អតីតនាយករដ្ឋមន្ត្រីប៉ាគីស្ថានអ៊ីមរ៉ាន់ខាន់រងការចោទប្រកាន់ពីបទទម្លាយឯកសារសម្ងាត់
លោក អ៊ីមរ៉ាន់ខាន់ អតីតនាយករដ្ឋមន្ត្រីប៉ាគីស្ថាន ដែលជាប់ក្នុងពន្ធនាគារតាំងពីខែសីហាមកពីបទពុករលួយ ត្រូវរងការចោទប្រកាន់ជាផ្លូវការថ្មីមួយទៀត នៅថ្ងៃចន្ទទី ២៣តុលា២០២៣នេះ ពីបទទម្លាយឯកសារសម្ងាត់។ សំណុំរឿងចោទប្រកាន់ថ្មីនេះអាចនឹងនាំលោកអ៊ីមរ៉ាន់ខាន់ឱ្យមានទោសជាប់ពន្ធនាគារច្រើនឆ្នាំណាស់។
ចុះផ្សាយនៅថ្ងៃ៖
ស្តាប់ - ០២:៥៨
បទចោទប្រកាន់ជាផ្លូវការលើអតីតនាយករដ្ឋមន្ត្រីប៉ាគីស្ថានអ៊ីមរ៉ាន់ខាន់ ពីបទទម្លាយឯកសារសម្ងាត់រដ្ឋ ត្រូវបានរដ្ឋអាជ្ញាShan khawar អានប្រកាសដោយក្តែងៗ នៅមុខពន្ធនាគារAdiala ដែលឃុំជនជាប់ចោទតាំងពីខែសីហាមកតែម្តង។ អតីតរដ្ឋមន្ត្រីក្រសួងការបរទេសដែលជាមនុស្សសំខាន់ទីពីររបស់បក្សPakistan Tehreek-e-Insaf (PTI) បង្កើតឡើងដោយលោកអ៊ីមរ៉ាន់ខាន់ផ្ទាល់ ក៏រងការចោទប្រកាន់ជាផ្លូវការក្នុងសំណុំរឿងតែមួយនេះដូចគ្នា។
សំណុំរឿងចោទប្រកាន់នេះមានពាក់ព័ន្ធនឹងបណ្តាញទូតរបស់ឯកអគ្គរដ្ឋទូតប៉ាគីស្ថានប្រចាំសហរដ្ឋអាមេរិកដែល លោកអ៊ីមរ៉ាន់ខាន់ ចាត់ទុកជាភស្តុតាងនៃការរៀបចំផែនការក្បត់ជាមួយក្រុមយោធាប៉ាគីស្ថាន ដើម្បីប្រឆាំងនឹងរូបលោក។ សហរដ្ឋអាមេរិកនិងយោធាប៉ាគីស្ថានបានច្រានចោលអំណះអំណាងនេះ។
ជាមួយបទចោទប្រកាន់ស្តីពីការទម្លាយឯកសារសម្ងាត់ផ្លូវការ លោកអ៊ីមរ៉ាន់ខាន់អាចនឹងត្រូវតុលាការកាត់ទោសឱ្យជាប់ពន្ធនាគារ១៤ឆ្នាំ ហើយអាចមានទោសធ្ងន់ធ្ងរបំផុតរហូតដល់ប្រហារជីវិតផង។ នេះបើតាមមេធាវីផ្ទាល់របស់លោកអ៊ីមរ៉ាន់ខាន់។ អ្នកនាំពាក្យគណបក្សPTI បានប្រកាសតវ៉ាប្រឆាំងនឹងការចោទប្រកាន់នេះ ដោយយល់ថាតុលាការប្រើច្បាប់ស្តីពីកិច្ចការសម្ងាត់ផ្លូវការ ដ៏ចាស់គំរិលសល់តាំងពីសម័យអាណនិគម ហើយដំណើរបែបបទបានប្រព្រឹត្តទៅនៅតុលាការមូលដ្ឋានដោយបិទទ្វារ គ្មានសាធារណជននិងគ្មានអ្នកសារព័ត៌មានដឹងឮសោះ។
អតីតជើងឯកកីឡាCricket ក្លាយជានាយករដ្ឋមន្ត្រីនៅឆ្នាំ២០១៨ លោកអ៊ីមរ៉ាន់ខាន់មានប្រជាប្រិយភាពយ៉ាងធំធេងក្នុងចំណោមប្រជាពលរដ្ឋ ប៉ុន្តែតាំងពីខ្ទាតចេញពីតំណែងដោយញាត្តចាប់ថ្នាក់នៅខែមេសា២០២២មក លោកត្រូវជាប់ការប្តឹងផ្តល់នៅតុលាការក្នុងសំណុំរឿងប្រមាណ២០០ករណី។ សម្រាប់អ្នកវិភាគក៏ដូចជាសាមីជនផ្ទាល់ សំណុំរឿងចោទប្រកាន់ទាំងអស់នោះមានលក្ខណៈនយោបាយ រារាំងមិនឱ្យលោកអ៊ីមរ៉ាន់ខាន់អាចមានលទ្ធភាពដោះខ្លួនទៅចូលរួមបោះឆ្នោតបាន។ កាលពីចុងខែសីហា តុលាការអ៊ីស្លាម៉ាបាដ បានព្យួរទោសជាប់ពន្ធនាគារបីឆ្នាំពីបទប្រព្រឹត្តអំពើពុករលួយ ប៉ុន្តែលោកអ៊ីមរ៉ាន់ខាន់ត្រូវបន្តជាប់ឃុំឃាំងជាបណ្តោះអាសន្នក្នុងសំណុំរឿងជាប់សង្ស័យទម្លាយឯកសារសម្ងាត់រដ្ឋ។
ក្រោយពីលើកពេលម្តងជាពីរដង ការបោះឆ្នោតសភានឹងត្រូវប្រព្រឹត្តឡើងនៅខែមករា២០២៤ខាងមុខ។ បច្ចុប្បន្នប៉ាគីស្ថានស្ថិតក្រោមការដឹកនាំរបស់រដ្ឋាភិបាលបណ្តោះអាសន្ន ដែលបណ្តុំឡើងដោយក្រុមយោធា។ ជោគវាសនារបស់ប្រមុខដឹកនាំប៉ាគីស្ថានអាស្រ័យទាំងស្រុងទៅលើទំនាក់ទំនងជាមួយក្រុមយោធា និងតុលាការ។ ជាក់ស្តែងអតីតនាយករដ្ឋមន្ត្រីប៉ាគីស្ថាន លោក ណាវ៉ា ស្ហារីហ្វ គូប្រជែងដ៏ចម្បងរបស់លោកអ៊ីនរ៉ាន់ខាន់ ទើបត្រលប់ចូលស្រុកវិញកាលពីថ្ងៃសៅរ៍ទី ២១តុលា២០២៣ បន្ទាប់ពីនិរទេសខ្លួនអស់៤ឆ្នាំ និងក្រោយពីតុលាការសម្រេចផ្តល់សេរីភាពដោយមានលក្ខខណ្ឌពីទោសជាប់ឃុំ៧ឆ្នាំដោយអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ