សហរដ្ឋអាមេរិក ចរចាជាមួយពួកឧទ្ទាមតាលីបង់
ប្រធានាធិបតីអាហ្វហ្កានីស្ថានលោក Hamid Karzaï ទើបប្រកាសបញ្ជាក់នៅថ្ងៃសៅរ៍១៨មិថុនា២០១១ ថា “សហរដ្ឋអាមេរិក កំពុងធ្វើការចរចាជាមួយពួកតាលីបង់។ គឺជាលើកទីមួយហើយដែលអ្នកទទួលខុសត្រូវជាន់ខ្ពស់ម្នាក់ ប្រកាសជាផ្លូវការអំពីវត្តមាននៃកិច្ចចរចានេះ។ នៅតែប៉ុន្មានសប្តាហ៍ទៀតពីការប្រកាសជូនដំណឹងអំពីការចាប់ផ្តើមការដកទាហានអាមេរិកពីអាហ្វហ្កានីស្ថាន ព័ត៌មានខាងលើនេះ បានបង្ហើបឲ្យឃើញដំណោះស្រាយតាមផ្លូវនយោបាយចំពោះសង្គ្រាមតទល់នឹងពួកតាលីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ជាមួយនឹងសេចក្តីជូនដំណឹងនេះ លោក Hamid Karzaï មានបំណងផ្តល់សន្ទុះដល់កិច្ចចរចា។
ចំណែកប្រជាជនអាហ្វហ្កានីស្ថានវិញ មួយភាគធំ ដែលមានការហេវហត់អស់កម្លាំងខ្លាំងដោយហេតុសង្គ្រាមជាច្រើនទសវត្សមកហើយនោះ ពួកគេចង់បានជាបឋម គឺការរស់នៅដោយសុខសន្តិភាព និងគិតថា កិច្ចព្រមព្រៀងទ្រង់ទ្រាយមួយ ជាមួយពួកតាលីបង់ មានលក្ខណៈចាំបាច់ខានមិនបាន។
ក៏ប៉ុន្តែ ក្រុមខ្លះ ពុំមានគំនិតយល់ស្របដូចនេះទេ។ អង្គការខ្លះ ខាងការពារសិទ្ធិសេរីភាពស្ត្រី មានការព្រួយបារម្ភចំពោះការរីកចម្រើនសម្រេចបានចាប់តាំងពីឆ្នាំ ២០០១មកត្រូវបានគេលះបង់ចោលជាថ្នូរនឹងកិច្ចព្រមព្រៀងសន្តិភាពមួយ ។សកម្មជនទាំងនេះ ខ្លាចពួកតាលីបង់វិលត្រឡប់ចូលមកក្នុងរដ្ឋាភិបាលអាហ្វហ្កានីស្ថានវិញ។
ម្យ៉ាងទៀត អតីតសមាជិកជាច្រើននៃបក្សសម្ព័ន្ធខាងជើង ដែលជាសត្រូវប្រវត្តិសាស្រ្តរបស់ពួកតាលីបង់តាំងពីមុនឆ្នាំ២០០១ ក៏ប្រឆាំងជំទាស់នឹងការផ្សះផ្សាជានាគ្នាជាមួយពួកឧទ្ទាមដែរ។ កាលពីខែឧសភាមុន ពួកគេមានគ្នា ១ ម៉ឺននាក់ បានមកជួបជុំគ្នានៅទីក្រុងកាប៊ូល ដើម្បី បរិហារទៅលើកិច្ចចរចាសន្តិភាពដែលពួកគេយល់ឃើញថា ជារឿងក្បត់គ្នាមួយនៅក្នុងការវាយប្រយុទ្ធ ដែលប្រជាជនអាហ្វហ្កានីស្ថាន កំពុងធ្វើការប្រឆាំងទល់នឹងពួកជ្រុលនិយម។
ទោះបីជាមានការជូនដំណឹងពីលោកប្រធានាធិបតី Karzaï នេះក្តី ក៏ក្រុមអ្នកការទូតវិញ សុខចិត្តទន្ទឹងរង់ចាំមើលសិន។ ទំនាក់ទំនងរវាងក្រុមអ្នកតំណាងពួកតាលីបង់និង សមាជិកនៃសហគមន៍អន្តរជាតិ ពិតជាបានប្រព្រឹត្តទៅជាច្រើនខែមកហើយ ។ ក៏ប៉ុន្តែទំនាក់ទំនងនេះ ស្ថិតនៅដំណាក់កាលដំបូងប៉ុណ្ណោះ ។ អ្វីជាប្រាកដប្រជា នៅពុំទាន់បានចាប់ផ្តើមនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ