ប៉ាគីស្ថានបើកការវាយប្រហារលើអ៊ីរ៉ង់វិញ ក្រោមហេតុផលកម្ចាត់ក្រុមភេរវនិយម
ពីរថ្ងៃក្រោយការបាញ់ប្រហាររបស់អ៊ីរ៉ង់រំលោភចូលទឹកដីប៉ាគីស្ថាន ក្រុងអ៊ីស្លាម៉ាបាដ បានប្រកាសនៅថ្ងៃព្រហស្បតិ៍ទី ១៨មករា២០២៤នេះ វាយប្រហារលើអ៊ីរ៉ង់វិញ ដោយដៅលើជម្រករបស់ពួកភេរវនិយម ក្នុងទឹកដីអ៊ីរ៉ង់។ មានស្លាប់យ៉ាងហោចណាស់៩នាក់ ក្នុងនោះបួនាក់ជាក្មេងនិងពីរជាស្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅព្រហាមថ្ងៃព្រហស្បតិ៍នេះ ប៉ាគីស្ថានបានបើកការវាយប្រហារដោយមានកិច្ចសហការសម្របសម្រួលខ្ពស់ និងការកំណត់ចំណុចដៅជាពិសេសនិងយ៉ាងច្បាស់លាស់ កម្ចាត់ជម្រករបស់ពួកភេរវនិយមលាក់ខ្លួននៅក្នុងខេត្តSistan -Balouchistan ក្នុងដែនដីប៉ែកអាគ្នេយ៍របស់អ៊ីរ៉ង់។ នេះបើតាមសេចក្តីថ្លែងការណ៍របស់ក្រសួងការបរទេសប៉ាគីស្ថាន ដោយបញ្ជាក់ថា មានភេរវជនជាច្រើននាក់បានស្លាប់។
អាជ្ញាធរប៉ាគីស្ថានបានអះអាងទៀត ខេត្តស៊ីស្តង់បាលូស៊ីស្តង់ ជាតំបន់ដែលនៅក្រៅការគ្រប់គ្រងរបស់រដ្ឋាភិបាលអ៊ីរ៉ង់។ នៅតំបន់នេះ ពួកឧទ្ទាមភេរវនិយមបះបោរដូចយ៉ាងក្រុមរណសិរ្សរំដោះបាលូស៊ីស្តង់ សកម្មខ្លាំងណាស់ និងតែងវាយប្រហារជាញឹកញយមកលើកងកម្លាំងប្រដាប់អាវុធប៉ាគីស្ថាន និងតំណាងផលប្រយោជន៍រដ្ឋប៉ាគីស្ថាន ព្រមទាំងតំណាងដៃគូពាណិជ្ជកម្មចិននៅផ្ទាល់កន្លែង។ ម្យ៉ាងវិញទៀត ប៉ាគីស្ថានចាត់វិធានការវាយប្រហារដោយបានទទួលព័ត៌មានពីភ្នាក់ងារចារកិច្ចគួរឱ្យទុកចិត្តបំផុតថាពួកភេរវនិយមត្រៀមធ្វើសកម្មភាពទ្រង់ទ្រាយធំក្នុងពេលដ៏ឆាប់ៗ។
នេះជាលើកទីមួយហើយដែលប៉ាគីស្ថានវាយប្រហារដៅទៅលើទឹកដីអ៊ីរ៉ង់។ ការប៉ះទង្គិចហិង្សានៅតាមព្រំដែនរវាងប្រទេសទាំងពីរប៉ាគីស្ថាន-អ៊ីរ៉ង់ ធ្លាប់កើតមានញយដងណាស់ ប៉ុន្តែប៉ាគីស្ថានមិនដែលតបតដោយការបាញ់ប្រហារវិញដូច្នេះទេ។ អ៊ីរ៉ង់បានថ្កោលទោសទង្វើរបស់ប៉ាគីស្ថាន និងសុំឱ្យប៉ាគីស្ថានផ្តល់ការបំភ្លឺ។ បើតាមទូរទស្សន៍ជាតិអ៊ីរ៉ង់ ការវាយប្រហាររបស់ប៉ាគីស្ថានមកលើអ៊ីរ៉ង់ បានបណ្តាលឱ្យមានមនុស្សស្លាប់យ៉ាងហោចណាស់៩នាក់ ក្នុងនោះបីនាក់ជាស្ត្រីនិងបួននាក់ជាកុមារ។
ការវាយប្រហាររបស់ប៉ាគីស្ថាន បានកើតឡើងតែពីរថ្ងៃក្រោយការវាយប្រហាររបស់អ៊ីរ៉ង់មកលើទឹកដីប៉ាគីស្ថានប្រឆាំងនឹងពួកភេរវនិយមដែលជ្រៀតខ្លួនចូលមកធ្វើសកម្មភាពនៅក្នុងប្រទេសអ៊ីរ៉ង់។
ថ្វីបើប្រទេសទាំងពីរ ប្រឹងប្រើភាសាដ៏ល្អការពារទង្វើវាយប្រហារថាជាសកម្មភាពប្រឆាំងនឹងពួកភេរវនិយម និងគោរពបូរណភាពដែនដីគ្នាក៏ដោយ ក៏ប្រទេសជិតខាងគ្នាទាំងពីរកំពុងមានអារម្មណ៍មិនទុកចិត្តគ្នាកាន់តែខ្លាំង។ ប៉ាគីស្ថានកំពុងព្រួយបារម្ភខ្លាចសង្គ្រាមនៅតំបន់ដើមបូព៌ារីករាលដាល នាំប្រទេសឱ្យចូលពាក់ព័ន្ធដែរ។
ប្រឈមនឹងស្ថានភាពបែបនេះ ចិនបានប្រកាសត្រៀមខ្លួនជាស្រេចនឹងធ្វើជាអន្តរការី ដើម្បីបន្ធូរបន្ថយសម្ពាធតានតឹងរវាងប៉ាគីស្ថាននិងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ