ហេតុអ្វីអ៊ីរ៉ង់បើកការវាយប្រហារទៅលើទឹកដីប្រទេសជិតខាងខ្លួននៅពេលនេះ?
បន្ទាប់ពី អ៊ីរ៉ាក់ និងស៊ីរី កងទ័ពអ៊ីរ៉ង់បើកការវាយប្រហារលើទឹកដីប្រទេសជិតខាងរបស់ខ្លួនមួយទៀត គឺប៉ាគីស្ថាន ដែលជាហេតុធ្វើឲ្យប៉ាគីស្ថានធ្វើការវាយបកវិញ នៅថ្ងៃព្រហស្បតិ៍។ ការវាយប្រហារផ្លូវអាកាសរបស់ប៉ាគីស្ថានទៅលើទឹកដីភាគអាគ្នេយ៍របស់អ៊ីរ៉ង់ ជាប់ព្រំដែនប៉ាគីស្ថាន បានសម្លាប់មនុស្ស៩នាក់។ ការផ្ទុះអាវុធនៅព្រំដែនអ៊ីរ៉ង់ និងប៉ាគីស្ថាន ធ្លាប់កើតមានពីមុនមក។ ទោះសំអាងហេតុផលដៅវាយប្រហារក្រុមភេរវនិយម ប៉ុន្តែ ភាពតានតឹងផ្នែកយោធារវាងប៉ាគីស្ថាន និងអ៊ីរ៉ង់ អាចជាចំហាយនៃសង្រ្គាមអ៊ីស្រាអែលនៅហ្កាហ្សា ហើយនិងប្រតិបត្តិការយោធារបស់អាមេរិក ទៅលើក្រុមហ៊ូទី យេម៉ែន នៅសមុទ្រក្រហម។
ចុះផ្សាយនៅថ្ងៃ៖
ស្តាប់ - ០៤:១០
ប៉ាគីស្ថាន និងអ៊ីរ៉ង់យល់ព្រមព្រៀងគ្នាដើម្បីបន្ថយវិបត្តិក្តៅងំ បន្ទាប់ពីប្រទេសជិតខាងទាំងពីរបើកការវាយប្រហារផ្លូវអាកាសលើគ្នាទៅវិញ ទៅមក នៅសប្តាហ៍នេះ។ តាមសេចក្តីប្រកាសរបស់ក្រសួងការបរទេសប៉ាគីស្ថាន នៅក្នុងកិច្ចសន្ទនាតាមទូរស័ព្ទ នៅថ្ងៃសុក្រ ប្រមុខការទូត អ៊ីរ៉ង់ និងប៉ាគីស្ថានសន្យាសហការគ្នាគ្រប់កម្រិត ដើម្បីបន្ថយភាពតានតឹង ការប្រឈមមុខផ្នែកអាវុធរវាងប្រទេសទាំងពីរ។
ភាពធូរស្រាលក្នុងផ្នែកការទូត ប៉ុន្តែ នៅលើទីតាំងជាក់ស្តែង អ៊ីរ៉ង់ នៅថ្ងៃព្រហស្បតិ៍ និងថ្ងៃសុក្រទី ១៩មករា បានបង្ហាញសាច់ដុំយោធា តាមរយៈ ការធ្វើសមយុទ្ធផ្លូវអាកាស នៅតាមខេត្តជាប់មាត់សមុទ្រ និងខេត្តជាប់ព្រំដែនអ៊ីរ៉ង់ បាគីស្ថាន។
តាមអ្នកនាំពាក្យរបស់កងទ័ពអ៊ីរ៉ង់ នៅក្នុងសមយុទ្ធ កងទ័ពអ៊ីរ៉ង់ បានហាត់សមប្រើដោយជោគជ័យ វិធីសាស្រ្តការពារពីការវាយប្រហារផ្លូវអាកាសរបស់សត្រូវ។ ជាក់ស្តែង ប្រព័ន្ធការពារដែនអាកាស ភាគច្រើនជាដ្រូនដែលគេពង្រាយនៅតាមបណ្តោយឆ្នេរសមុទ្រភាគខាងត្បូងប្រទេស បានបាញ់ស្ទាក់បំផ្លាញគ្រប់គ្រាប់ដែលមានគោលដៅវាយប្រហារទឹកដីអ៊ីរ៉ង់។
សមយុទ្ធយោធារបស់អ៊ីរ៉ង់កើតឡើងក្នុងកាលវេលាដែល ប៉ាគីស្ថានបញ្ជូនដ្រូនទៅទម្លាក់គ្រាប់សម្លាប់មនុស្ស៩នាក់ ក្នុងទឹកដី អ៊ីរ៉ង់ ភាគអាគ្នេយ៍។
តាមទីភ្នាក់ងារព័ត៌មានរដ្ឋអ៊ីរ៉ង់ IRNA ដ្រូន៤គ្រឿងបានបាញ់បំផ្លាញផ្ទះ៤ខ្នង និងសម្លាប់មនុស្ស៩នាក់ដែលភាគច្រើនជាជនជាតិបាគីស្ថាន។ អាជ្ញាធរអ៊ីរ៉ង់អះអាងថា គេកំពុងស៊ើបអង្កេត ដើម្បីដឹងថា ហេតុអ្វីបានជាមានជនជាតិប៉ាគីស្ថាន រស់នៅក្នុងភូមិក្នុងទឹកដីអ៊ីរ៉ង់ ដែលរងការវាយប្រហាររបស់ប៉ាគីស្ថានកាលពីថ្ងៃព្រហស្បតិ៍។
ជាផ្លូវការ ប៉ាគីស្ថានលើកហេតុផលខ្លួនថា មានគោលដៅវាយប្រហារពួកឧទ្ទាមភេរវនិយម បះបោរ ដូចជាក្រុមរណសិរ្សរំដោះ បាលូស៊ីស្តង់ ដែលជ្រកលាក់ខ្លួនក្នុងទឹកដីអ៊ីរ៉ង់ ប៉ុន្តែ តែងលួចវាយប្រហារទៅលើកងកម្លាំងប្រដាប់អាវុធ ប៉ាគីស្ថាន។ ប៉ុន្តែ ចង់មិនចង់ គេដឹងថា ប៉ាគីស្ថានបើកការវាយប្រហារផ្លូវអាកាស ទៅលើទឹកដីអ៊ីរ៉ង់ ដើម្បីសងសឹកនឹងអ៊ីរ៉ង់ ដែលបានបាញ់មីស៊ីលរំលោភចូលទឹកដីប៉ាគីស្ថាន កាលពីថ្ងៃអង្គារ។ អ៊ីរ៉ង់ អះអាងថា ការវាយប្រហារដ្រូន និងមីស៊ីលរបស់ខ្លួនមានគោលដៅកម្ចាត់ក្រុមភេរវនិយម (ចលនាប្រដាប់អាវុធនិកាយស៊ូនីត) ក្នុងទឹកដីប៉ាគីស្ថាន ដែលជ្រៀតខ្លួនចូលទៅធ្វើសកម្មភាពហិង្សាសម្លាប់មនុស្សក្នុងទឹកដីអ៊ីរ៉ង់។
រហូតមក ភាគីម្ខាងៗ អ៊ីរ៉ង់ និងប៉ាគីស្ថានធ្លាប់ចោទដាក់គ្នាទៅវិញ ទៅមក ថាបានផ្តល់ជំរកដល់ក្រុមឧទ្ទាមបំបែកទឹកដី ឬក្រុមប្រឆាំងរៀងៗខ្លួន។ កងទ័ពប៉ាគីស្ថានតែងជាប់ដៃប្រយុទ្ធជាមួយពួកឧទ្ទាមបំបែកទឹកដី បាលូស៊ីស្តង់ ដែលប៉ាគីស្ថានវាយប្រហារនៅថ្ងៃព្រហស្បតិ៍។ ចំណែក កម្លាំងប្រដាប់អាវុធអ៊ីរ៉ង់តែងវាយប្រហារលើក្រុមជីហាតនិកាយស៊ូនីត ក្នុងទឹកដីប៉ាគីស្ថាន។ គេអាចនិយាយថា ជម្លោះប្រដាប់អាវុធនៅព្រំដែនប្រទេសជិតខាងទាំងពីរមិនមែនជារឿងថ្មី។ ប៉ាគីស្ថានផ្ទាល់មិនរករឿងអ្វីទេ នៅពេលអ៊ីរ៉ង់ ចាត់វិធានការលើក្រុមជីហាតនៅប៉ាគីស្ថាន។ ប៉ុន្តែ អ្វីដែលថ្មីលើកនេះ គឺអ៊ីរ៉ង់បើកការវាយប្រហារលើកនេះ ដោយមិនបានសុំការអនុញ្ញាត ជូនដំណឹងជាមុនទៅភាគីប៉ាគីស្ថាន។
នៅមួយរយៈចុងក្រោយនេះ ពោលគឺនៅក្នុងផ្ទៃជម្លោះប្រដាប់អាវុធ នៅតំបន់ដើមបូព៌ា ដោយសារសង្រ្គាមហ្កាហ្សា អ៊ីរ៉ង់បើកការវាយប្រហារផ្លូវអាកាសទៅលើប្រទេសស៊ីរី អ៊ីរ៉ាក់ និងចុងក្រោយនេះ គឺប៉ាគីស្ថាននៅក្នុងហេតុផលដៅវាយប្រហារក្រុមភេរវនិយម ដូចជាក្រុមជីហាតរដ្ឋអ៊ីស្លាមជាដើម ដែលបានដាក់គ្រាប់បែកសម្លាប់ពលរដ្ឋអ៊ីរ៉ង់ ជាង៩០នាក់ នៅដើមខែមករានេះ។
ប៉ុន្តែ យោងតាមអ្នកជំនាញ ដោយប្រើដ្រូន បាញ់មីស៊ីលបាលីស្ទិកវាយប្រហារគោលដៅនៅស៊ីរី អ៊ីរ៉ាក់ និងប៉ាគីស្ថាន អ៊ីរ៉ង់ចង់បង្ហាញសមត្ថភាពយោធារបស់ខ្លួន នៅក្នុងកាលៈទេសៈដែលគ្នីគ្នារបស់អ៊ីរ៉ង់ ដូចជាពួកហាម៉ាស ក្រុមហេសបូឡា កំពុងក្លាយជាផ្ទាំងស៊ីបវាយប្រហាររបស់អ៊ីស្រាអែល ចំណែកក្រុមហ៊ូទីយេម៉ែនកំពុងត្រូវអាមេរិកនិងសម្ព័ន្ធមិត្តវាយប្រហារ នៅសមុទ្រក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ