អាមេរិកនិយាយថាគំរូសេដ្ឋកិច្ចចិន«មិននៅថេរយូរអង្វែង»ឡើយ
សហរដ្ឋអាមេរិកបានវិភាគថា សំរាប់ថ្ងៃអនាគត ការលូតលាស់របស់ប្រទេសចិនមិនអាច«ស្ថិតស្ថេរ»យូរអង្វែងបានទេ ដោយសារតែសេដ្ឋកិច្ចរបស់ចិន ផ្អែកលើកំលាំងពលកម្មក្នុងតំលៃទាប និងទំហំវិនិយោគ«ធំសម្បើមហួសខ្នាត»។ សហរដ្ឋអាមេរិកក៏បានបង្ហាញ ការព្រួយបារម្ភចំពោះនយោបាយរូបិយប័ណ្ណចិន ដែលមានតំលៃទាបហួសហេតុ ហើយនេះជាការលំបាកសំរាប់ផលិតផលអាមេរិកចូលទៅប្រកួតប្រជែងជាមួយផលិតផលរបស់ចិន។
ចុះផ្សាយនៅថ្ងៃ៖
ស្តាប់ - ០១:៥២
នៅក្នុងសុន្ទរកថាស្តីពីអាទិភាពសេដ្ឋកិច្ចអាមេរិក លោក Nathan Sheets អនុរដ្ឋមន្រ្តីក្រសួងរតនាគាជាតិអាមេរិកបានថ្លែងថា ការនាំចេញរបស់ចិន ក្នុងរយៈពេលបីទសវត្សរ៍នេះមើលទៅហាក់ដូចជាអស្ចារ្យណាស់ ប៉ុន្តែ កំណើនដ៏ឆាប់រហ័សនេះគឺ ពឹងផ្អែកទាំងស្រុងទៅលើ កំលាំងពលកម្មដ៏ច្រើនសន្ធឹកសន្ធាប់ ក្នុងតំលៃឈ្នួលទាប។ ម្យ៉ាងទៀត សន្ទុះនៃការនាំចេញរបស់ចិនមានបាន ក៏ដោយសារ តែប្រទេសនេះអាស្រ័យពឹងពាក់លើគំរោងវិនិយោគធំមហាសាល។
មន្រ្តីជាន់ខ្ពស់អាមេរិកបានវិភាគថា នាពេលអនាគត ការរីកចំរើនបែបនេះនឹងពុំមែនជាគំរូនៃការលូតលាស់សេដ្ឋកិច្ច សំរាប់រយៈពេលយូរអង្វែងរបស់ប្រទេសចិន ក៏ដូចជាសេដ្ឋកិច្ចទាំងមូលរបស់ពិភពលោក។ សព្វថ្ងៃនេះ ចិនត្រូវបានគេចាត់ទុកថា ជាមហាអំណាចសេដ្ឋកិច្ចទីពីរលើពិភពលោក។ ប៉ុន្តែ ក្នុងពេលថ្មីៗនេះ ចិនបានបង្ហាញសញ្ញាអោយឃើញពីភាពលំបាកក្នុងការរក្សាកំណើនលូតលាស់របស់ខ្លួន។ ជាក់ស្តែង នៅក្នុងត្រីមាសទីបីឆ្នាំ ២០១៤ នេះ ពោលគឺចាប់ពីខែកក្កដា ដល់ខែកញ្ញា កំណើនផលិតផលសរុបក្នុងស្រុករបស់ចិនបានត្រឹមតែ ៧,៣% ប៉ុណ្ណោះ។ នេះជាតួលេខទាបបំផុតពុំដែលធ្លាប់មាន ចាប់តាំងពីត្រីមាសទីមួយឆ្នាំ ២០០៩។
សហរដ្ឋអាមេរិកស្នើអោយចិនរិះរកវិធីយ៉ាងណារក្សាលំនឹងនៃការលូតលាស់របស់ខ្លួន ដោយគួរតែផ្តោតលើឧស្សាហកម្មផែ្នកសេវាកម្ម និងទីផ្សារក្នុងស្រុក ជាជាងគិតតែលើការនាំចេញ។ ជារឿយៗ សហរដ្ឋអាមេរិកក៏តែងចោទប្រកាន់ចិនផងដែរក្នុងការអនុវត្តន៍ការប្រកួតប្រជែងពាណិជ្ជកម្មមិនស្មោះត្រង់ ដោយក្នុងនោះចិនបានបញ្ចុះតំលៃរូបិយប័ណ្ណរបស់ខ្លួនទាបជាងភាពជាក់ស្តែង ជាហេតុធ្វើអោយទំនិញរបស់ចិនមានតំលៃថោកនៅលើទីផ្សារអន្តរជាតិ។
នៅក្នុងនោះផងដែរ លោកអនុរដ្ឋមន្រ្តីក្រសួងរតនាគាជាតិអាមេរិករូបនេះបានបង្ហាញពីក្តីព្រួយបារម្ភចំពោះសេដ្ឋកិច្ចអ៊ឺរ៉ុប ដែលមានមានលក្ខណៈទន់ខ្សោយ និងពុំស្មើភាពក្នុងរយៈពេល ១០ ឆ្នាំចុងក្រោយនេះ។ ភាពទន់ខ្សោយរបស់សេដ្ឋកិច្ចតំបន់អឺរ៉ុបបង្កអោយមានផលប៉ះពាល់ដល់សេដ្ឋកិច្ចអាមេរិកផងដែរ ព្រោះអឺរ៉ុបជាដៃគូពាណិជ្ជកម្មទីមួយរបស់អាមេរិក។ អ្នកជំនាញរូបនេះបានស្នើអោយប្រទេសតំបន់អឺរ៉ូ ជាពិសេសអាល្លឺម៉ង់ចាត់វិធានការដូចជាបន្ធូរបន្ថយ ឬធ្វើកំណែទម្រង់នយោបាយពន្ធដារជាដើម ដើម្បីធ្វើយ៉ាងណាជំរុញអោយមានការផលិតច្រើន ជាពិសេសបង្កើនអំណាចទិញរបស់អ្នកប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ