ល្បីខាងពុករលួយ Asif Ali Zardari ក្លាយជាប្រធានាធិបតីប៉ាគីស្ថានជាលើកទីពីរ
មួយខែក្រោយការបោះឆ្នោតសភាដ៏ចម្រូងចម្រាស ដែលជាប់សង្ស័យដោយការលួចបន្លំ ប៉ាគីស្ថានមានប្រមុខរដ្ឋាភិបាលថ្មីនិងប្រធានាធិបតីថ្មី។ លោក អាស៊ីហ្វ អាលី ហ្សារដារី ស្វាមីអតីតនាយករដ្ឋមន្ត្រីភេទស្រ្តីដំបូងរបស់ប៉ាគីស្ថាន បានត្រូវសភាបោះឆ្នោតជ្រើសតាំងនៅថ្ងៃសៅរ៍ទី ៩មីនានេះ ជាប្រធានាធិបតីប៉ាគីស្ថាន ជាលើកទីពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
សម្រាប់ក្រសែភ្នែកសាធារណជន និងសារព័ត៌មានប៉ាគីស្ថាន លោកអាស៊ីហ្វ អាលី ហ្សារដារី ជាប្រមុខដឹកនាំដ៏ពុករលួយធ្លាប់ជាប់ពន្ធនាគារដល់ទៅ១១ឆ្នាំ រហូតមានរហ័សនាមថា “លោក១០%” ព្រោះតែធ្លាប់ជាប់ចោទស៊ីកុំមីស្យុងពីទីផ្សាររដ្ឋ កាលនៅជារដ្ឋមន្ត្រីវិនិយោគនៃរដ្ឋាភិបាលដឹកនាំដោយលោកស្រី ប៊ូតូ ជាភរិយា ក្នុងទសវត្សរ៍ឆ្នាំ១៩៩០។ តែសម្រាប់មតិសាធារណៈមួយក្រុមទៀត លោក ហ្សារដារី ជាអ្នកនយោបាយដ៏ប៉ិនប្រសព្វដែលទទួលស្គាល់ដោយគូប្រជែងផង គឺសមត្ថភាពសម្រុះសម្រួល ចងសម្ព័ន្ធ និងសមត្ថភាពអាចស្ទុះហក់ឡើងវិញក្នុងឆាកនយោបាយ។
លោកហ្សារដារី ធ្លាប់ជាប្រមុខរដ្ឋប៉ាគីស្ថានស៊ីវិលទីមួយ ពីឆ្នាំ២០០៨ដល់២០១៣។ ក្នុងអាណត្តិទីមួយរបស់លោក ប៉ាគីស្ថានបានរងភេរវកម្មមរណៈជាច្រើនរបស់ពួកតាលីបង់ និងការកម្ចាត់មេតាលីបង់ អ៊ូសាម៉ាបិនឡាដិន ព្រមទាំងវិបត្តិថាមពលដែលបានពន្យឺតកំណើនសេដ្ឋកិច្ច តែលោកអាចសម្រេចធ្វើវិសោធនកម្មរដ្ឋធម្មនុញ្ញផ្ទេរអំណាចប្រធានាធិបតីខ្លះទៅឱ្យប្រធានសភានិងពង្រឹងអំណាចនាយករដ្ឋមន្ត្រី។
ថ្វីបើជាតួនាទីជាកិត្តិយសមែនតែលោកប្រធានាធិបតី អាស៊ីហ្វ អាលី ហ្សារដារី នៅតែបន្តទាញខ្សែញាក់ខាងក្រោយឆាក និងរហូតទាល់តែគណបក្សសម្ព័ន្ធអ៊ីស្លាមប៉ាគីស្ថានរបស់លោកណាវ៉ា ស្ហារីហ្វ បានជោគជ័យ។
ថ្ងៃនេះ ក្នុងវ័យ៦៨ឆ្នាំ លោក អាស៊ីហ្វ អាលី ហ្សារដារី បានក្លាយជាប្រធានាធិបតីប៉ាគីស្ថាន ជាលើកទីពីរ ដោយសារតែការចងសម្ព័ន្ធភាពរវាងគណបក្សប្រជាជនប៉ាគីស្ថាន ដឹកនាំដោយរូបលោកផ្ទាល់និងកូនប្រុស Bilawal Bhutto Zardari ជាមួយគណបក្សសម្ព័ន្ធអ៊ីស្លាមប៉ាគីស្ថានជាគូប្រជែង ដែលកំពុងដឹកនាំរដ្ឋាភិបាលនៅប៉ាគីស្ថាន។ កាលពីថ្ងៃអាទិត្យសប្តាហ៍មុន បន្ទាប់ពីមានការតវ៉ានឹងលទ្ធផលបោះឆ្នោតសភាយ៉ាងចម្រូងចម្រាសមក សភាប៉ាគីស្ថាន បានបោះឆ្នោតតែងតាំងលោក ស្ហេបា ស្ហារីហ្វ អាយុ៧២ឆ្នាំជានាយករដ្ឋមន្ត្រី។ ជាប្អូនអតីតនាយករដ្ឋមន្ត្រីលោកណាវ៉ា ស្ហារីហ្វ លោក ស្ហេបា ស្ហារីហ្វ ក៏ធ្លាប់ដឹកនាំរដ្ឋាភិបាលម្តងកាលពីខែមេសា២០២២ដល់ខែសីហា២០២៣។ ចំណែកលោក អ៊ីរ៉ាន់ខាន់ ដែលមិនអាចឈរឈ្មោះបោះឆ្នោត បេក្ខជនឯករាជ្យរបស់បក្សជាច្រើនបានចូលកាន់អាសនៈនៅក្នុងសភា។ ប៉ុន្តែទោះគ្មានសង្ឃឹមឈ្នះក៏ដោយ ក៏គណបក្សនៅតែបន្តប្តឹងតវ៉ាទៅតុលាការថាមានការលួចបន្លំសន្លឹកឆ្នោតដ៏សន្ធឹកសន្ធាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ