ការសិក្សាថ្មី៖ មេរោគកូវីដ១៩ អាចស្ថិតនៅក្នុងខ្យល់ ចម្ងាយ៤ម៉ែត្រ
ការសិក្សាថ្មីរបស់អ្នកជំនាញចិន បញ្ជាក់ថា មេរោគកូវីដ១៩ អាចស្ថិតនៅក្នុងខ្យល់ ចម្ងាយរហូតដល់ទៅ៤ម៉ែត្រ នៃបរិវេណរបស់អ្នកជំងឺ។ ការបញ្ជាក់ថ្មីនេះ បានត្រូវផ្សព្វផ្សាយ ពីថ្ងៃសុក្រទី១០មេសា ដោយមជ្ឈមណ្ឌលបង្ការនិងត្រួតពិនិត្យជំងឺឆ្លង (CDC) របស់សហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:២៤
ការសិក្សានេះផ្អែកលើការធ្វើតេស្តចំពោះឧបករណ៍ប្រើប្រាស់និងខ្យល់ នៅក្នុងបន្ទប់សង្គ្រោះបន្ទាន់មួយ ដែលមានអ្នកជំងឺចំនួន១៥នាក់ ហើយនិងនៅក្នុងផ្នែកសង្គ្រោះព្យាបាលទូទៅ ដែលមានអ្នកជំងឺឈឺធ្ងន់ តិចជាង២៤នាក់ ក្នុងមន្ទីរពេទ្យ នៅស្រុកចិន។
អ្នកជំនាញចិនបានធ្វើតេស្តពិសោធនៅលើកម្រាលឥដ្ឋ ធុងសំរាម គ្រែអ្នកជំងឺ ម៉ាស់របស់អ្នកឈឺ គ្រឿងប្រដាប់ប្រដារការពាររបស់បុគ្គលិកសុខាភិបាល ឧបករណ៍និងបំពង់ដកដង្ហើម ឧបករណ៍សម្រាប់ប្រើកុំព្យូទ័រ និងខ្យល់នៅក្នុងបរិវេណបន្ទប់របស់ក្រុមអ្នកជំងឺទាំងនោះ។
ការតាមដាននេះ ធ្វើឡើងក្នុងអំឡុងចន្លោះពេល ពីថ្ងៃទី១៩កុម្ភៈដល់ថ្ងៃទី២មីនា ហើយលទ្ធផល បានប្រកាសផ្សាយនៅថ្ងៃ១០មេសា ថា មេរោគកូវីដ១៩ គឺពិតជាមានវត្តមាន នៅក្នុងខ្យល់ ក្នុងបន្ទប់អ្នកជំងឺ ហើយនិងនៅក្នុងបរិវេណផ្នែកសង្គ្រោះព្យាបាលទូទៅដែរ និងដែលមានរយៈចម្ងាយ៤ម៉ែត្រ។
អ្នកសរសេររបាយការណ៍សិក្សា មានក្តីបារម្ភចំពោះបុគ្គលិកសុខាភិបាលនិងគ្រូពេទ្យដែលជួយព្យាបាលអ្នកជំងឺកូវីដ១៩នេះ ដោយបានថ្លែងក្តីបារម្ភថា ពួកគេអាចប្រឈមមុខនឹងការឆ្លងនិងចម្លងមេរោគកម្រិតខ្ពស់។ អ្នកជំនាញបានឱ្យអនុសាសន៍ថា ក្រុមគ្រូពេទ្យ នៅពេលចេញពីបន្ទប់ព្យាបាលអ្នកជំងឺមកវិញ គឺត្រូវតែបាញ់ថ្នាំសម្លាប់មេរោគ បាញ់សម្អាតមេរោគ រួមទាំង បាតស្បែកជើងផង ព្រោះនៅលើកម្រាលឥដ្ឋនៃបន្ទប់សង្គ្រោះអ្នកជំងឺ ក៏ទំនងមានវត្តមានរបស់មេរោគដែរ។
នៅក្នុងការសិក្សាថ្មីនេះ គ្រាន់តែបញ្ជាក់ត្រឹមថាមានវត្តមានមេរោគកូវីដ១៩ នៅចម្ងាយ៤ម៉ែត្រពិតមែន ក៏ប៉ុន្តែគេនៅមិនអាចកំណត់បាន ថាតើមេរោគនៅក្នុងចម្ងាយ៤ម៉ែត្រនេះ មានបរិមាណប៉ុណ្ណាទេ ហើយគេក៏មិនអាចកំណត់បានដែរ តើថាវាអាចមានបរិមាណគ្រប់គ្រាន់ ដើម្បីចម្លងទៅអ្នកផ្សេងក្នុងរយៈចម្ងាយដល់ទៅ៤ម៉ែត្រឬយ៉ាងណានោះទេ។ ចំនួនបរិមាណនៃមេរោគនិងលទ្ធភាពចម្លងក្នុងរយៈ៤ម៉ែត្រថាអាចចម្លងបានឬមិនបាននេះ គឺអ្នកជំនាញតែកំពុងសិក្សាបន្តទៀតនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ