ព្យុះសង្ឃរា រំខានប្រតិបត្តិការបោសសម្អាតប្រេង នៅឈូងសមុទ្រម៉ិចស៊ិក
ដូចជាការព្រាងទុក ខ្យល់ព្យុះត្រូពិច ឈ្មោះ Alex បានប្រែក្លាយទៅជាខ្យល់ព្យុះសង្ឃរា ដែលមានល្បឿន ១២០គីឡូម៉ែត្រក្នុងមួយម៉ោង។ កាលពីយប់ថ្ងៃអង្គារ ខ្យល់ព្យុះបានបោកបក់ទៅលើឆ្នេរសមុទ្រម៉ិចស៊ិក និងរដ្ឋតិចសាស់របស់អាមេរិក។ វត្តមានដ៏គម្រាមកំហែងរបស់ព្យុះសង្ឃរា អាចនឹងរំខានដល់ការប្រមូល និងសម្អាតប្រេងដែលលេចអណ្តែតត្រៀបត្រាក្នុងឈូងសមុទ្រម៉ិចស៊ិក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
ព្យុះសង្ឃរា កំពុងវាយប្រហារភាគខាងលិចអាមេរិក និងមិនបានតំរង់ទៅតំបន់ដែលមានប្រេងលេចក្នុងឈូងសមុទ្រម៉ិចស៊ិកនៅឡើយទេ ប៉ុន្តែ ឥទ្ធិពលរបស់វាបានធ្វើឲ្យទឹករលកមានកំពស់ខ្ពស់ពីរម៉ែត្រ។ កំពស់រលកសមុទ្រខ្ពស់ និងខ្យល់បក់ក្នុងល្បឿន ៤០គីឡូម៉ែត្រក្នុងមួយម៉ោងបានរំខានរួចទៅហើយ ដល់ការប្រមូល និង ដុតប្រេងឆៅដែលកំពុងអណ្តែតលើផ្ទៃសមុទ្រ។
អ្នកឧតុនិយមបង្ហាញថា នៅយប់ថ្ងៃពុធនេះ កំពស់រលកសមុទ្រកើនឡើង ៣ ម៉ែត្រកន្លះ។ អាជ្ញាធរអាមេរិកបានប្រកាសទុកមុនហើយថា គ្រប់កប៉ាល់ដែលកំពុងប្រតិបត្តិការប្រមូលប្រេងដែលហៀរចេញលើសមុទ្រ ត្រូវត្រលប់ចូលច្រាំងវិញ ប្រសិនខ្យល់សមុទ្របក់ក្នុងល្បឿន ៧០គីឡូម៉ែត្រក្នុងមួយម៉ោង។ ហើយប្រសិនបើករណីនេះកើតឡើងមែន គ្រប់ប្រតិបត្តិការនឹងផ្អាករយៈពេល២សប្តាហ៍។ ជាលទ្ធផល ការខួងរន្ធជំនួយដើម្បីទប់ស្កាត់ការហូរប្រេងនឹងត្រូវពន្យាររហូតដល់ខែកញ្ញា។
ជាមួយគ្នានេះ ក្រុមហ៊ុន BPបង្ហាញថា ខ្យល់ព្យុះនឹងអាចធ្វើឲ្យគេអាក់ខានមិនបានបញ្ជូននាវាទីបីរបស់ក្រុមហ៊ុនទៅ បូមប្រេងដែលកំពុងហៀរចេញមកក្រៅ។ ខ្យល់ព្យុះបានធ្វើឲ្យការងារបោសសម្អាតប្រមូលប្រេងកាន់តែយឺត ខណៈពេលដែលក្រុមហ៊ុនបានទទួលការរិះគន់យ៉ាងខ្លាំងពីរឿងធ្វើការងារបែបមើលស្រាលទៅលើគ្រោះថ្នាក់លើកនេះ។
គេប៉ាន់ប្រមាណថា មានប្រេងឆៅពី៣ម៉ឺនធុង ទៅ ៦ម៉ឺនធុងហៀរចេញជារៀងរាល់ថ្ងៃក្នុងឈូងសមុទ្រម៉ិចស៊ិក។ ចំណែកក្រុមហ៊ុនអាចបូមបានតែ២ម៉ឺន ៥ពាន់ធុងប៉ុណ្ណោះ។ អាជ្ញាធរបារម្ភថា ខ្យល់ព្យុះក្នុងសមុទ្រនឹងអាចធ្វើឲ្យប្រេងអណ្តែតខ្ចរខ្ចាយ និងរសាត់មករកឆ្នេរកាន់តែលឿន។
រហូតមកដល់ពេលនេះ រដ្ឋអាមេរិកចំនួន ៤ដែលកំពុងរងគ្រោះដោយប្រេងហៀរអណ្តែតរបស់ក្រុមហ៊ុន ប្រេងអង់គ្លេស BP។ អាមេរិកបានប្រកាសសុខចិត្តទទួលប្រើជំនួយដែលផ្តល់ដោយអង្គការអន្តរជាតិ និងប្រទេសចំនួន ១២។ កប៉ាល់រត់ក្នុងល្បឿនលឿនដែលមាននាទីប្រមូលប្រេងអណ្តែត និងរបាំងទប់ប្រេងដែលជប៉ុនសន្យាផ្តល់ឲ្យ នឹងត្រូវគេយកទៅប្រើប្រាស់ ប្រសិនបើ ព្យុះចាប់ស្ងប់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ