អាមេរិក៖អ៊ីរ៉ង់បានបញ្ជូនទាហានទៅកាន់តំបន់គ្រីមេដើម្បីបង្ហាត់ទាហានរុស្ស៊ីឲ្យប្រើដ្រូនអ៊ីរ៉ង់
នៅក្នុងប្រទេសអ៊ុយក្រែន កងទ័ពបានទាញសញ្ញាអាសន្នពីការដែលរុស្ស៊ីអាចបើកសមរភូមិប្រយុទ្ធថ្មីនៅប៉ែកខាងជើងពីព្រំដែនប្រទេសបេឡារុស។ ការទាញសញ្ញាអាសន្ននេះបានធ្លាក់មក ខណៈដែលព័ត៌មានស្តីពីជំនួយយោធារបស់អ៊ីរ៉ង់ចំពោះរុស្ស៊ីកំពុងបន្តមានយ៉ាងផុសផុល។ តាមការបញ្ជាក់របស់រដ្ឋបាលអាមេរិក ក្រៅពីបានបញ្ជូនដ្រូនទៅឲ្យរុស្ស៊ី អ៊ីរ៉ងក៏បានបញ្ជូនទាហានទៅកាន់តំបន់គ្រីមេដើម្បីបង្ហាត់បង្រៀនទាហានរុស្ស៊ីឲ្យចេះប្រើដ្រូនរបស់ខ្លួនដែរ។
ចុះផ្សាយនៅថ្ងៃ៖
ស្តាប់ - ០២:១០
ព័ត៌មានស្តីពីវត្តមានទាហានអ៊ីរ៉ង់នៅតំបន់គ្រីមេដែលរុស្ស៊ីបានក្រសោបយកដោយខុសច្បាប់ពីអ៊ុយក្រែនកាលពីឆ្នាំ ២០១៤ ត្រូវបានបញ្ជាក់ដោយអ្នកនំាពាក្យក្រុមប្រឹក្សាសន្តិសុខជាតិរបស់សេតវិមានលោកចន ខឺប៊ី។ « យើងយល់ថា ទាហានអ៊ីរ៉ង់ ពិសេសអ្នកបច្ចេកទេស និងគ្រូបង្វឹកបានស្ថិតនៅក្នុងតំបន់គ្រីមេ និងបានជួយទាហានរុស្ស៊ីឲ្យចេះប្រើដ្រូនដែលផ្តល់ដោយអ៊ីរ៉ង់ » នេះជាការថ្លែងរបស់លោកចន ខឺប៊ី។ តែអ្នកនំាពាក្យក្រុមប្រឹក្សាសន្តិសុខជាតិរបស់សេតវិមានរូបនេះដដែលមិនភ្លេចបញ្ជាក់ថា គឺទាហានរុស្ស៊ីជាអ្នកប្រើដ្រូនអ៊ីរ៉ង់សំដៅលើផ្ទាំងស៊ីវិលអ៊ុយក្រែន ពិសេសជនស៊ីវិលស្លូតត្រង់។
ចំណែកក្រសួងការពារជាតិអាមេរិកក៏បានបញ្ចេញប្រតិកម្មទាក់ទងនឹងរឿងដ្រូនអ៊ីរ៉ង់នេះដែរ។ អ្នកនាំពាក្យក្រសួងការពារជាតិអាមេរិកលោកផាត រីឌ័របានបញ្ជាក់ថា ក្រៅពីតំបន់ដើមបូព៌ា អ៊ីរ៉ង់បាននាំការភិតភ័យឆ្លងចូលដល់ទឹកដីអ៊ុយក្រែនទៀត។ នៅក្នុងន័យនេះ លោកផាត រីឌ័របានបញ្ជាក់ពីការដែលក្រសួងការពារជាតិអាមេរិកបន្តធ្វើការជាមួយអ៊ុយក្រែន ជាមួយក្រុមសម្ព័ន្ធមិត្ត និងជាមួយក្រុមដៃគូដើម្បីនាំជំនួយសន្តិសុខឲ្យអ៊ុយក្រែន។ គួរបញ្ជាក់ថាក្នុងរយៈពេលចុងក្រោយនេះ រុស្ស៊ីបានប្រើដ្រូនអ៊ីរ៉ង់ស្រោចលើផ្ទាំងស៊ីបស៊ីវិលអ៊ុយក្រែន។ ការប្រើដ្រូនអ៊ីរ៉ង់ដោយទាហានរុស្ស៊ីនេះបានជំរុញឲ្យបស្ចិមលោកដាក់ទណ្ឌកម្មប្រឆាំងអ៊ីរ៉ង់ក្នុងបទបញ្ជូនដ្រូនឲ្យរុស្ស៊ី។
ក្នុងថ្ងៃព្រហស្បតិ៍ ទី២០ តុលា ក្រុមប្រទេសសមាជិកសហភាពអឺរ៉ុបបានព្រមព្រៀងគ្នាលើទណ្ឌកម្មប្រឆាំងអ៊ីរ៉ង់ដោយបង្កទ្រព្យសម្បតិ្តលើឥស្សរជនយោធាជាន់ខ្ពស់អ៊ីរ៉ង់ចំនួន ៣នាក់ និងស្ថាប័នមួយ។ បន្ទាប់មក អឺរ៉ុបបានសន្យាដាក់ទណ្ឌកម្មប្រឆាំងអ៊ីរ៉ង់បន្ថែមទៀតនាមពេលខាងមុខ។ តែមកដល់ពេលនេះ អ៊ីរ៉ង់ និងរុស្ស៊ីសុទ្ធតែបានចេញមុខបដិសេធលើការចោទប្រកាន់របស់បស្ចិមលោក។ អ៊ីរ៉ង់ថា ខ្លួនមិនដែលបញ្ជូនដ្រូនទៅឲ្យភាគីណាមួយនៅក្នុងសង្រ្គាមអ៊ុយក្រែនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ