វ៉ាស៊ីនតោន៖លោកJohn Kerry សមាជិកព្រឹទ្ធសភាជ្រើសរើសបន្តដំណែងពីលោកស្រីហ៊ីឡារីក្លីនតុន
លោកប្រធានាធិបតីសហរដ្ឋអាមេរិកបារ៉ាក អូបាម៉ា បានជ្រើសតាំងលោក John Kerry សមាជិកព្រឹទ្ធសភាជាអ្នកស្នងបន្តពីលោកស្រីហ៊ីឡារី គ្លីនតុន(Hillary Clinton)ក្នុងមុខតំណែងជារដ្ឋមន្ត្រីក្រសួងការបរទេសអាមេរិក-នេះបើយោងតាមការជូនដំណឹងនៃបណ្តាញទូរទស្សន៍អាមេរិកាំង CNN និង ABC។ ដើម្បីសង្កត់បន្ថែមលើព័ត៌មានរបស់ខ្លួន CNN បានដកស្រង់ពាក្យសំដីរបស់សមាជិកម្នាក់នៃបក្សប្រជាធិបតេយ្យអាមេរិកដែលបានលើកនិយាយពីឈ្មោះលោក John Kerry។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
បច្ចុប្បន្នជាសមាជិកព្រឹទ្ធសភានៃរដ្ឋ Massachusetts លោកJohn Kerry ក៏ជាបេក្ខជនអភ័ព្វក្នងការបោះឆ្នោតប្រធានាធិបតីអាមេរិកនៅ ឆ្នាំ២០០៤ ប្រជែងទល់នឹងលោក George W.Bush ។ លោកJohn Kerry ដែល ជាវិរជនបំពាក់ដោយគ្រឿងឥស្សរិយយសនៅក្នុងសង្គ្រាមវៀតណាម មុននឹងក្លាយជាសកម្មជនប្រឆាំងនឹងសង្គ្រាម បានចូលដល់អាយុ៦៩ឆ្នាំហើយចាប់តាំងពីថ្ងៃ១១ធ្នូកន្លងមកនេះ។
ជាប្រធាននៃគណកម្មការទទួលបន្ទុកកិច្ចការបរទេសដ៏មានអនុភាពចាប់តាំងពី៤ឆ្នាំកន្លងមកនៅក្នុងព្រឹទ្ធសភាអាមេរិក ជាទីដែលលោកបានស្នងដំណែងពីលោកJoe Biden បច្ចុប្បន្នជាអនុប្រធានាធិបតីអាមេរិកាំងលោកJohn Kerry ត្រូវបានគេចាត់ទុកថាជាឥស្សរជននយោបាយមួយរូបដ៏មានប្រជាប្រិយភាពសំរាប់ការស្នងតំណែងជាប្រមុខការទូតនៃមហាអំណាចទីមួយក្នុងពិភពលោក ក្រោយពីការបដិសេធរបស់លោកស្រីស៊ូសាន រ៉ៃស៍(Susan Rice)នៅក្នុងសប្តាហ៍នេះ។ លោកស្រី Rice ដែលជា ឯកអគ្គរដ្ឋទូតអាមេរិកប្រចាំអសបបានដកបេក្ខភាពរបស់ខ្លួនដោយហេតុតែមានរឿងរ៉ាវដ៏ចម្រូងចម្រាសជាមួយបក្សសាធារណរដ្ឋ។
ប្រកបដោយបទពិសោធន៍ច្រើននៅក្នុងសភាអាមេរិកាំង លោក John Kerry ត្រូវបានគេវាយតម្លៃ ថា ជាបេក្ខជនមួយរូបដែលមានគេគាំទ្រច្រើនជាងលោកស្រី Susan Rice នៅក្នុងការបន្តស្នងពីលោកស្រីហ៊ីឡារីក្លីនតុន។ ចំណែក លោកស្រីក្លីនតុនដែលបានដឹកនាំការទូតអាមេរិកយ៉ាងពេញទំហឹងតាំងពីរយៈពេល៤ឆ្នាំកន្លងមកហើយនោះ បានថ្លែងថា លោកស្រីចង់សំរាកដើម្បីរយាលពីការងារបន្តិច បើទោះបីជាឈ្មោះរបស់លោកស្រីត្រូវបានគេនិយាយពេញបបូរមាត់នៅទីក្រុងវ៉ាស៊ីតោនថា លោកស្រីក្លីនតុនប្រហែលជានឹងអាចឈរឈ្មោះជាបេក្ខជនប្រធានាធិបតីអាមេរិកជាយថាហេតុនៅក្នុងឆ្នាំ២០១៦ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ