អតីតអ្នកស៊ើបការJonh Brennan ទីប្រឹក្សាអូបាម៉ា ទទួលដំណែងជាមេដឹកនាំCIA
កាលពីថ្ងៃចន្ទ ម្សិលមិញនេះ ប្រធានាធិបតីអាមេរិក អូបាម៉ា បានជ្រើសយកទីប្រឹក្សារបស់លោក គឺលោក Jonh Brennan អោយឡើងកាន់ដំណែងជាមេដឹកនាំ ក្រសួងស៊ើបការសំងាត់អាមេរិក CIA។ លោក Jonh Brennan មានអាយុ ៥៧ ឆ្នាំ ធ្លាប់ធ្វើការ នៅ CIA ២៥ឆ្នាំមកហើយ។ លោកបានដើរតួនាទីសំខាន់ ក្នុងការប្រយុទ្ធជាមួយ ក្រុមភេរវកម្ម អាល់កៃដា ដោយលោកជាអ្នកអប នៅជិតប្រធានាធិបតី នៅរូងក្រោមដី នៃសេតវិមាន នៅថ្ងៃដែលកុំម៉ង់ដូអាមេរិក សំលាប់មេចេលនាភេរវកម្ម Ben Laden។ លោក Brennan ត្រូវបន្តដំណែងពីលោក David Petraeus ដែលបានលាលែងចេញពីដំណែង កាលពីខែវិច្ឆិកា កន្លងមក បន្ទាប់ពីមានរឿងអាស្រូវ ជាមួយ ស្ត្រីដែលកត់ត្រាប្រវត្តិរូប របស់ខ្លួន។
ចុះផ្សាយនៅថ្ងៃ៖
ស្តាប់ - ០១:៤១
ក្នុងពេលប្រកាសជ្រើសយក Jonh Brennan ជាមេដឹកនាំ CIA ប្រធានធិបតីអាមេរិក បានបង្ហាញជាសាធារណៈថា លោក Jonh Brennan ជាអ្នកជំនាញដែលមាន សមត្ថភាពខ្ពស់ជាងគេ និងគួរអោយគោរពជាងគេ នៅក្នុងវិស័យស៊ើបព័ត៌មាន និងសកម្មភាពប្រឆាំងភេរវកម្ម។ ប្រធានាធិបតី អូបាម៉ា បានអួតសរសើរ អំពីសមត្ថភាពរបស់លោក Brennan ក្នុងសកម្មភាពប្រយុទ្ធប្រឆាំង ជាមួយក្រុមភេរវករ អាល់កៃដា កំចាត់បាន មេដឹកនាំសំខាន់ៗ នៃចលនាអាល់កៃដា បានច្រើនរូប។
លោក Jonh Brennan ធ្លាប់ធ្វើជា ប្រធានការិយាល័យ របស់មេដឹកនាំ CIA ពីឆ្នាំ ១៩៩៩ ដល់ឆ្នាំ ២០០១ និងជា ប្រធានមជ្ឈមណ្ឌលជាតិអាមេរិក ប្រឆាំងអំពើភេរវកម្ម ពីឆ្នាំ២០០៤ ដល់ ២០០៥។
ការជ្រើសយក Jonh Brennan ជាមេដឹកនាំ CIA ធ្វើអោយលោក Brennan ទទួលនូវសំណាងជាថ្មីឡើងវិញ ព្រោះថា បេក្ខភាពលោក នៅ CIA កាលពីឆ្នាំ ២០០៩ បានទទួលបរាជ័យម្តងមកហើយ ដោយសារតែ មានការបរិហារថា លោកបានគាំទ្រដោយដាក់ទារុណកម្មដើម្បីសួរចំលើយ។ កាលនោះ លោក Brennan ធ្វើការនៅក្រោមអណ្ណត្តិគ្រប់គ្រងរបស់ ប្រធាធិបតី George W Bush។
ក្នុងការបោះឆ្នោតជ្រើសប្រធានាធិបតីអាមេរិក ឆ្នាំ២០០៨ លោក Brennan ជាអ្នកគាំទ្របេក្ខភាព របស់ប្រធានាធិបតី អូបាម៉ា។ បន្ទាប់ពីក្លាយជាទីប្រឹក្សារបស់ ប្រធានាធិបតី អាមេរិកមក Jonh Brennan ផ្តោតការងារសំខាន់ ទៅលើគំរោងវាយប្រហារដោយយន្តហោះដ្រូន ដែលជាយន្តហោះគ្មានមនុស្សបើក នៅក្នុងប្រទេស អាហ្កានីស្ថាន ប៉ាគីស្ថាន និងយេម៉េន។ គំរោងវាយប្រហារនេះ ត្រូវបានប្រធានាធិបតី អូបាម៉ា បង្កើនអោយមានឡើង មួយជាដប់ ដើម្បីបង្ក្រាបសកម្មភាពភេរវកម្ម។
លោកអូបាម៉ា បានសុំអោយព្រឹទ្ធិសភាអាមេរិក អនុម័តជំរើសលោក Brennan ជាមេដឹកនាំCIA អោយបានចូលជាផ្លូវការ បានឆាប់រហ័ស ដើម្បីអោយប្រជាជនអាមេរិក បានបន្តជីវភាពរស់នៅ ប្រកបដោយសុវត្ថិភាពល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ