អាមេរិកត្រូវឯកោនៅក្រុមប្រឹក្សាសន្តិសុខ ដោយសារតែវេតូប្រឆាំងសេចក្តីសម្រេចទាមទារបទឈប់បាញ់នៅហ្កាហ្សា
ដោយគ្មានការភ្ញាក់ផ្អើល អាមេរិកបោះឆ្នោតវេតូប្រឆាំងសេចក្តីសម្រេចដែលទាមទារឲ្យមានបទឈប់បាញ់មនុស្សធម៌នៅហ្កាហ្សា។ នៅក្នុងការបោះឆ្នោតនៅក្រុមប្រឹក្សាសន្តិសុខរបស់អង្គការសហប្រជាជាតិកាលពីថ្ងៃសុក្រ ប្រទេសចំនួន១៣របស់ក្រុមប្រឹក្សាបានបោះឆ្នោតគាំទ្រអត្ថបទព្រាងសេចក្តីសម្រេចដែលស្នើឡើងដោយអេមីរ៉ាតអារ៉ាប់រួម។ មានតែអ្នកតំណាងអាមេរិកម្នាក់ឯងតែប៉ុណ្ណោះដែលលើកដៃវេតូប្រឆាំង ចំណែកអង់គ្លេសដែលជាសមាជិកអចិន្ត្រៃយ៍មួយទៀតបានបោះឆ្នោតអនុបវាទ។ វេតូរបស់អាមេរិកដែលជាសមាជិកអចិន្ត្រៃយ៍បានធ្វើឲ្យក្រុមប្រឹក្សាសន្តិសុខបរាជ័យមិនអាចចេញសេចក្តីសម្រេចទាមទារឲ្យមានបទឈប់បាញ់មនុស្សធម៌នៅហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៨
ក្រុមប្រឹក្សាសន្តិសុខរបស់អង្គការសហប្រជាជាតិបរាជ័យ មិនអាចចេញសេចក្តីសម្រេចទាមទារឲ្យមានបទឈប់បាញ់មនុស្សធម៌នៅហ្កាហ្សា។ អាមេរិកដែលជាសម្ព័ន្ធមិត្តរបស់អ៊ីស្រាអែល និងជាសមាជិកអចិន្រ្តៃយ៍បានលើកដៃវេតូ ក្នុងខណៈពេលដែលប្រទេសចំនួន១៣របស់ក្រុមប្រឹក្សាសន្តិសុខបោះឆ្នោតគាំទ្រ និងអង់គ្លេសសមាជិកអចិន្ត្រៃយ៍មួយទៀតប្រកាន់ជំហរអនុបវាទ។
នៅក្រោយការបោះឆ្នោតមិនបានសម្រេច ប្រទេសសមាជិកដទៃទៀត មិនថា បារាំង ចិន រុស្ស៊ី ប្រេស៊ីល និងអេមីរ៉ាតអារ៉ាប់រួមដែលជាអ្នកស្នើសេចក្តីព្រាងទាមទារឲ្យមានបទឈប់បាញ់នៅហ្កាហ្សា បានសំដែងការសោកស្តាយ និងខកចិត្តគ្រប់គ្នា ព្រោះថា ក្រុមប្រឹក្សាសន្តិសុខដែលជាស្ថាប័នកំពូលរបស់អង្គការសហប្រជាជាតិបរាជ័យសាជាថ្មីនៅចំពោះមុខទុក្ខវេទនា វិបត្តិមនុស្សដ៏ធ្ងន់ធ្ងររបស់ប្រជាជនប៉ាឡេស្ទីន បង្កឡើងដោយសារសង្រ្គាមអ៊ីស្រាអែលនៅហ្កាហ្សា។
សម្រាប់អ្នកតំណាងប៉ាឡេស្ទីនដែលចូលរួមជាអ្នកសង្កេតការណ៍នៅក្រុមប្រឹក្សាសន្តិសុខ វាហួសពីការសោកស្តាយដែលក្រុមប្រឹក្សាសន្តិសុខបរាជ័យមិនទទួលខុសត្រូវដោះស្រាយវិបត្តិដ៏ធ្ងន់ធ្ងរដែលប្រជាជនប៉ាឡេស្ទីនជាអ្នករងគ្រោះ។ អ្នកតំណាងប៉ាឡេស្ទីនបានចោទអ៊ីស្រាអែលថាកំពុងធ្វើសង្រ្គាមតាមរយៈការសម្លាប់រង្គាល។ សម្រាប់លោក សង្រ្គាមនៅហ្កាហ្សាដែលបានសម្លាប់កុមារ ធ្វើឲ្យមានកុមារកំព្រា ពិការមិនមែនធ្វើឡើងដោយការភ័ន្តច្រលំ ប៉ុន្តែ ជាការគិតទុកដ៏ល្អិតល្អន់ ព្រោះថា ឃាតករមិនបានខ្វល់ពីអាយុជីវិតរបស់ប្រជាជនប៉ាឡេស្ទីនឡើយ។
សេចក្តីព្រាងសេចក្តីសម្រេចដែលក្រុមប្រឹក្សាសន្តិសុខត្រូវបោះឆ្នោតនៅថ្ងៃសុក្រ គាំទ្រដោយប្រទេសជិត១០០ និងមានអត្ថន័យទាមទារបទឈប់បាញ់មនុស្សធម៌បន្ទាន់ និងការដោះលែងចំណាប់ខ្មាំង។ ប៉ុន្តែ អាមេរិកតាមរយៈអ្នកតំណាងរបស់ខ្លួននៅក្រុមប្រឹក្សាសន្តិសុខពន្យល់ពីហេតុផលដែលខ្លួនត្រូវលើកដៃវេតូថា សេចក្តីសម្រេចមិនបានសរសេរថ្កោលទោសការវាយប្រហារភេរវកម្មរបស់ក្រុមហាម៉ាសនៅទឹកដីអ៊ីស្រាអែល។ ម្យ៉ាងសេចក្តីសម្រេចដែលទាមទារឲ្យមានបទឈប់បាញ់នៅហ្កាហ្សានឹងអនុញ្ញាតឲ្យពួកហាម៉ាសនៅតែមានកម្លាំងមកធ្វើការវាយប្រហារអ៊ីស្រាអែលសាជាថ្មី ដូចកាលពីដើមខែតុលា។
ទោះក្រុមប្រឹក្សាសន្តិសុខបរាជ័យមិនអាចចេញសេចក្តីសម្រេច ប៉ុន្តែ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរស្ក៍ នៅតែប្តេជ្ញាប្រឹងប្រែងជំរុញឲ្យមានបទឈប់បាញ់មនុស្សធម៌នៅហ្កាហ្សា។ នេះបើតាមអ្នកនាំពាក្យរបស់លោកនៅក្រោយការបោះឆ្នោតកាលពីថ្ងៃសុក្រ។
តាមអ្នកវិភាគ អគ្គលេខាអង្គការសហប្រជាជាតិទំនងដឹងថា អាមេរិកច្បាស់ជាចេញមុខការពារសម្ព័ន្ធមិត្តអ៊ីស្រាអែលដែលបដិសេធដាច់ខាតបទឈប់បាញ់នៅហ្កាហ្សា។ សម្រាប់អ៊ីស្រាអែល វាឆាប់ពេកហើយដែលត្រូវអនុវត្តឈប់បាញ់ ព្រោះអ៊ីស្រាអែលនៅមិនទាន់សម្រេចគោលដៅដែលត្រូវកម្ទេច បំផ្លាញក្រុមហាម៉ាសឲ្យរលាយសូន្យពីហ្កាហ្សា។
ក្នុងកាលៈទេសៈដែលរូបភាពសង្រ្គាមបង្ហាញថា អ៊ីស្រាអែលដែលជាសម្ព័ន្ធមិត្តរបស់អាមេរិកធ្វើ ផ្ទុយស្រឡះពីការនិយាយ ព្រោះថាប្រជាជនប៉ាឡេស្ទីនកំពុងត្រូវអ៊ីស្រាអែលរុញផ្ទប់អស់កន្លែងជ្រកសុវត្ថិភាព នៅពេលអ៊ីស្រាអែលពង្រីកការវាយប្រហារទៅលើក្រុមហាម៉ាសដល់ដែនដីភាគខាងត្បូងហ្កាហ្សា អគ្គលេខាធិការអង្គការសហប្រជាជាតិ ជំរុញឲ្យក្រុមប្រឹក្សាសន្តិសុខបោះឆ្នោតនៅពេលនេះក៏ដើម្បី ចង់ឲ្យអាមេរិកភ្ញាក់ខ្លួនថា អាមេរិកកាន់តែឯកោ ដោយសារជួយគាំទ្រអ៊ីស្រាអែលនៅក្នុងសង្រ្គាមហ្កាហ្សា។ បើសិនអាមេរិកមិនចង់អាប់កិត្តិយស ត្រូវគេរិះគន់គ្រប់ទិសនៅលើឆាកអន្តរជាតិ អាមេរិករបស់រដ្ឋបាលលោកចូបៃដិនត្រូវបញ្ចុះបញ្ចូលអ៊ីស្រាអែលឲ្យរិះរកវិធីបិទបញ្ចប់សង្រ្គាមឲ្យបានឆាប់។
អ៊ីរ៉ង់ដែលជាអ្នកគាំទ្រក្រុមហាម៉ាសប៉ាឡេស្ទីនបានព្រមានពីការផ្ទុះសង្រ្គាមក្នុងតំបន់ដើមបូព៌ា បើសិនអាមេរិកនៅតែបន្តគាំទ្រអ៊ីស្រាអែលធ្វើសង្រ្គាមនៅហ្កាហ្សា។
គិតចាប់តាំងពីមានជម្លោះអ៊ីស្រាអែលនិងហាម៉ាស នេះជាលើកទី៥ដែលក្រុមប្រឹក្សាសន្តិសុខបរាជ័យមិនអាចចេញសេចក្តីសម្រេចក្នុងសំណុំរឿងអ៊ីស្រាអែលប៉ាឡេស្ទីន។ ចាប់តាំងពីអ៊ីស្រាអែលផ្តើមវាយប្រហារទៅលើក្រុមហាម៉ាសនៅហ្កាហ្សានៅ២ខែមកនេះ ក្រុមប្រឹក្សាសន្តិសុខជោគជ័យតែម្តងគត់ចេញសេចក្តីសម្រេចទាមទារឲ្យមានការផ្អាកបាញ់ និងបើកច្រកមនុស្សធម៌ ប៉ុន្តែ មិនមែនបទឈប់បាញ់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ