វៀតណាមប្រារព្ធខួប៧០ឆ្នាំនៃជ័យជំនះឌៀនបៀនភូ ដោយអញ្ជើញបារាំង ជាលើកទីមួយ
នៅថ្ងៃទី៧ឧសភា២០២៤នេះ វៀតណាមបានប្រារព្វខួប៧០ឆ្នាំនៃជ័យជំនះនៅលើសមរភូមិឌៀនបៀនភូ ក្រោមនិម្មិតរូបនៃការផ្សះផ្សា ដោយបានអញ្ជើញបារាំងជាលើកទីមួយ ឱ្យចូលរួម។ ជ័យជំនះនៅឌៀនបៀនភូ បាននាំវៀតណាមឱ្យបានទទួលឯករាជ្យ តែជាបរាជ័យដ៏ជូរចត់បំផុតរបស់បារាំង និងការបិទបញ្ចប់វត្តមានបារាំងនៅឥណ្ឌូចិន។ រដ្ឋមន្ត្រីក្រសួងការពារជាតិបារាំង បានអញ្ជើញចូលរួមជាភ្ញៀវកិត្តិយសក្នុងពិធីដង្ហែក្បួនព្យុះហយាត្រាផង និងទៅគោរពវិញ្ញាណក្ខន្ធទាហានបារាំងនៅឌៀនបៀនភូផ្ទាល់តែម្តងផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ពិធីប្រារព្វខួប៧០ឆ្នាំនៃជ័យជំនះឌៀនបៀនភូ ថ្ងៃទី៧ឧសភា១៩៥៤-២០២៤ បានប្រព្រឹត្តទៅអស់រយៈពេលជិតពីរម៉ោង ដោយមានអ្នកចូលរួមជាង១២០០០នាក់។ កងទ័ព ក្រុមពន្លត់អគ្គិភ័យ និងសមាសភាពសង្គមនៃរបបកុម្មុយនិស្ត ដូចជាបុគ្គលិករដ្ឋការ បញ្ញាវន្ត កសិករ ស្ត្រី ឬជនជាតិភាគតិច ។ល។ បាននាំគ្នាដើរដង្ហែក្បួនព្យុះហយាត្រា នៅក្នុងស្តាត និងតាមដងផ្លូវក្នុងរដ្ឋធានី ក្រោមស្នូរអបអរទះដៃ គ្រវីទង់ជាតិ របស់ប្រជាពលរដ្ឋនិងទេសចរ។
រៀបចំធំជារៀងរាល់១០ឆ្នាំម្តង ដោយមានបង្អួតកម្លាំងយោធា អមដោយឧទ្ធម្ភាគចក្រ និង ការបាញ់កាំភ្លើងធំជាច្រើនគ្រាប់ផង ឆ្នាំនេះជាលើកទីមួយ វៀតណាមបានអញ្ជើញសមាជិករដ្ឋាភិបាលបារាំង និងអតីតយុទ្ធជនបារាំងបីរូមមកចូលរួម។ វត្តមានរបស់លោករដ្ឋមន្ត្រីក្រសួងការពារជាតិ សេបាជៀង ឡឺក័រនុយ និងរដ្ឋលេខាធិការទទួលបន្ទុកអតីតយុទ្ធជន ជាសាក្សីបញ្ជាក់អំពីការផ្សះផ្សាគ្នាដើម្បីផលប្រយោជន៍យុទ្ធសាស្ត្ររួម។ ធ្លាប់មានសង្គ្រាមនឹងគ្នា ទំនាក់ទំនងរវាងបារាំងវៀតណាម បានប្រសើរឡើងនាពេលបច្ចុប្បន្ន។ បើទោះបីជានៅមានចំណុចខ្ទាស់ខ្លះជុំវិញបញ្ហាសិទ្ធិមនុស្សក៏ដោយ ក៏បារាំងចាំបាច់ត្រូវរឹតចំណងជាមួយវៀតណាម ដើម្បីប្រឈមនឹងចិន។
“សមរភូមិឌៀនបៀនភូដែលនាំដល់ការបិទបញ្ចប់របបអាណានិគមនិយមបារាំងជិតមួយសតវត្សរ៍នៅឥណ្ឌូចិន ជាជោគជ័យនៃយុត្តិធម៌” នេះជាសេចក្តីប្រកាសរបស់លោកនាយករដ្ឋមន្ត្រីវៀតណាម នៅក្នុងសុន្ទរកថាបើកកម្មវិធី ដោយបន្ថែមថា មានយុទ្ធជនពលីមិនស្គាល់អត្តសញ្ញាណជាច្រើន បានបង្ហូរឈាមនៅសមរភូមិប៉ែកពាយ័ព្យនៃប្រទេស ដើម្បីសុភមង្គលរបស់យើងនាពេលបច្ចុប្បន្ន។
សូមរំឮកថា ឌៀនបៀនភូ ដែលមានស្ថានភាពភូមិសាស្ត្រព័ទ្ធជុំវិញដោយភ្នំ ប្រៀបដូចជាបាតខ្ទះ ជានិម្មិតរូបនៃជោគជ័យជាប្រវត្តិសាស្ត្ររបស់ឥស្សរជនកុម្មុយនិស្តដឹកនាំដោយលោកហូជីមិញ និងជាតំណាងបរាជ័យដ៏ជូរចត់បំផុតសម្រាប់ភាគីបារាំង។ បន្ទាយយោធាបារាំងនៅឌៀនបៀនភូបានរលំនៅថ្ងៃទី ៧ឧសភាឆ្នាំ១៩៥៤ បន្ទាប់ពីមានការប្រយុទ្ធតស៊ូ ក្រាញននៀលរបស់យុទ្ធជាតិនិយមវៀតណាម រយៈពេល៥៦ថ្ងៃ ស្លាប់និងបាត់បង់ជីវិតមនុស្សអស់យ៉ាងហោច ១៣០០០នាក់ ក្នុងនោះ១ម៉ឺននាក់ខាងវៀតណាម។ កាលណោះ បារាំងដែលមានកម្លាំងច្រើនដល់ប្រមាណ១៥០០០នាក់ មើលស្រាលកម្លាំងសត្រូវដោយអាងលើទីតាំងភូមិសាស្ត្រទើបត្រូវបរាជ័យ។ បែកឌៀនបៀនភូ បារាំងបានព្រមចុះកិច្ចព្រមព្រៀង ថ្ងៃ២១កក្កដា១៩៥៤ នៅទីក្រុងហ្សឺណែវ បញ្ចប់របបអាណានិគនិយមបារាំងនៅឥណ្ឌូចិន។ នៅថ្ងៃទី ៦ឧសភា ម្សិលមិញ រដ្ឋមន្ត្រីក្រសួងការពារជាតិបារាំង បានអញ្ជើញទៅគោរពវិញ្ញណក្ខន្ធយុទ្ធជនពលីវៀតណាមនិងបារាំង ដាច់ដោយឡែកពីគ្នានៅឌៀនបៀនភូ។ លោក ហ្វ្រង់ស័រមីតេរ៉ង់ ជាអតីតប្រធានាធិបតីបារាំងកំពុងកាន់តំណែងតែម្នាក់គត់ដែលអញ្ជើញទៅទស្សនាឌៀនបៀនភូ នៅឆ្នាំ១៩៩៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ