អាហ្វហ្កានីស្ថានរបស់តាលីបង់គំរាមសងសឹកប៉ាគីស្ថាន
ស្ថានការណ៍នៅព្រំដែនអាហ្វហ្កានីស្ថាន និងប៉ាគីស្ថានឡើងតានតឹងខ្លាំង នៅថ្ងៃចន្ទនេះ បន្ទាប់ពី ពួកតាលីបង់អាហ្វហ្កានីស្ថានគំរាមថា នឹងសងសឹកប៉ាគីស្ថានដែលបានបញ្ជូនដ្រូន និងយន្តហោះចម្បាំងមកវាយប្រហារក្នុងទឹកដីអាហ្វហ្កានីស្ថាន។ តាមអ្នកនាំពាក្យរបស់រដ្ឋាភិបាលតាលីបង់ មនុស្ស៨នាក់ ដែលសុទ្ធសឹងជាស្រ្តី និងកុមារស្លាប់នៅក្នុងការវាយប្រហារផ្លូវអាកាសរបស់ប៉ាគីស្ថាន កាលពីយប់ថ្ងៃអាទិត្យម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
រដ្ឋាភិបាលតាលីបង់ដំឡើងសំឡេងថ្កោលទោសដាច់ណាត់ ការវាយប្រហារផ្លូវអាកាសរបស់ប៉ាគីស្ថានទៅលើខេត្តPaktika របស់អាហ្វហ្កានីស្ថាន កាលពីយប់ថ្ងៃអាទិត្យទី ១៧ មីនា។ សម្រាប់អ្នកនាំពាក្យរដ្ឋាភិបាលតាលីបង់ ដោយវាយប្រហារចូលក្នុងទឹកដីអាហ្វហ្កានីស្ថាន និងសម្លាប់ប្រជាជនស៊ីវិល៨នាក់ ប៉ាគីស្ថានកំពុងរំលោភយ៉ាងច្បាស់ក្រឡែត ដែនអធិបតេយ្យភាពរបស់អាហ្វហ្កានីស្ថាន។
អ្នកនាំពាក្យរបស់តាលីបង់បានព្រមានប៉ាគីស្ថានពីផលវិបាកធ្ងន់ធ្ងរ ដែលប៉ាគីស្ថានមិនអាចគ្រប់គ្រងទប់ទល់បាន ប៉ុន្តែមិនបានលម្អិតថា តើតាលីបង់នឹងចាត់វិធានការសងសឹកប៉ាគីស្ថានក្នុងទម្រង់ណានោះទេ។ អ្នកនាំពាក្យខាងលើគ្រាន់តែអំពាវនាវឲ្យប្រជាជន និងរដ្ឋាភិបាលស៊ីវិលទើបជាប់ឆ្នោតថ្មីរបស់ប៉ាគីស្ថានប្រុងប្រយ័ត្ន កុំប្រគល់អំណាចឲ្យក្រុមយោធាប៉ាគីស្ថានធ្វើអ្វីផ្តេសផ្តាស បំផ្លាញទំនាក់ទំនងប្រទេសជិតខាង ដែលកាន់សាសនាអ៊ីស្លាមដូចគ្នា។
ប៉ាគីស្ថាននិងអាហ្វហ្កានីស្ថានតានតឹងដាក់គ្នានៅព្រំដែនមិនមែនជារឿងថ្មី ប៉ុន្តែ វាកាន់តែកើនឡើងញឹកញាប់ គិតចាប់តាំងពីក្រុមតាលីបង់ឈ្នះសង្រ្គាម វិលត្រលប់មកកាន់អំណាចសាជាថ្មីនៅអាហ្វហ្កានីស្ថាន។ ប៉ាគីស្ថានរមែងចោទតាលីបង់ថា បានលួចលាក់ផ្តល់ជំរកដល់ក្រុមប្រដាប់អាវុធ ដូចជា ក្រុមតាលីបង់ប៉ាគីស្ថានTTP ជាដើម ដែលរៀបចំផែនការវាយប្រហារប៉ាគីស្ថាន តាំងពីទឹកដីអាហ្វហ្កានីស្ថាន។
ម្យ៉ាង ការវាយប្រហារផ្លូវអាកាសរបស់ប៉ាគីស្ថាន ទៅលើទឹកដីអាហ្វហ្កានីស្ថានធ្វើឡើង នៅតែ២ថ្ងៃក្រោយដែលក្រុមខ្មាន់កាំភ្លើងចូលទៅបាញ់សម្លាប់ទាហានប៉ាគីស្ថាន ៧នាក់ នៅប៉ុស្តិយាមព្រំដែនជាមួយអាហ្វហ្កានីស្ថាន។ នាយករដ្ឋមន្រ្តីថ្មីរបស់ប៉ាគីស្ថាន លោកAsif Ali Zardari ថ្កោលទោសសកម្មភាពភេរវនិយម និងសន្យាចាត់វិធានការក្តៅសងសឹកវិញ មិនថា ក្រុមនេះរត់ជ្រកលាក់ខ្លួន ទៅដល់កន្លៀតណា។
រដ្ឋាភិបាលតាលីបង់តែងបដិសេធរហូតមកថា ខ្លួនគ្មានជាប់ពាក់ព័ន្ធ ផ្តល់ជំរកដល់ក្រុមប្រដាប់អាវុធបរទេស ដើម្បីប្រើទឹកដីអាហ្វហ្កានីស្ថានវាយប្រហារប្រទេសជិតខាងរបស់អាហ្វហ្កានីស្ថានដាច់ខាត។
ការអះអាងរបស់ពួកតាលីបង់មានតែនៅមាត់ ព្រោះថា នៅស្ថានភាពជាក់ស្តែង ក្រុមតាលីបង់ប៉ាគីស្ថាន TTP បានបុកគ្រឹះឈរជើងនៅក្នុងទឹកដីអាហ្វហ្កានីស្ថាន តាមបណ្តោយជាប់ព្រំដែនប៉ាគីស្ថាន។ ក្រុមនេះបានពង្រឹង បង្កើនកម្លាំងរបស់ខ្លួន ចាប់តាំងពីពួកតាលីបង់ត្រលប់មកកាន់អំណាចនៅអាហ្វហ្កានីស្ថាន។ នៅថ្ងៃចន្ទ ក្រុមតាលីបង់ប៉ាគីស្ថាន បានចេញសេចក្តីថ្លែងការណ៍របស់ខ្លួនថា យន្តហោះចម្បាំងប៉ាគីស្ថាន កាលពីថ្ងៃចន្ទ គ្មានទិសដៅវាយប្រហារក្រុមតាលីបង់ប៉ាគីស្ថាន ប៉ុន្តែ ផ្ទះអ្នកភូមិ។
នៅឆ្នាំ ២០២២ ក្រុមតាលីបង់ធ្លាប់ចោទប៉ាគីស្ថានម្តងហើយ នៅពេល ការវាយប្រហាររបស់ឧទ្ធម្ភាគចក្រប៉ាគីស្ថាននៅក្នុងទឹកដីអាហ្វហ្កានីស្ថាន សម្លាប់ប្រជាជនអាហ្វហ្កានីស្ថាន ៤៧នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ