ប្រមុខរដ្ឋាភិបាលអាល្លឺម៉ង់ទៅអាមេរិក ដើម្បីជំរុញការបង្កើនជំនួយយោធាដល់អ៊ុយក្រែន
លោក អូឡាហ្វ ស្ហុលស៍ បានអញ្ជើញទៅដល់សហរដ្ឋអាមេរិក ជាលើកទីបីនៅ គិតចាប់តាំងពីលោកបានក្លាយប្រមុខរដ្ឋាភិបាលអាល្លឺម៉ង់មក។ លោក ស្ហុលស៍ ត្រូវមានជំនួបជាមួយលោកប្រធានាធិបតីអាមេរិកចូ បៃដិន នៅថ្ងៃសុក្រទី៩កុម្ភៈនេះ ដើម្បីបញ្ជាក់អំពីភាពបន្ទាន់នៃការបង្កើនជំនួយយោធាដល់អ៊ុយក្រែន។ ក្នុងខណៈនេះ សភាខុនហ្កេសអាមេរិកកំពុងជាប់គាំងយ៉ាងខ្លាំងជុំវិញការអនុម័តកញ្ចប់ថវិកាថ្មីសម្រាប់អ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:១៧
លោកប្រមុខរដ្ឋាភិបាលអាល្លឺម៉ង់ បានផ្តើមទស្សនកិច្ច ដោយជួបជជែកជាមួយសមាជិកសភាអាមេរិកទាំងឡាយរាប់ទាំងតំណាងសភានៃបក្សសាធារណរដ្ឋផង ក្នុងឱកាសទទួលទានអាហារពេលល្ងាចនៅវ៉ាស៊ីនតោន។ ប្រធានបទនៃកិច្ចពិភាក្សាវិលជុំវិញតែសំណុំរឿងអ៊ុយក្រែន និងកិច្ចខិតខំប្រឹងប្រែងរបស់ក្រុមបស្ចិមលោកចំពោះអ៊ុយក្រែន។ បន្ទាប់មក លោកអូឡាហ្វ ស្ហុលស៍ នឹងចូលជួបលោកចូ បៃដិន នៅថ្ងៃសុក្រវេលា១៤និង៤៥នាទី ម៉ោងនៅវ៉ាស៊ីនតោន។
តាំងពីមុនចេញដំណើរ លោកអូឡាហ្វ ស្ហុលស៍ បានបញ្ជាក់ជំហរនិងអំពាវនាវឱ្យសហភាពអឺរ៉ុបនិងសហរដ្ឋអាមេរិក ប្រឹងប្រែងបន្ថែមទៀតក្នុងការផ្តល់ជំនួយយោធាដល់អ៊ុយក្រែន ព្រោះទង្វើនិងជំនួយកន្លងមក មិនគ្រប់គ្រាន់ទេ។ អឺរ៉ុបនិងអាមេរិកត្រូវប្រឹងឱ្យអស់ពីលទ្ធភាពក្នុងរារាំងរុស្ស៊ីកុំឱ្យឈ្នះសង្គ្រាមលើអ៊ុយក្រែន បើពុំនោះទេពិភពលោកអាចនឹងជួបអស្ថិរភាព រងការគំរាមកំហែង និងពិបាកស្មានកាន់តែខ្លាំង ជាងក្នុងសម័យសង្គ្រាមត្រជាក់ទៅទៀត។ នេះជាប្រសាសន៍របស់លោក អូឡាហ្វ ស្ហុលស៍ដដែល។
នេះជាជំនួបទ្វេភាគី ស្ហុលស៍-បៃដិន លើកទីបី ដែលប្រព្រឹត្តទៅក្នុងខណៈដែលលោកចូបៃដិន កំពុងធ្វើយុទ្ធនាការប្រកួតយកតំណែងប្រធានាធិបតីអាណត្តិទីពីរផង និងកំពុងចរចាតាំងពីជាច្រើនខែជាមួយបក្សប្រឆាំងសាធារណរដ្ឋលើគម្រោងថវិកាដែលមានកញ្ចប់ជំនួយយោធាប្រមាណ៦០ពាន់លានដុល្លារសម្រាប់អ៊ុយក្រែនផង។ គម្រោងថវិកាត្រូវជាប់គាំងអស់ជាច្រើនខែ ដោយព្រឹទ្ធសភាអាមេរិកទើបព្រមសិក្សាសំណើរបស់រដ្ឋាភិបាល ប៉ុន្តែមិនប្រាកដព្រមអនុម័តទេ។ ម្យ៉ាងទៀត គេមិនអាចច្រានចោលសេណារីយ៉ូលោកដូណាល់ត្រាំ ឈ្នះឆ្នោតនៅថ្ងៃទី៥វិច្ឆិកា២០២៤ ត្រលប់មកកាន់អំណាចវិញបានទេ។ នៅក្រៅអាណត្តិផង លោកអតីតប្រធានាធិបតីអាមេរិក អាចពង្វក់បង្វិលក្រុមសភាខុនហ្កេសឱ្យរារាំងកញ្ចប់ថវិកាសម្រាប់ជួយអ៊ុយក្រែនបាន។
ក្នុងនាមជាជើងឯកផ្នែកជួយអ៊ុយក្រែន ដោយបានបង្កើនកញ្ចប់ថវិកាជំនួយយោធាទ្វេដង ពោលគឺឡើងដល់ជាង៧ពាន់លានអឺរ៉ូសម្រាប់ឆ្នាំនេះ តែអាល្លឺម៉ង់ម្នាក់ឯងទ្រទ្រង់មិនរួចទេ។ ហេតុដូច្នេះហើយទើបប្រមុខរដ្ឋាភិបាលអាល្លឺម៉ង់បន្តជំរុញឥតឈប់ឱ្យដៃគូអឺរ៉ុបនិងសហរដ្ឋអាមេរិក បង្កើនការគាំទ្រដល់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ