ហ្កាហ្សា៖ រដ្ឋបាលលោកចូបៃដិន ផ្តើមរិះគន់អ៊ីស្រាអែល ថាមិនការពារអាយុជីវិតជនស៊ីវីលប៉ាឡេស្ទីន
ចុះផ្សាយនៅថ្ងៃ៖
ស្តាប់ - ០៨:០០
យោងតាម អ្នកនាំពាក្យក្រសួងសុខាភិបាលហាម៉ាស គឺគ្រាន់តែក្នុងមួយថ្ងៃព្រហស្បតិ៍ទី៧ធ្នូ មានមនុស្សស្លាប់ចំនួន៣៥០នាក់ ដោយសារតែការបាញ់ប្លោងគ្រាប់របស់អ៊ីស្រាអែល។ ហើយគិតសរុបមកដល់ថ្ងៃទី៦៣នៃសង្គ្រាមនេះ មានប្រជាជនស៊ីវីលប៉ាឡេស្ទីន ស្លាប់ចំនួនជាង១៧០០០នាក់ និងរបួសចំនួន៤៦០០០នាក់។ ៧០% នៃជនរងគ្រោះ គឺសុទ្ធតែជាកុមារ ក្មេងជំទង់ និងស្ត្រី។ នេះបើផ្អែកតាមអាជ្ញាធរហាម៉ាស គ្រប់គ្រងតំបន់ហ្កាហ្សា។ ប្រឈមនឹងបញ្ហានេះ រដ្ឋមន្ត្រីការបរទេសអាមេរិក បានរិះគន់ចំៗជាលើកទីមួយ ថាអ៊ីស្រាអែលមិនការពារអាយុជីវិតជនស៊ីវីលប៉ាឡេស្ទីន។
បន្ទាប់ពីបានផ្អាកការប្រយុទ្ធចំនួន៧ថ្ងៃ កាលពីចុងខែវិច្ឆិកា អ៊ីស្រាអែលបានសំរុកបើកការវាយប្រហារ បាញ់ប្លោងគ្រាប់ និងបញ្ជូនកងទ័ពថ្មើរជើង ទៅកាន់ភាគខាងត្បូងហ្កាហ្សា ទាំងដែលប្រជាជនស៊ីវីលប៉ាឡេស្ទីន កំពុងកកកុញយ៉ាងលំបាកវេទនានៅតំបន់នោះ។ ថ្ងៃសុក្រទី៨ធ្នូ កងទ័ពអ៊ីស្រាអែល បានអះអាងថា គេបានបើកប្រតិបត្តិការធំ រវាងពីថ្ងៃពុធ ដល់ថ្ងៃព្រហស្បតិ៍ ដោយបានវាយចំគោលដៅចំនួន៤៥០ចំណុច ដោយប្រើប្រាស់កងកុម្មង់ដូថ្មើរជើងផង ការវាយប្រហារផ្លូវអាកាស និងតាមផ្លូវទឹកផង។ ប្រតិបត្តិការនេះ បានអនុញ្ញាតឲ្យកងទ័ពអ៊ីស្រាអែល សម្លាប់បានសមាជិកក្រុមហាម៉ាសជាច្រើននាក់។
ជាការកត់សំគាល់ គេសង្កេតឃើញតំបន់ Khan Younès ដែលស្ថិតនៅភាគខាងត្បូងហ្កាហ្សា និង តំបន់Jabaliya មិនឆ្ងាយប៉ុន្មានពីក្រុងហ្កាហ្សាស៊ីធី បានរងនូវការបាញ់ប្លោងគ្រាប់យ៉ាងដំណំបំផុត ពីសំណាក់កងទ័ពអ៊ីស្រាអែល។ មន្ត្រីហាម៉ាស ទទួលបន្ទុកសុខាភិបាល បានអះអាងនៅថ្ងៃសុក្រថា នៅតំបន់ហ្កាហ្សាស៊ីធី មានស្លាប់ជនស៊ីវីលយ៉ាងហោច ៤០នាក់ ហើយស្លាប់ច្រើនសិបអ្នកទៀត នៅតំបន់ Jabaliya និងតំបន់ Khan Younès។
តើអាមេរិកដែលគាំទ្រអ៊ីស្រាអែល បានចាប់ផ្តើមប្តូរឥរិយាបថ?
ប្រឈមនឹងចំនួនជនស៊ីវីលប៉ាឡេស្ទីន ដែលស្លាប់និងរបួសដ៏ច្រើនសន្ធឹក កើនឡើងពីមួយថ្ងៃទៅមួយថ្ងៃ ដោយសារតែការវាយប្រហាររបស់អ៊ីស្រាអែល រដ្ឋបាលរបស់លោកចូ បៃដិន ហាក់ចាប់ផ្តើមប្តូរឥរិយាបថ រិះគន់ទៅលើអ៊ីស្រាអែល ថាមិនខ្វល់ពីអាយុជីវិតជនស៊ីវីលប៉ាឡេស្ទីន។
នៅក្នុងសន្និសីទកាសែតរួមគ្នាជាមួយលោក James Cameron រដ្ឋមន្ត្រីការបរទេសអង់គ្លេស នៅឯក្រុងវ៉ាស៊ីនតោន កាលពីថ្ងៃព្រហស្បតិ៍ទី៧ធ្នូ លោកអង់តូនៅ ប្លីងកិន ប្រមុខកាទូតអាមេរិកបានលើកឡើងថា វាជារឿងសំខាន់បំផុត ដែលអ៊ីស្រាអែលត្រូវតែផ្តល់អាទិភាព ទៅលើការការពារអាយុជីវិតជនស៊ីវីលប៉ាឡេស្ទីន។ លោកបានបន្ថែមថា តែបើយើងក្រឡេកទៅមើលការពិតជាក់ស្តែង គឺវាមានគម្លាតគ្នាឆ្ងាយខ្លាំងណាស់ រវាងអ្វីដែលអ៊ីស្រាអែលអះអាងថា ធ្វើគ្រប់យ៉ាងដើម្បីបញ្ចៀសកុំឲ្យស្លាប់ជនស៊ីវីលច្រើន និងតួលេខជាក់ស្តែងនៃចំនួនមនុស្សស្លាប់។
គួរកត់សំគាល់ថា នេះគឺជាលើកទី១ហើយ ដែលលោករដ្ឋមន្ត្រីការបរទេសអាមេរិក និយាយសំដីក្នុងន័យរិះគន់ដោយចំៗ ទៅលើអ៊ីស្រាអែល ទាក់ទិននឹងការវាយប្រហារបាញ់ប្លោងគ្រាប់ បណ្តាលឲ្យស្លាប់ជនស៊ីវីលប៉ាឡេស្ទីន។ ផ្អែកតាមសេតវិមាន លោកប្រធានាធិបតី ចូ បៃដិន ក៏ទើបតែបានទូរស័ព្ទទៅនិយាយ ជាមួយនឹងលោកបេនចាមីន ណេតាន់យ៉ាហ៊ូ កាលពីថ្ងៃព្រហស្បតិ៍ដែរ។ ក្នុងកិច្ចសន្ទនានេះ លោកចូ បៃដិន បានប្រាប់ទៅលោកណេតាន់យ៉ាហ៊ូ ថា អ៊ីស្រាអែលត្រូវតែការពារអាយុជីវិតជនស៊ីវីលប៉ាឡេស្ទីនឲ្យបានជាដាច់ខាត។ មិននឹងវាយប្រហារ កងទ័ពអ៊ីស្រាអែល ត្រូវតែបែងចែងឲ្យច្បាស់ រវាងជនស៊ីវីលនិងក្រុមភេរវកម្មហាម៉ាស។ លោក ចូ បៃដិន បានអំពាវនាវប្រាប់ទៅភាគីអ៊ីស្រាអែល ថាត្រូវតែរៀបចំឲ្យមានច្រកផ្លូវសុវត្ថិភាព សម្រាប់ជនស៊ីវីលនៅហ្កាហ្សា ដើម្បីឲ្យពួកគេ អាចធ្វើដំណើរចាកចេញពីតំបន់ដែលមានការប្រយុទ្ធ។
តើក្រុមប្រឹក្សាសន្តិសុខ អាចដាក់កំហិត ឲ្យអ៊ីស្រាអែលឈប់បាញ់បានទេ?
នៅថ្ងៃសុក្រទី៨ធ្នូ ក្រុមប្រឹក្សាសន្តិសុខនៃអង្គការសហប្រជាជាតិ ត្រូវជួបប្រជុំគ្នាជាថ្មីម្តងទៀត ដើម្បីបោះឆ្នោតលើគម្រោងសេចក្តីសម្រេចចិត្តរួម ថ្មីមួយទៀត។ គឺអេមីរ៉ាតអារ៉ាប់រួម ដែលជាអ្នកផ្តួចផ្តើមគំនិតនេះ។ អត្ថបទសេចក្តីសម្រេចចិត្តរួមនេះ មានខ្លឹមសារហៅឲ្យអ៊ីស្រាអែល ត្រូវតែឈប់បាញ់ ឈប់ប្រយុទ្ធជាបន្ទាន់នៅហ្កាហ្សា ដើម្បីការពារអាយុជីវិតជនស៊ីវីលប៉ាឡេស្ទីន។ អាយុជីវិតប្រជាជនស៊ីវីល ទាំងប៉ាឡេស្ទីន ទាំងអ៊ីស្រាអែល ត្រូវតែទទួលបានការការពារ ដោយផ្អែកលើច្បាប់មនុស្សធម៌អន្តរជាតិ។ គម្រោងសេចក្តីសម្រេចចិត្តនេះ បានអំពាវនាវផងដែរ ឲ្យដោះលែងចំណាប់ខ្មាំងទាំងអស់ ដោយគ្មានលក្ខខណ្ឌ។
សូមបញ្ជាក់ថា ដើម្បឲ្យអត្ថបទសំណើសេចក្តីសម្រេចចិត្តរួមមួយ អាចអនុម័តជាស្ថាពរបាន គឺទាល់តែអត្ថបទនោះ ទទួលបានការគាំទ្រ ចំនួនយ៉ាងហោច ៩សំឡេងក្នុងចំណោម១៥ប្រទេសសមាជិកក្រុមប្រឹក្សាសន្តិសុខ។ តែទន្ទឹមនឹងនេះ គឺល្គឹកណាទាល់តែគ្មានប្រទេសសមាជិកអចិន្ត្រៃយ៍ណាមួយ ក្នុងចំណោមទាំង៥ បោះឆ្នោតវ៉េតូ។ ផ្អែកតាមការវិភាគ ថ្វីបើសហរដ្ឋអាមេរិកបានចាប់ផ្តើមបង្ហាញជំហររិះគន់ខ្លះ មកលើអ៊ីស្រាអែល តែសហរដ្ឋអាមេរិកដែលមានសិទ្ធិវ៉េតូ មិនចង់ចេញមុខទាមទារឲ្យអ៊ីស្រាអែលឈប់បាញ់ទេ។ រដ្ឋបាលលោក ចូ បៃដិន ធ្លាប់បានលើកឡើងថា ការឈប់បាញ់ ឬការទំលាក់អាវុធ គឺវានឹងហុចអត្ថប្រយោជន៍ទៅឲ្យក្រុមភេរវកម្មហាម៉ាស។
យ៉ាងណាក៏ដោយ ប្រឈមនឹងទុក្ខវេទនា ដែលប្រជាជនប៉ាឡេស្ទីនកំពុងតែជួបប្រទះនាពេលនេះ សំឡេងទាមទារឲ្យអ៊ីស្រាអែលបិទបញ្ចប់សង្គ្រាមនេះ មានកាន់តែច្រើនឡើងៗ។ យ៉ាងណាមិញ លោកអង់តូនីញ៉ូ ហ្គូតទែរស៍ អគ្គលេខាធិការអង្គការសហប្រជាជាតិ បានផ្ញើលិខិតមួយទៅកាន់ក្រុមប្រឹក្សាសន្តិសុខមុនពេលបើកការប្រជុំ។ ក្នុងលិខិតនេះ លោកបានលើកឡើងអំពីមាត្រា៩៩ នៃកាតិកាសញ្ញារបស់អង្គការសហប្រជាជាតិ ដែលចែងថា អគ្គលេខាធិការអង្គការសហប្រជាជាតិ មានសិទ្ធិទាញសញ្ញាអាសន្ន ប្រាប់ប្រទេសសមាជិកទាំងអស់នៃក្រុមប្រឹក្សាសន្តិសុខ ថាត្រូវតែសម្រេចធ្វើអ្វីម្យ៉ាង ដើម្បីការពារសន្តិភាព និងស្ថិរភាពសន្តិសុខអន្តរជាតិ ពីគ្រោះថ្នាក់។ ជាការកត់សំគាល់ ករណីអគ្គលេខាធិការអង្គការសហប្រជាជាតិ ប្រើប្រាស់មាត្រា៩៩ ដើម្បីដាក់កំហិតឲ្យសមាជិកក្រុមប្រឹក្សាសន្តិសុខបោះឆ្នោតអនុម័តសេចក្តីសម្រេចចិត្តរួមនេះ គឺវាជារឿងកម្រមានណាស់។ មានន័យនេះ កាលៈទេសៈពេលនេះគឺអាសន្នបំផុត ផ្នែកមនុស្សធម៌។
តើជំនួយមនុស្សធម៌ បញ្ជូនចូលហ្កាហ្សា គ្រប់គ្រាន់ឬទេ?
ទាក់ទិននឹងការដឹកជញ្ជូនស្បៀងអាហារ ជំនួយមនុស្សធម៌ ថ្នាំសង្កូវចូលទៅហ្កាហ្សា គឺមានការថយចុះច្រើន ប្រមាណមួយសប្តាហ៍មកនេះ។ អំឡុងពេលដែលអ៊ីស្រាអែលបានយល់ព្រមផ្អាកការប្រយុទ្ធ រយៈពេល១សប្តាហ៍ កាលពីចុងខែវិច្ឆិកា យ៉ាងហោចណាស់មានជំនួយមនុស្សធម៌ ចំនួនជិត២០០រថយន្តកុងទឺន័រជាមធ្យមក្នុងមួយថ្ងៃ ត្រូវបានគេដឹកចូលទៅហ្កាហ្សា តាមច្រករ៉ាហ្វា។ ក៏ប៉ុន្តែ បច្ចុប្បន្នដោយសារតែការបាញ់ប្លោងទម្លាក់គ្រាប់ នៅភាគខាងត្បូងហ្កាហ្សា ចំនួនរថយន្តដឹកជំនួយមនុស្សធម៌ បានធ្លាក់មកនៅមិនដល់១០០គ្រឿងទេ។
ផ្អែកតាម ការិយាល័យកិច្ចការមនុស្សធម៌ របស់អង្គការសហប្រជាជាតិ កាលពីថ្ងៃព្រហស្បតិ៍ មានរថយន្តដឹកស្បៀងចូលទៅហ្កាហ្សា តាមច្រករ៉ាហ្វា ចំនួន៦៩គ្រឿង និងមានការបញ្ជូនប្រេងឥន្ធនៈ ចំនួន៦១០០០លីត្រផងដែរ។ ទោះជាយ៉ាងនេះក្តី ការិយាល័យនេះ អះអាងថាវាតិចតួចស្តួចស្តើងខ្លាំងណាស់ បើក្រឡេកទៅមើលតម្រូវការជាក់ស្តែងរបស់ប្រជាជនជិត២លាននាក់នៅហ្កាហ្សា។
ដោយឡែក ផ្អែកតាមសេតវិមាន គឺគេកំពុងចរចា ជាមួយភាគីអ៊ីស្រាអែល ឲ្យបើកច្រកមួយទៀត គឺច្រកKerem Shalom ដែលស្ថិតនៅភាគត្បូងហ្កាហ្សាដែរ ត្រង់ចំណុចព្រំដែន រវាងហ្កាហ្សា អេហ្ស៊ីប និងអ៊ីស្រាអែល។ លោក វីរៈសេនីយ៍ឯក Elad Goren មន្ត្រីអ៊ីស្រាអែលទទួលបន្ទុករដ្ឋបាលស៊ីវីលក្នុងដែនដីប៉ាឡេស្ទីន បានប្រាប់អ្នកកាសែតថា ភាគីអ៊ីស្រាអែល នឹងបើកច្រក Kerem Shalom តែគឺបើកឲ្យតែរថយន្តកាមីញ៉ុង ចូលមកដើម្បីធ្វើការត្រួតពិនិត្យសន្តិសុខតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ