អ៊ីរ៉ង់កំពុងចូលខ្លួនជួយឈឺឆ្អាលនៅក្នុងសង្រ្គាមអ៊ុយក្រែនដោយបានផ្តល់ដ្រូនឲ្យរុស្ស៊ី?
ចុះផ្សាយនៅថ្ងៃ៖
ស្តាប់ - ០៦:២០
នៅក្នុងសង្រ្គាមអ៊ុយក្រែន ទ័ពរុស្ស៊ីបានបង្កើនការវាយប្រហារដោយដ្រូនទៅលើទីតាំងយុទ្ធសាស្រ្ត រួមទាំងអាគាររស់នៅរបស់ប្រជាជននៅសឹងគ្រប់តំបន់។ ក្នុងព្រឹកថ្ងៃចន្ទ ទី១៧ តុលា ការវាយប្រហារដោយដ្រូនទៅលើទីក្រុងគៀវបានបណ្តាលឲ្យស្លាប់មនុស្សយ៉ាងតិច ៨នាក់។ អ្វីជាការកត់សម្គាល់ ដ្រូនដែលទ័ពរុស្ស៊ីបានប្រើមិនមែនជាដ្រូនរបស់រុស្ស៊ីទេ តែជាដ្រូនរបស់ប្រទេសអ៊ីរ៉ង់។ ចំណែកអ៊ុយក្រែនក៏បានប្រើដ្រូនដែរ តែជាដ្រូនរបស់ប្រទេសតួកគី។ ហេតុអ្វីបានជារុស្ស៊ីត្រូវការដ្រូនរបស់អ៊ីរ៉ង់ និងថា តើអ៊ីរ៉ង់មិនមែនកំពុងលូកដៃចូលទៅក្នុងសង្រ្គាមរុស្ស៊ីឈ្លានពានអ៊ុយក្រែនទេ ឬយ៉ាងណា?
ក្នុងរយៈពេលចុងក្រោយនេះ គេបាននិយាយច្រើន និងបានឃើញផ្ទាល់ភ្នែកនូវការប្រើដ្រូនដើម្បីវាយប្រហារគ្នាទៅវិញ ទៅមករវាងទ័ពអ៊ុយក្រែន និងទ័ពរុស្ស៊ី។ ក៏ប៉ុន្តែ ដ្រូនដែលភាគីជម្លោះទាំងពីរបានប្រើមិនមែនជាដ្រូនផលិតដោយខ្លួនឯងទេ ឬនិយាយឲ្យស្រួលយល់ ជាដ្រូនរបស់ប្រទេសផ្សេង។ នៅម្ខាង អ៊ុយក្រែនបានប្រើដ្រូនរបស់ប្រទេសតួកគីឈ្មោះ បាយរ៉ាក់តារ TB2 (Bayraktar TB2) ហើយនៅម្ខាងទៀត រុស្ស៊ីបានប្រើដ្រូនរបស់ប្រទេសអ៊ីរ៉ង់ឈ្មោះ ស្ហាហ៊េដ-១៣៦ (Shahed-136)។ ដ្រូនអ៊ីរ៉ង់ស្ហាហ៊េដ-១៣៦ នេះត្រូវបានគេហៅជាដ្រូនអត្តឃាតដែលមានទំហំធំល្មម និងផលិតឡើងក្នុងតម្លៃទាប។ គេត្រូវបញ្ជូលទិន្នន័យ GPS ទៅក្នុងដ្រូនស្ហាហ៊េដ-១៣៦ នេះជាមុនដើម្បីអាចឲ្យវាធ្លាក់ចំផ្ទាំងស៊ីបដែលគេចង់បាន។
យោងតាមអាមេរិក អ៊ីរ៉ង់បានបញ្ជូនឲ្យទាហានរុស្ស៊ីនូវដ្រូនស្ហាហ៊េដ-១៣៦ ជាច្រើនរយគ្រឿងនារដូវក្តៅកន្លងទៅ។ គួរបញ្ជាក់ថា នេះមិនមែនជាលើកទី១ ទេដែលដ្រូនអ៊ីរ៉ង់ប្រភេទនេះត្រូវបានប្រើនៅបរទេស។ ក្នុងខែកញ្ញា ឆ្នាំ ២០១៩ មានការប្រើដ្រូនអ៊ីរ៉ង់ស្ហាហ៊េដ-១៣៦ វាយប្រហារលើទីតាំងប្រេងរបស់ប្រទេសអារ៉ាប៊ីសាអូឌីត ហើយកាលពីខែមករាកន្លងទៅថ្មីៗ ដ្រូនដូចគ្នានេះត្រូវបានប្រើវាយប្រហារលើទឹកដីអេមីរ៉ាអារ៉ាប់រួម។ ការវាយប្រហារកាលណោះត្រូវបានគេទម្លាក់ការទទួលខុសត្រូវលើក្រុមឧទ្ទាមហ៊ូទីក្នុងប្រទេសយេម៉ែន។ តែអ៊ីរ៉ង់ក៏មានចំណែកនៅក្នុងការវាយប្រហារនោះដែរ។ ឥឡូវនេះ ដ្រូនអ៊ីរ៉ង់ស្ហាហ៊េដ-១៣៦ បានឆ្លងចូលដល់ទឹកដីអ៊ុយក្រែនដែលទាហានរុស្ស៊ីប្រើដើម្បីវាយប្រហារលើផ្ទាំងស៊ីបយុទ្ធសាស្រ្ត និងផ្ទាំងស៊ីបស៊ីវិលអ៊ុយក្រែន។
ក្នុងថ្ងៃទី១០ និងទី១១ តុលា រុស្ស៊ីបានបញ្ជូនដ្រូនអ៊ីរ៉ង់ស្ហាហ៊េដ-១៣៦ ពីក្នុងទឹកដីប្រទេសបេឡារុស ឬពីតំបន់គ្រីមេទៅស្រោចលើទីតាំងស៊ីវិលជាច្រើននៅអ៊ុយក្រែន។ រដ្ឋអំណាចអ៊ុយក្រែនបានបញ្ជាក់ថា ខ្លួនបានស្ទាក់បាញ់កម្ទេចដ្រូនអ៊ីរ៉ង់ស្ហាហ៊េដ-១៣៦ ចំនួន ១៣គ្រឿងក្នុងចំណោម ២៤គ្រឿងដែលរុស្ស៊ីបានបាញ់ក្នុងថ្ងៃទី១០ តុលា និងបាញ់កម្ទេចបានក្នុងចំនួនដូចគ្នានេះនៅថ្ងៃបន្ទាប់ទី១១ តុលា។ តែគេអាចផ្ទៀងផ្ទាត់តួលេខនេះបានទេ។ គួរបញ្ជាក់ថា ការប្រើដ្រូនមានប្រសិទ្ធិភាពនៅពេលណាដែលគូប្រឆាំងគ្មានលទ្ធភាពដើម្បីការពារខ្លួន ឬតប តវិញ។ រហូតមកដល់ពេលនេះ អ៊ុយក្រែនបានព្យាយាមបាញ់កម្ទេចដ្រូនអ៊ីរ៉ង់ស្ហាហ៊េដ-១៣៦ ដោយប្រើប្រព័ន្ធបាញ់យន្តហោះចល័តនៅពេលថ្ងៃ ឬមួយក៏ប្រព័ន្ធដែលមានបំពាក់រ៉ាដាសម្រាប់ប្រើនៅពេលយប់។
តែនៅពេលខាងមុខ ការបំពាក់ប្រព័ន្ធប្រឆាំងដ្រូនជារឿងមួយចាំបាច់សម្រាប់អ៊ុយក្រែនក៏ដូចជាប្រទេសមួយចំនួន ព្រោះចាប់ពីពេលនេះទៅ និងជាងពេលណាៗទាំងអស់ ដ្រូនបានក្លាយជាអាវុធថ្មីនៅលើសមរភូមិសង្រ្គាម។ សម្រាប់រុស្ស៊ីនិយាយដោយឡែក ការប្រើដ្រូនរបស់អ៊ីរ៉ង់ ឬរបស់អ្នកផ្សេងនៅលើសមរភូមិសង្រ្គាមអ៊ុយក្រែនបានធ្វើឲ្យខ្លួនអាចសន្សំសំចៃការប្រើគ្រាប់មីស៊ីលដែលមួយគ្រាប់ៗមានតម្លៃពី ១ ៥០០ ០០០ដុល្លារទៅ ២ ០០០ ០០០ដុល្លារ។ ក៏ប៉ុន្តែ ការប្រើប្រាស់ដ្រូនអ៊ីរ៉ង់ដោយរុស្ស៊ីនៅក្នុងសង្រ្គាមអ៊ុយក្រែនពេលនេះបានបង្ហាញចេញនូវពីរចំណុច ចំណុចទី១ ការលូកដៃកាន់តែជ្រៅរបស់អ៊ីរ៉ង់នៅក្នុងសង្រ្គាមមួយនេះ និងចំណុចទី២ ភាពអន់របស់រុស្ស៊ីដែលក្នុងនាមជាប្រទេសមហាអំណាចយោធាម្នាក់ និងជាប្រទេសផលិតអាវុធមួយក្នុងលោកបែរជាងាករកដ្រូនរបស់អ៊ីរ៉ង់ទៅវិញ។
នៅក្នុងចំណុចទី២ ត្រូវបានក្រុមអ្នកជំនាញមើលឃើញខុសគ្នា។ អ្នកខ្លះបានលើកឡើងពីភាពទន់ខ្សោយនៃរចនាសម្ព័ន្ធឧស្សាហកម្មអាវុធរុស្ស៊ី និងបញ្ហាធនធានមនុស្ស។ ចំណែកអ្នកខ្លះទៀតបានបញ្ជាក់ថា រុស្ស៊ីមិនមានគម្រោងផលិតដ្រូនអត្តឃាតចម្ងាយឆ្ងាយដូចដ្រូនអ៊ីរ៉ង់ស្ហាហ៊េដ-១៣៦ ទេ។ ដ្រូនដែលរុស្ស៊ីបានផលិតច្រើនជាដ្រូនចម្ងាយជិតដែលអាចហោះត្រឹម ៤០គីឡូម៉ែត្រប៉ុណ្ណោះ។ ដោយឡែក រឿងអ៊ីរ៉ង់បានលូកដៃគាំទ្ររុស្ស៊ីនៅក្នុងសង្រ្គាមអ៊ុយក្រែនដោយប្រយោជន៍ ឬដោយផ្ទាល់ហាក់មិនមែនជារឿងភ្ញាក់ផ្អើលទេ។ មិនភ្ញាក់ផ្អើលព្រោះអ៊ីរ៉ង់ និងរុស្ស៊ីធ្លាប់បានសហការគ្នានៅលើសមរភូមិសង្រ្គាមនៅក្នុងប្រទេសផ្សេង។
ជាក់ស្តែងចាប់ពីខែមីនា ឆ្នាំ ២០១១ អ៊ីរ៉ង់ និងរុស្ស៊ីបានរួមដៃគ្នាដើម្បីជួយប្រធានាធិបតីស៊ីរីអាសាដក្នុងការកំចាត់ពួកប្រឆាំងទាំងអស់ដោយមិនរើសមុខនៅស៊ីរី។ គឺនៅលើសមរភូមិសង្រ្គាមស៊ីរីដដែលនេះដែលអ៊ីរ៉ង់បានបញ្ជូនកម្លាំងទ័ពទៅចូលរួមជាមួយកម្លាំងទ័ពគាំទ្រអ៊ីរ៉ង់មកពីប្រទេសលីបង់ និងអ៊ីរ៉ាក់ដើម្បីជួយគាំទ្រទ័ពរបស់ប្រធានាធិបតីស៊ីរីអាសាដ។ នេះដោយមិននិយាយពីដ្រូនស្ហាហ៊េដ-១៣៦ ដែលអ៊ីរ៉ង់បានប្រើនៅស៊ីរី និងបានប្រើដើម្បីវាយប្រហារលើពួកប្រឆាំងគួដឌីស្ថានរហូតដល់ទឹកដីអ៊ីរ៉ាក់ទេ។ ឥឡូវនេះ ដ្រូនអ៊ីរ៉ង់ស្ហាហ៊េដ-១៣៦ ដដែលនេះកំពុងត្រូវបានរុស្ស៊ីប្រើសម្លាប់ប្រជាជនអ៊ុយក្រែនសឹងរាល់ថ្ងៃ។
ពិតណាស់ អ៊ីរ៉ង់មិនបានចូលរួមដោយផ្ទាល់នៅក្នុងសង្រ្គាមអ៊ុយក្រែនដូចសង្រ្គាមស៊ីរីទេ។ តែការដែលអ៊ីរ៉ង់ឲ្យដ្រូន ឬលក់ដ្រូនឲ្យរុស្ស៊ីជាសក្ខីកម្មបញ្ជាក់ថា តិច ឬច្រើន ដោយផ្ទាល់ ឬដោយប្រយោល អ៊ីរ៉ង់មិនអាចនិយាយថាខ្លួនគ្មានចំណែកនៅក្នុងសង្រ្គាមរុស្ស៊ីឈ្លានពានអ៊ុយក្រែនពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ