ក្រោយរុស្ស៊ីប្រើដ្រូនអ៊ីរ៉ង់វាយប្រហារអ៊ុយក្រែន អ៊ីរ៉ង់កំពុងស្ថិតក្នុងផ្ទាំងស៊ីបរបស់បស្ចិមប្រទេស
ចុះផ្សាយនៅថ្ងៃ៖
ស្តាប់ - ០៦:៥០
នៅក្នុងប្រទេសអ៊ុយក្រែន រុស្ស៊ីកំពុងបន្តការវាយប្រហារទៅលើទីតាំងយុទ្ធសាស្រ្ត និងអាគារលំដ្ឋានរបស់ប្រជាជន។ ក្រៅពីការវាយប្រហារដោយដ្រូនរបស់អ៊ីរ៉ង់ ទ័ពរុស្ស៊ីបានវាយប្រហារដោយគ្រាប់មីស៊ីល និងគ្រាប់រ៉ូកែត។ តាមមេបញ្ជាការកងទ័ពអ៊ុយក្រែន ការវាយប្រហាររបស់រុស្ស៊ីក្នុងថ្ងៃចន្ទ ទី១៧ បានបណ្តាលឲ្យមានមនុស្សស្លាប់យ៉ាងតិច ៨នាក់។ ដោយឡែក ការដែលរុស្ស៊ីបានប្រើដ្រូនអ៊ីរ៉ង់កំពុងធ្វើឲ្យអ៊ីរ៉ង់ក្លាយជាផ្ទាំងស៊ីបនៃទណ្ឌកម្មរបស់បស្ចិមប្រទេស រួមទាំងក្រុមហ៊ុន ឬរដ្ឋបរទេសណាដែលសហការជាមួយកម្មវិធីដ្រូនអ៊ីរ៉ង់។ តែអ៊ីរ៉ង់បានបញ្ជាក់ជាថ្មីថា ខ្លួនមិនបានផ្តល់ ឬលក់ដ្រូនទៅឲ្យភាគីណាមួយនៅក្នុងសង្រ្គាមអ៊ុយក្រែនទេ។
ការប្រើដ្រូនរបស់អ៊ីរ៉ង់ពីទ័ពរុស្ស៊ីលើទឹកដីអ៊ុយក្រែនពេលនេះបានបំផុសឲ្យមានប្រតិកម្មយ៉ាងខ្លាំងពីបស្ចិមប្រទេស ពិសេសពីអាមេរិក។ នេះមកពីដ្រូនដែលរុស្ស៊ីបានប្រើជាដ្រូនរបស់អ៊ីរ៉ង់ ព្រោះបើជាដ្រូនផលិតដោយរុស្ស៊ី ឬដោយប្រទេសផ្សេងក្រៅពីអ៊ីរ៉ង់ប្រហែលជាមិនមានប្រតិកម្មព្រោងព្រាតដូចពេលនេះទេ។ អាមេរិកជាប្រទេសដែលកំពុងដំឡើងសំឡេងខ្លាំងជាងគេទាក់ទងនឹងដ្រូនរបស់អ៊ីរ៉ង់ដែលរុស្ស៊ីកំពុងប្រើលើអ៊ុយក្រែន។ « មនុស្សទាំងអស់ដែលធ្វើសកម្មភាពជាមួយអ៊ីរ៉ង់នៅក្នុងកម្មវិធីអភិវឌ្ឍន៍ដ្រូន ឬមីស៊ីលបាលីស្ទិក ឬមួយក៏ជួយនាំអាវុធរបស់អ៊ីរ៉ង់ទៅឲ្យរុស្ស៊ីត្រូវតែមានការប្រុងប្រយ័ត្ន » នេះជាការថ្លែងដោយព្រមានរបស់អ្នកនាំពាក្យក្រសួងការបរទេសអាមេរិកលោក វេឌែន ផាធែល (Vedant Patel)។
តាមអ្នកនាំពាក្យក្រសួងការបរទេសអាមេរិករូបនេះដដែល រដ្ឋបាលក្រុងវ៉ាស៊ីនតោនមិនញញើតនឹងប្រើទណ្ឌកម្ម ឬចាត់វិធានការចាស់ដៃប្រឆាំងនឹងអ្នកទទួលខុសត្រូវសំខាន់ៗ និងបន្ថែមថា ការពង្រឹងសម្ព័ន្ធរវាងរុស្ស៊ី និងអ៊ីរ៉ង់គួរតែត្រូវបានពិភពលោកចាត់ទុកជារឿងគ្រោះថ្នាក់ធ្ងន់ធ្ងរមួយ។ តែទន្ទឹមគ្នានេះ លោកវេឌែន ផាធែលបានអះអាងដោយមើលឃើញថា ការដែលរុស្ស៊ីបានងាករកដ្រូនអ៊ីរ៉ង់ជាសញ្ញាដែលបញ្ជាក់ពីក្តីអស់សង្ឃឹម ពីការទទួលគំនាប និងអាចជាដង្ហើមចុងក្រោយរបស់រុស្ស៊ីនៅអ៊ុយក្រែន ខណៈដែលទ័ពរុស្ស៊ីកំពុងចាញ់ច្រាបទ័ពអ៊ុយក្រែននៅលើសមរភូមិ។
ចុងក្រោយ លោក វេឌែន ផាធែលបានយល់ឃើញថា ការបញ្ជូនដ្រូន ឬការលក់ដ្រូនអ៊ីរ៉ង់ទៅឲ្យរុស្ស៊ីជាការរំលោភបំពានលើសេចក្តីសម្រេចចិត្តលេខ ២២៣១ របស់ក្រុមប្រឹក្សាសន្តិសុខអង្គការសហប្រជាជាតិ។
ហេតុអ្វីជាអាមេរិកលើកពីសេចក្តីសម្រេចចិត្តលេខ ២២៣១ របស់ក្រុមប្រឹក្សាសន្តិសុខ?
ដើម្បីអាចយល់ពីរឿងនេះបាន គេត្រូវបកក្រោយទៅចាប់អារម្មណ៍លើកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលអ៊ីរ៉ង់បានចុះហត្ថលេខាជាមួយ ៥ប្រទេសបូក ១។ ៥ប្រទេសមានអាមេរិក បារាំង អង់គ្លេស ចិន និងរុស្ស៊ីដែលជាសមាជិកអចិន្រ្តៃយ៍នៃក្រុមប្រឹក្សាសន្តិសុខ ហើយបូក ១ គឺប្រទេសអាល្លឺម៉ង់។ ក្រោយពីបានចុះហត្ថលេខា កិច្ចព្រមព្រៀងនុយក្លេអ៊ែរអ៊ីរ៉ង់មួយនេះត្រូវបានអនុម័តជាឯកច្ឆន្ទដោយក្រុមប្រឹក្សាសន្តិសុខតាមរយៈសេចក្តីសម្រេចចិត្តលេខ ២២៣១។ តាមពិត អាមេរិកបានភ្ជាប់រឿងដ្រូនអ៊ីរ៉ង់នេះទៅនឹងនុយក្លេអ៊ែរអ៊ីរ៉ង់។
ក្រុងវ៉ាស៊ីនតោនយល់ថា ដ្រូនអ៊ីរ៉ង់ត្រូវបានផលិតដោយក្រុមហ៊ុនអ៊ីរ៉ង់ឈ្មោះ Aircraft Manufacturing Industries ដែលត្រូវបានអាមេរិកដាក់ក្នុងបញ្ជីខ្មៅដោយសារតែក្រុមហ៊ុននេះបានរួមសហការនៅក្នុងកម្មវិធីនុយក្លេអ៊ែរអ៊ីរ៉ង់។ ដូច្នេះសម្រាប់អាមេរិក កុំថាឡើយអ៊ីរ៉ង់ដែលជាសាមីខ្លួនផ្ទាល់ សូម្បីតែរដ្ឋបរទេសណា ក្រុមហ៊ុនណា ឬបុគ្គលណាម្នាក់ដែលជាអ្នកលក់ ឬជាអ្នកជួយនាំយកដ្រូន ឬមីស៊ីលអ៊ីរ៉ង់ទៅឲ្យរុស្ស៊ី គឺជាការរំលោភលើសេចក្តីសម្រេចចិត្តលេខ ២២៣១ របស់ក្រុមប្រឹក្សាសន្តិសុខ និងដែលពួកគេត្រូវតែទទួលទណ្ឌកម្ម។
អ៊ីរ៉ង់ និងរុស្ស៊ីចេញមុខបដិសេធ
រហូតមកដល់ពេលនេះ រដ្ឋបាលអាមេរិកមិនបានលើកភស្តុតាងអ្វីដើម្បីបញ្ជាក់ពីការប្រើដ្រូនអ៊ីរ៉ង់របស់ទាហានរុស្ស៊ីលើអ៊ុយក្រែនទេ។ តែអាមេរិកបានអះអាងថា អ៊ីរ៉ង់បានបញ្ជូនដ្រូនប្រភេទស្ហាហ៊េដ-១៣៦ ច្រើនគ្រឿងទៅឲ្យរុស្ស៊ីកាលពីរដូវក្តៅថ្មីៗនេះ។ ចំណែកកាសែតអាមេរិក Washington Post បានចុះផ្សាយព័ត៌មានដោយផ្អែកលើប្រភពពីបណ្តារដ្ឋាភិបាលបស្ចិមលោកថា ក្រៅពីដ្រូន អ៊ីរ៉ង់អាចនឹងលក់ឲ្យរុស្ស៊ីនាពេលខាងមុខនូវអាវុធផ្សេងទៀត ដូចយ៉ាងមីស៊ីល Fateh-110 ឬមីស៊ីល Zolfaghar។ តែទោះជាយ៉ាងនេះក្តី អ៊ីរ៉ង់បន្តបដិសេធចំពោះការចោទប្រកាន់ ឬការមានមន្ទិលសង្ស័យលើខ្លួន។
អ្នកនាំពាក្យក្រសួងការបរទេសអ៊ីរ៉ង់លោកណាស៊ែរ កាណានីបានបញ្ជាក់ជាថ្មីថា អ៊ីរ៉ង់មិនបាននាំអាវុធទៅឲ្យភាគីណាមួយនៅក្នុងសង្រ្គាមអ៊ុយក្រែន និងថា រដ្ឋាភិបាលក្រុងតេហេរ៉ង់បានគាំទ្រឲ្យមានដំណោះស្រាយជម្លោះមួយនេះតាមផ្លូវចរចា។ លើសពីនេះកាលពីថ្ងៃទី១៤ តុលា រដ្ឋាភិបាលអ៊ីរ៉ង់ថែមទាំងបានចាត់ទុកការចោទប្រកាន់របស់បស្ចិមលោកលើខ្លួនថា គឺជាការឃោសនារៀបចំដោយរដ្ឋបរទេសមួយចំនួនដើម្បីបម្រើផលប្រយោជន៍នយោបាយរបស់ពួកគេ។ ពីខាងរុស្ស៊ីដែលជាភាគីពាក់ព័ន្ធផ្ទាល់មួយទៀតបានអះអាងវាយបកវិញក្នុងថ្ងៃអង្គារ ទី១៨ តុលាថា ខ្លួនមិនបានដឹងពីព័ត៌មានស្តីពីទាហានរុស្ស៊ីប្រើដ្រូនអ៊ីរ៉ង់ទេ។
ការអះអាងវាយបករបស់រុស្ស៊ីនេះបានធ្វើឡើងដោយអ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវ។ ដោយមិននិយាយពីឈ្មោះអាវុធ លោកប៉េស្កូវបានត្រឹមបញ្ជាក់ថា រុស្ស៊ីប្រើបច្ចេកទេសរុស្ស៊ីជាមួយនឹងឈ្មោះរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ