋមបង្ហាញថា សំណាកអាចម៍ផ្កាយBennu សំបូរដោយកាបូន ក្នុងបរិមាណដ៏ច្រើន ដែលគេមិនធ្លាប់យកមកផែនដី។ ផ្តើមបេសកកម្មចេញទៅរកសំណាកលើអាចម៍ផ្កាយBennu តាំងពីឆ្នាំ ២០១៦ យានអវកាសរបស់ណាសាបានចុះចតយកសំណាកនៅឆ្នាំ ២០២០ នៅលើអាចម៍ផ្កាយBennu ដែលស្ថិតនៅចម្ងាយ ៣០០លានគីឡូម៉ែត្រពីផែនដី។
តាមអ្នកវិទ្យាសាស្រ្តរបស់ណាសា ការសិក្សាពីសារធាតុផ្សំរបស់អាចម៍ផ្កាយBennu នឹងអាចជួយឲ្យគេយល់ពីដំណើរហោះគោចររបស់អាចមន៍ Bennuដែលគេវាយតម្លៃថា អាចហោះមកបុកផែនដី នៅចុងសតវត្សរ៍ទី ២២។ ទោះជាប្រូបាប៊ីលីតេនៃការហោះបុកទង្គិចរបស់អាចម៍ផ្កាយមានតិច ប៉ុន្តែ ការសិក្សាលម្អិតពីសារធាតុផ្សំរបស់អាចម៍ផ្កាយBennu នឹងអាចជួយអ្នកវិទ្យាសាស្រ្តឲ្យគណនា ដើម្បីរកផ្លូវ បញ្ជៀសកុំឲ្យអាចម៍ផ្កាយBennu អាចហោះមកបុកផែនដី ដែលអាចជាគ្រោះមហន្តរាយធ្ងន់ធ្ងរសម្រាប់ភពផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ