សហរដ្ឋអាមេរិក៖ អ្នកជំនាញព័ត៌មានវិទ្យាបញ្ជាក់ថា លទ្ធផលឆ្នោតនៅរដ្ឋ៣ មានភាពមិនប្រក្រតី
លទ្ធផលបោះឆ្នោតប្រធានាធិបតីសហរដ្ឋអាមេរិក កំពុងតែធ្វើឲ្យមតិទូទៅមានការសង្ស័យ បន្ទាប់ពីអ្នកជំនាញផ្នែកព័ត៌មានវិទ្យា បានធ្វើការអះអាងថា នៅរដ្ឋចំនួន៣ សម្លេងឆ្នោតដែលបោះតាមប្រព័ន្ធអ៊ីនធើនែត គឺមានភាពមិនប្រក្រតី។ អ្នកជំនាញបានជំរុញឲ្យក្រុមលោកស្រីគ្លីនតុន ធ្វើការបដិសេធលទ្ធផល ហើយនឹងស្នើសុំឲ្យរាប់សន្លឹកឆ្នោតឡើងវិញ នៅតាមរដ្ឋទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
យោងតាមការចុះផ្សាយរបស់ New York Magazine លទ្ធផលអាចមានភាពមិនប្រក្រតី ក្នុងរដ្ឋចំនួន៣ ដែលជារដ្ឋដែលអនុញ្ញាតិឲ្យបោះតាមប្រព័ន្ធអ៊ីនធើនែត។ ក្នុងនោះមានរដ្ឋ Wisconsin Pennsylvanie និង Michigan។ អ្នកជំនាញព័ត៌មានវិទ្យាបានលើកឡើងថា នៅក្នុងរដ្ឋ Wisconsin សន្លឹកឆ្នោតដែលបាត់មានប្រមាណជា៧%។ ក្រុមអ្នកជំនាញនេះ បានជូនដំណឹងទៅក្រុមការងាររបស់លោកស្រីគ្លីនតុន ឲ្យធ្វើការតវ៉ា ដើម្បីរាប់សន្លឹកឆ្នោតឡើងវិញ នៅតាមរដ្ឋទាំង៣។
ជាការពិត បេក្ខជនឈរឈ្មោះអាចតវ៉ាឲ្យរាប់សន្លឹកឆ្នោតឡើងវិញ តែត្រូវរកថវិកាមកចំណាយក្នុងការចាត់ចែងរាប់សន្លឹកឆ្នោតឡើងវិញដោយខ្លួនឯង ហើយត្រូវដាក់ពាក្យសុំឲ្យបានមុនកាលបរិច្ឆេទកំណត់។ ក្នុងករណីរដ្ឋ Wisconsin គឺត្រូវដាក់ពាក្យមិនឲ្យលើសពីថ្ងៃ២៥ វិច្ឆិកា ពោលគឺថ្ងៃនេះតែម្តង។ ចំណែកនៅរដ្ឋ Pennsylvanie គឺថ្ងៃទី២៨ វិច្ឆិកា រីឯរដ្ឋ Michigan គឺថ្ងៃ៣០ វិច្ឆិកា។ យ៉ាងណាមិញ លោកស្រី Jill Stein បេក្ខជនមកពីគណបក្សអេកូឡូជី បានដាក់ពាក្យសុំឲ្យរាប់សន្លឹកឆ្នោតឡើងវិញនៅរដ្ឋ Wisconsin។
គួររំលឹកផងដែរថា ការបោះឆ្នោតតាមរយៈប្រព័ន្ធអ៊ីនធើនែត ធ្លាប់ត្រូវបានអ្នកជំនាញ ប្រកាសជាច្រើនដងរួចមកហើយថា វាអាចមានគ្រោះថ្នាក់ ដោយសារប្រព័ន្ធទិន្ន័យព័ត៌មានវិទ្យានេះ អាចមានចំណុចខ្សោយ ធ្វើឲ្យជនទុច្ចរិតចូលទៅកែប្រែលទ្ធផល រឺមួយធ្វើឲ្យបាត់សន្លឹកឆ្នោតបាន។ មានតែសន្លឹកឆ្នោតជាក្រដាស ដែលអ្នកបោះ យកទៅដាក់ចូលក្នុងហឹបដោយផ្ទាល់ដៃទេ ទើបជាវិធីដែលជាទីទុកចិត្ត និងប្រកបដោយសុវត្ថិភាព។ ជាងនេះទៅទៀត រដ្ឋខ្លះដែលបន្តអនុញ្ញាត ឲ្យបោះតាមប្រព័ន្ធអ៊ីនធើនែត បានប្រើប្រាស់ប្រព័ន្ធកម្មវិធីព័ត៌មានវិទ្យា ដែលចាស់ហួសសម័យ ហើយងាយនឹងអាចឲ្យគេចូលទៅបំផ្លាញបាន ទៀតផង។
កាលពីក្នុងពេលឃោសនា គឺលោកដូណាល់ត្រាំទេ ដែលប្រកាសថា លោកនឹងមិនទទួលស្គាល់លទ្ធផលបោះឆ្នោត បើសិនជាមានករណីមិនប្រក្រតីណាមួយ ទាក់ទិននឹងការរាប់ចំនួនសន្លឹកឆ្នោត។ ក៏ប៉ុន្តែអ្នកដែលគួរតវ៉ានឹងលទ្ធផល នាពេលនេះ គឺមិនមែនលោកត្រាំទេ តែគឺក្រុមរបស់លោកស្រីគ្លីនតុន ដែលជាអ្នកចាញ់ឆ្នោត។ យ៉ាងណាក៏ដោយ រហូតមកទល់ពេលនេះ ក្រុមការងាររបស់លោកស្រីគ្លីនតុន នៅមិនទាន់បានបង្ហើបពីចេតនាដាក់ពាក្យសុំ ឲ្យរាប់សន្លឹកឆ្នោតឡើងវិញ នៅតាមរដ្ឋទាំងបីខាងលើទេ។
គួរបញ្ជាក់ផងដែរ ថាយោងតាមតួលេខផ្លូវការរបស់Cook Political Report លោកស្រីគ្លីនតុន បានទទួលសម្លេងឆ្នោតសរុបទាំងអស់លើសលោកដូណាល់ត្រាំ ដល់ទៅ២លានសម្លេង។ ក៏ប៉ុន្តែដោយសារប្រព័ន្ធបោះឆ្នោតប្រធានាធិបតីអាមេរិក ជាការបោះឆ្នោតដោយប្រយោល ពោលគឺមិនមែនសម្លេងឆ្នោតសរុបកំណត់ពីលទ្ធផលទេ តែគឺចំនួនអ្នកបោះឆ្នោតតំណាង ដែលបេក្ខជនប្រមូលបាន នៅតាមរដ្ឋនីមួយៗ ដែលជាអ្នកកំណត់ពីលទ្ធផលចុងក្រោយ។ យ៉ាងណាក៏ដោយ ជាមួយនឹងគំលាតគ្នានៃលទ្ធផលនេះ ធ្វើឲ្យការតវ៉ាសុំឲ្យធ្វើកំណែទម្រង់ប្រព័ន្ធបោះឆ្នោតអាមេរិក កាន់តែមានសន្ទុះក្លាំងក្លា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ