OMS ព្រមានថា«ឆាប់ពេក»ក្នុងការដកបម្រាមឱ្យប្រជាជនសម្ងំនៅក្នុងផ្ទះ
កូវីដ១៦ បានសម្លាប់មនុស្ស ចំនួនជាង ១០ម៉ឺននាក់ នៅលើពិភពលោក។ ចំណែកនៅសហរដ្ឋអាមេរិក ក្នុងរយៈពេល២៤ម៉ោង ពីថ្ងៃ១០មេសា មានចំនួនអ្នកស្លាប់ជាង ២ ១០០ នាក់ ដែលជាការស្លាប់ ច្រើនជាងគេ នៅធ្លាប់មាន តាំងពីពេលផ្ទុះមេរោគកូវីដ១៩ នៅសហរដ្ឋអាមេរិកមក។ គួរបញ្ជាក់ថា ពេលនេះ នៅសហរដ្ឋអាមេរិក មានអ្នកឆ្លងកូវីដ១៩ ចំនួនជាង កន្លះលាននាក់។ តាមរបាយការណ៍ផ្លូវការ សហរដ្ឋអាមេរិកគឺជាប្រទេសទី១ លើពិភពលោកដែលរងគ្រោះខ្លាំងនិងស្លាប់មនុស្សច្រើនជាងគេ។ បើតាមការប៉ាន់ស្មានរបស់វិមានប្រធានាធិបតី គឺអាចនឹងមានអ្នកស្លាប់ជាបន្ត ហើយទំនងជាស្លាប់មនុស្ស ដល់ចន្លោះពី១សែន ទៅ១សែន៤ម៉ឺននាក់។នៅក្នុងពេលនេះ ការដាក់បម្រាមហាមឃាត់ប្រជាជនឱ្យសម្ងំនៅក្នុងផ្ទះ គឺជាមធ្យោបាយតែមួយគត់ដែល អង្គការសុខភាពពិភពលោក យល់ឃើញថា វាមានប្រសិទ្ធភាពក្នុងការទប់ស្កាត់ការចម្លងរាតត្បាតជំងឺកូវីដ១៩។ ប៉ុន្តែប្រទេសនីមួយៗយល់ឃើញនិងឱ្យតម្លៃខុសប្លែកគ្នា។
ចុះផ្សាយនៅថ្ងៃ៖
ស្តាប់ - ០១:៥២
នៅសហរដ្ឋអាមេរិក ប្រធានាធិបតី ដូណាល់ ត្រាំ បានសម្រេចមិនបិទខ្ទប់ប្រទេសទាំងស្រុង និង មិនដាក់ចេញបម្រាមឱ្យពលរដ្ឋសម្ងំនៅផ្ទះ ជាទូទៅ នោះដែរ។ លោក ដូណាល់ ត្រាំ ដែលឱ្យតម្លៃខ្លាំងលើសេដ្ឋកិច្ច បានព្រលយពាក្យថា នេះជាការសម្រេចចិត្តដ៏ធំបំផុតក្នុងមួយជីវិតរបស់លោក។
ដូចគ្នាដែរ អ៊ីរ៉ង់ ជាសត្រូវសហរដ្ឋអាមេរិក តែបានឱ្យតម្លៃខ្លាំងលើផ្នែកសេដ្ឋកិច្ចដែរ។ អ៊ីរ៉ងបានដាក់បម្រាមហាមឱ្យប្រជាជនសម្ងំនៅក្នុងផ្ទះ កាលពីថ្ងៃទី២៧មីនា ក៏ប៉ុន្តែ ពេលថ្មីៗនេះ ថ្នាក់ដឹកនាំអ៊ីរ៉ង់ បានសម្រេចឱ្យលើកបម្រាមហាមឃាត់នេះ ចេញជាបណ្តើរៗ ជាពិសេសនៅតាមបណ្តាខេត្ត។ ប្រធានាធិបតីអ៊ីរ៉ង់ Hassan Rohani បានប្រកាសថាគួរតែចាប់ផ្តើមសកម្មភាពសេដ្ឋកិច្ច ហើយនិងប្រឹងប្រកបរបររកស៊ីចិញ្ចឹមជីវិតឡើងវិញ។ តែលោកថាត្រូវរក្សាអនាម័យ និងនៅឱ្យឃ្លាតៗពីគ្នា (រក្សាគម្លាតសង្គម)។
ស្រដៀងគ្នានេះ ប្រទេសមួយចំនួននៅអឺរ៉ុប ក៏កំពុងពិចារណានិងចង់លើកបម្រាមហាមឃាត់ប្រជាជនឱ្យសម្ងំនៅផ្ទះ ដូចករណី ប្រទេសចិន ដែលបានលើកបម្រាមនៅក្រុងវូហាននិងខេត្តហូពេ។ ក៏ប៉ុន្តែ អង្គការសុខភាពពិភពលោក បានព្រមានយ៉ាងខ្លាំងថា វាលឿនឆាប់ពេកហើយក្នុងការដកបម្រាមនេះ ហើយការលើកបម្រាមហាមឃាត់ដូច្នេះ គឺនាំឱ្យកើតគ្រោះថ្នាក់រាតត្បាលមេរោគសម្លាប់មនុស្សបន្តទៀត។
ពិធីបុណ្យ Pâques បុណ្យសាសនាគ្រិស្ត ជាសំណុំរឿងក្តៅ សម្រាប់នៅចុងសប្តាហ៍នេះ។ នៅសហរដ្ឋអាមេរិក អភិបាលរដ្ឋខ្លះ បានអំពាវនាវ ឱ្យនាំគ្នាសូត្រធម៌បួងសួងសំពះព្រះសុំឱ្យកម្ចាត់មេរោគឧត្បាត នៅក្នុងពិធីបុណ្យ Pâques ។ ការអំពាវនាវនេះ ធ្វើឱ្យគេបារម្ភពីការប្រមូលផ្តុំមនុស្ស នាំគ្នាសូត្រធម៌ ខណៈពេលដែលរដ្ឋមួយចំនួន គ្មានបម្រាមឱ្យសម្ងំនៅផ្ទះទេ។ ផ្ទុយពីនេះ ប្រទេសនៅអឺរ៉ុប រដ្ឋអំណាច បានបញ្ជាឱ្យធ្វើពិធីបុណ្យសាសនា នៅតែតាមផ្ទះប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ