ពិភពលោកស្លុតរន្ធត់នៅចំពោះមុខការវាយប្រហារទៅលើមន្ទីរពេទ្យដ៏ធំជាងគេនៅហ្កាហ្សា
នៅក្នុងទីក្រុងហ្កាហ្សា ការប្រយុទ្ធគ្នាដ៏សន្ធឹករវាងកងទ័ពអ៊ីស្រាអែល និងក្រុមប្រដាប់អាវុធហាម៉ាសកំពុងកើតមាននៅជុំវិញមន្ទីរពេទ្យ Al-Shifa ដែលជាមន្ទីរពេទ្យធំសំខាន់មួយក្នុងតំបន់ហ្កាហ្សា។ បើតាមក្រុមហាម៉ាស ការវាយប្រហាររបស់កងទ័ពអ៊ីស្រាអែលទៅលើអគារមន្ទីរពេទ្យ Al-Shifa កាលពីថ្ងៃសុក្របានសម្លាប់មនុស្ស១៣នាក់។ នៅក្រុមប្រឹក្សាសន្តិសុខអង្គការសហប្រជាជាតិ ប្រធានអង្គការសុខភាពពិភពលោកទាញសញ្ញាអាសន្នពីគ្រោះមហន្តរាយសម្លាប់ជីវិតមនុស្សដ៏ធ្ងន់ធ្ងរ ដោយសារការវាយប្រហារទៅលើទីតាំងមន្ទីរពេទ្យក្នុងទឹកដីហ្កាហ្សា។
ចុះផ្សាយនៅថ្ងៃ៖
ស្តាប់ - ០៣:១៨
ចាប់តាំងពីថ្ងៃសុក្រ មន្ទីរពេទ្យ Al-Shifa បានធ្លាក់ទៅក្នុងសមរភូមិប្រយុទ្ធបង្ហូរឈាមរវាងកងទ័ពអ៊ីស្រាអែល និងក្រុមហាម៉ាសប៉ាឡេស្ទីន។ បើតាមអ្នកកាសែតរបស់ទីភ្នាក់ងារព័ត៌មានបារាំង AFP នៅព្រឹកថ្ងៃសៅរ៍ កងទ័ពថ្មើរជើងអ៊ីស្រាអែលនិងពួកហាម៉ាសនៅបន្តប្រយុទ្ធគ្នាដ៏ហិង្សានៅជុំវិញមន្ទីរពេទ្យ Al-Shifa ដែលកំពុងចាក់ច្រាលដោយចំនួនអ្នកជំងឺ អ្នករបួស និងអ្នករត់រកកន្លែងជ្រកសុវត្ថិភាព។
នៅក្នុងសារលើបណ្តាញសង្គម អង្គការគ្រូពេទ្យគ្មានព្រំដែនលើកឡើងពីមហន្តរាយដ៏ធ្ងន់ធ្ងរនៅខាងក្នុងអគារមន្ទីរពេទ្យ ខណៈពេលដែលការវាយប្រហារទៅលើមន្ទីរពេទ្យនៅតែបន្តសន្ធឹកខ្លាំង។ តាមក្រសួងសុខាភិបាលហាម៉ាស ការវាយប្រហារទៅលើមន្ទីរពេទ្យបានសម្លាប់មនុស្ស១៣នាក់។ កងទ័ពអ៊ីស្រាអែលវិញអះអាងថា គេបានបាញ់សម្លាប់ពួកហាម៉ាស ១៥០នាក់ នៅក្នុងការប្រយុទ្ធគ្នានៅម្តុំមន្ទីរពេទ្យ Al-Shifa។ បើតាមអ៊ីស្រាអែល កន្លែងបាញ់ចេញរបស់ពួកហាម៉ាសភាគច្រើនមានប្រភពចេញមកពីអគារមន្ទីរពេទ្យ។
ករណីវាយប្រហារទៅលើមន្ទីរពេទ្យ Al-Shifaនៅក្នុងសង្រ្គាមហ្កាហ្សាត្រូវបានគេលើកយកទៅជជែកនៅក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រម្សិលមិញ។
ថ្លែងនៅក្នុងកិច្ចប្រជុំរបស់ក្រុមប្រឹក្សាសន្តិសុខ ប្រធានអង្គការសុខភាពពិភពលោក លោកតេដ្រូស បានអំពាវនាវជាថ្មីម្តងទៀតឲ្យមានបទឈប់បាញ់បន្ទាន់ ព្រោះថាសង្រ្គាមវាយប្រហាររបស់អ៊ីស្រាអែល នៅ៥សប្តាហ៍មកនេះ បានបំផ្លាញប្រព័ន្ធសុខាភិបាលហ្កាហ្សាឲ្យបាក់រលំគ្មានថ្ងៃងើបរួច។
យោងតាមប្រធានអង្គការសុខភាពពិភពលោក ដោយសារការវាយប្រហារជាង២៥០លើកទៅលើវិស័យសុខភាព ដែលមានតាំងពីមន្ទីរពេទ្យ គ្លិនិក រថយន្តដឹកអ្នករបួស និងអ្នកជំងឺ មន្ទីរពេទ្យ២០កន្លែងក្នុងចំណោមមន្ទីរពេទ្យសរុប៣៦កន្លែង ត្រូវខូចខាត លែងដំណើរការទាំងស្រុង។ សម្រាប់ប្រធានអង្គការសុខភាពពិភពលោក នៅភាគីអ៊ីស្រាអែល ការវាយប្រហារគ្រាប់រ៉ូក្កែតរបស់ពួកហាម៉ាសដែលនៅបន្តបាញ់ចេញពីហ្កាហ្សាក៏បានបំផ្លាញវិស័យសុខាភិបាលរបស់អ៊ីស្រាអែលចំនួន២៥។
នៅក្រោយការវាយប្រហារទៅលើមន្ទីរពេទ្យ អ៊ីស្រាអែលរងការដាក់សម្ពាធកាន់តែខ្លាំងពីសហគមន៍អន្តរជាតិ។ នៅក្នុងបទសម្ភាសន៍ជាមួយទូរទស្សន៍អង់គ្លេសកាលពីយប់ថ្ងៃសុក្រម្សិលមិញ ប្រធានាធិបតីបារាំងលោកម៉ាក្រុងជាមេដឹកនាំប្រទេសលោកខាងលិចដំបូងគេដែលទាមទារឲ្យអ៊ីស្រាអែលឈប់ទម្លាក់គ្រាប់បែកសម្លាប់ប្រជាជនស៊ីវិលប៉ាឡេស្ទីន។ សម្រាប់ប្រមុខដឹកនាំបារាំង អ៊ីស្រាអែលមានសិទ្ធិការពារខ្លួននៅក្រោយការវាយប្រហាររបស់ក្រុមហាម៉ាស ប៉ុន្តែ ការវាយប្រហារទម្លាក់គ្រាប់បែកអ៊ីស្រាអែលដែលសម្លាប់កុមារ មនុស្សចាស់ មនុស្សស្រី មិនមែនជាសិទ្ធិស្របច្បាប់របស់អ៊ីស្រាអែលនោះទេ។
ឆ្លើយតបទៅនឹងការលើកឡើងរបស់ប្រធានាធិបតីបារាំង លោកនាយករដ្ឋមន្រ្តីអ៊ីស្រាអែល បេនចាមីន នេតាន់យ៉ាហ៊ូចេញមុខការពារកងទ័ពអ៊ីស្រាអែល និងថា គឺក្រុមហាម៉ាសទេដែលគេត្រូវបន្ទោស ដោយសារក្រុមនេះយកមន្ទីរពេទ្យ និងប្រជាជនស៊ីវិលជាចំណាប់ខ្មាំង ធ្វើជាខែល ការពារ តាមរយៈការបង្កើតទីតាំងយោធានៅក្បែរមន្ទីរពេទ្យ និងរារាំងមិនឲ្យប្រជាជនស៊ីវិលចាកចេញពីកន្លែងប្រយុទ្ធគ្នា។
សង្រ្គាមសងសឹករបស់អ៊ីស្រាអែលទៅពួកហាម៉ាសដែលបើកការវាយប្រហារទ្រង់ទ្រាយធំសម្លាប់មនុស្សក្នុងទឹកដីអ៊ីស្រាអែលកាលពីថ្ងៃទី៧តុលា បានសម្លាប់ប្រជាជនស៊ីវិលប៉ាឡេស្ទីនជាង១ម៉ឺននាក់ និងបង្កវិនាសកម្ម កម្ទេចបំផ្លាញទីក្រុងហ្កាហ្សាស្ទើររាបដល់ដី។ នេះបើតាមការអះអាងរបស់ក្រសួងសុខាភិបាលហាម៉ាស។
នៅចំពោះមុខសមាជិករបស់ក្រុមប្រឹក្សាសន្តិសុខ ដែលបែកបាក់ មិនអាចរកសំឡេងរួម ទាមទារឲ្យអ៊ីស្រាអែលឈប់វាយប្រហារសម្លាប់ប្រជាជនស៊ីវិលនៅហ្កាហ្សា ប្រធានអង្គការសុខភាពពិភពលោកបានទាមទារឲ្យគេធ្វើកំណែទម្រង់ក្រុមប្រឹក្សាសន្តិសុខព្រោះថា ស្ថាប័នកំពូលមួយនេះ លែងដើរតួនាទីសំខាន់របស់ខ្លួនក្នុងការធានារក្សាសន្តិភាព និងសន្តិសុខពិភពលោក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ