ធនាគារកណ្តាលអាមេរិករក្សាអត្រាការប្រាក់ឱ្យនៅក្បែរសូន្យដដែល
នៅប៉ុន្មានម៉ោងមុននេះ ធនាគារកណ្តាលអាមេរិក ទើបនឹងចេញផ្សាយសេចក្តីថ្លែងការណ៍មួយ ដែលនឹងរក្សាអត្រាការប្រាក់ឱ្យនៅក្បែរសូន្យដដែល តែបើកចំហលទ្ធភាពក្នុងការដំឡើងអត្រាការប្រាក់នេះ នៅខណៈពេលណាមួយ ដោយសារធនាគារកណ្តាលមានទំនុកចិត្ត អំពីកំណើនសេដ្ឋកិច្ចក្នុងកម្រិតមធ្យមមួយ បើទោះជាតួរលេខកំនើនសេដ្ឋកិច្ចអាមេរិកនៅត្រីមាសទីមួយនេះខុសឆ្ងាយពីការរំពឹងទុកក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ធនាគារកណ្តាលបានកត់សម្គាល់ពីការធ្លាក់ចុះនៃកំណើនសេដ្ឋកិច្ចនៅរដូវរងារទើបកន្លងផុតទៅនេះ ប៉ុន្តែបានសន្មតជាចម្បងថាការនេះបណ្តាលមកពី «កត្តាមួយចំនួនដែលមានលក្ខណៈបណ្តោះអាសន្ន» ប៉ុណ្ណោះ នេះបើតាមរបាយការណ៍ពត៌មានរបស់ AFP។
ក្នុងសេចក្តីថ្លែងការណ៍ របស់គណៈកម្មាធិការរូបបិយវត្ថុនៃធនាគារកណ្តាលអាមេរិក ចេញផ្សាយនៅប៉ុន្មានម៉ោងមុននេះ គេបានគូសបញ្ជាក់ថា៖ ទោះបីជាកំណើនសេដ្ឋកិច្ច នៅក្នុងវិស័យផលិតកម្ម និង វិស័យការងារ បានធ្លាក់ចុះនៅក្នុងត្រីមាសទី១នេះ តែគណៈកម្មាធិការនៅបន្តរំពឹងថា (... ) សកម្មភាពសេដ្ឋកិច្ចនឹងកើនឡើងវិញក្នុងល្បឿនមធ្យម។
សូមបញ្ជាក់ថាកំណើនសេដ្ឋកិច្ចបានថយមកត្រឹម០.២% នៅត្រីមាសទី១ ពីខែមករាមកដល់ខែមីនា ប្រៀបទៅនឹង ២.២% នៅត្រីមាសចុងក្រោយនៃឆ្នាំ២០១៤។ ការធ្លាក់ចុះនេះបណ្តាលមកពីបញ្ហាអាកាសធាតុនៅរដូវរងារកន្លងទៅនេះ ដោយសារកម្លាំងនៃប្រាក់ដុល្លារដែលបង្អាក់ដល់ការនាំចេញ និង ការធ្លាក់ចុះនៃតម្លៃថាមពលប្រេង ដែលបានប៉ះពាល់យ៉ាងខ្លាំងលើវិនិយោគឧស្សាហកម្ម។
គណៈកម្មាធិការរូបបិយវត្ថុមិនបានទាត់ចោលទាំងស្រុងទេពីលទ្ធភាពក្នុងការដំឡើងអត្រាការប្រាក់ នាអំឡុងពេលនៃកិច្ចប្រជុំនៅថ្ងៃទី១៦ និង១៧ឧសភាខាងមុខនេះ បើទោះជាវាទំនងជាមិនអាចទៅរួចក៏ដោយ។
ធនាគារកណ្តាលបានបង្ហាញនូវរូបភាពអវិជ្ជមាននៃសកម្មភាពសេដ្ឋកិច្ច តែបានអះអាងថា ទំនុកចិត្ត នៃអ្នកប្រើប្រាស់ នៅតែមានភាពរឹងមាំ។ ពិតណាស់ថាជាទ្រឹស្តី ការចំណាយរបស់អ្នកប្រើប្រាស់គួរតែនឹងទាញយកប្រយោជន៍ពីអំណាចទិញដែលកើនឡើងដោយសារការធ្លាក់ចុះតម្លៃប្រេង តែតាមជាក់ស្តែង មកទល់នឹងពេលនេះវាខុសអំពីទ្រឹស្តី។ ប៉ុន្តែ ទោះជាយ៉ាងណា សេតវិមានក៏បានអះអាងកាលពីថ្ងៃពុធ ថាអ្នកប្រើប្រាស់ដែល «បានសន្សំផលចំនេញដ៏ច្រើនសន្ធឹកសន្ធាប់ដោយសារការធ្លាក់ចុះនៃតម្លៃប្រេង» ទំនងជានឹងបង្កើនការចំណាយរបស់ខ្លួននៅចុងឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ