ភ្លើងឆេះព្រៃនៅអាមេរិកខាងត្បូងកំពុងបំផ្លិចបំផ្លាញព្រៃដែលជាសួតរបស់ផែនដី
នៅប្រទេសឈីលី ភ្លើងឆេះព្រៃដ៏សន្ធោសន្ធៅបានរាលដាលចូលដល់តំបន់ក្រុងនៅភាគកណ្តាល ដោយបានសម្លាប់មនុស្សយ៉ាងតិច ៥១នាក់។ អាជ្ញាធរឈីលីបារម្ភខ្លាចថា តួលេខជនរងគ្រោះស្លាប់នៅក្នុងអគ្គិភ័យអាចច្រើនជាងនេះ ព្រោះថា ភ្លើងឆេះព្រៃកំពុងបោះពួយចូលដល់តំបន់Valparaiso ដែលមានប្រជាជនរស់នៅជិត១លាននាក់។ នៅថ្ងៃអាទិត្យ ក្រុមជួយសង្រ្គោះឈីលីនៅសស្រាក់សស្រាំពន្លត់ភ្លើងឆេះព្រៃដែលគំរាមកំហែងទាំងជីវិតមនុស្ស និងផ្ទះសម្បែងក្នុងក្រុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១២
នៅឈីលី ភ្លើងឆេះព្រៃកាន់តែសន្ធោសន្ធៅ ឆេះរាលដាលនៅទូទាំងប្រទេស។ នៅថ្ងៃអាទិត្យ ភ្លើងឆេះព្រៃនៅភាគកណ្តាលប្រទេសបានឆេះរាលដាលចូលដល់តំបន់ក្រុង និងសម្លាប់មនុស្សយ៉ាងតិច៥១នាក់។ អាជ្ញាធរឈីលីព្រមានថាចំនួនជនរងគ្រោះស្លាប់ដោយសារភ្លើងឆេះព្រៃអាចច្រើនជាងនេះ ព្រោះថា នៅមានកន្លែងឆេះជាច្រើនកន្លែងទៀត ដែលភ្នាក់ងារមិនទាន់អាចពន្លត់បានទាំងស្រុង។
ប្រឈមនឹងគ្រោះមហន្តរាយភ្លើងឆេះព្រៃ ដោយសារអាកាសធាតុស្ងួត ក្តៅខ្លាំងរហូតដល់៤០អង្សារ ប្រធានាធិបតីឈីលី លោក ហ្កាប្រីយ៉ែល បូរីកបានចេញក្រឹត្យប្រកាសអាសន្ននៅភាគកណ្តាល និងខាងត្បូងប្រទេសឈីលី។ នៅយប់ថ្ងៃសៅរ៍ រដ្ឋាភិបាលឈីលីប្រកាសជម្លៀសប្រជាជន និងដាក់បម្រាមគោចរដើម្បីសម្រួលការដឹកជញ្ជូនជំនួយបន្ទាន់ ជាពិសេស ប្រេងទៅកាន់កន្លែងដែលរងប៉ះពាល់ដោយគ្រោះមហន្តរាយ។
គិតរហូតមកដល់ព្រឹកថ្ងៃសៅរ៍ ក្រសួងមហាផ្ទៃឈីលីរាប់ឃើញមានភ្លើងឆេះព្រៃប្រមាណ ៩២កន្លែងនៅទូទាំងប្រទេស ដែលបានដុតបំផ្លាញព្រៃជាង៤៣០០០ហិចតា។ នៅក្នុងចំណោមភ្លើងឆេះព្រៃ៩២កន្លែង ភ្នាក់ងារពន្លត់អគ្គិភ័យគ្រប់គ្រងបាន៤០កន្លែង និងកំពុងជាប់ដៃពន្លត់ភ្លើងនៅ២៩កន្លែងផ្សេងទៀត។
អ្វីដែលធ្វើឲ្យអាជ្ញាធរឈីលីព្រួយបារម្ភជាងគេ គឺភ្លើងឆេះព្រៃមួយចំនួនដែលឆេះរាលដាលសំដៅតំបន់ក្រុង គំរាមកំហែងជីវិតមនុស្ស ផ្ទះសម្បែង និងហេដ្ឋារចនាសម្ព័ន្ធ។
ភ្លើងឆេះព្រៃរមែងកើតមាននៅឈីលី ជាពិសេសនៅរដូវក្តៅ។ បើប្រៀបធៀបភ្លើងឆេះព្រៃនៅ ឆ្នាំមុន នៅពេលឈីលីជួបរលកកំដៅខ្លាំងរហូតសម្លាប់មនុស្ស២៧នាក់ និងដុតបំផ្លាញព្រៃជាង ៤សែនហិចតា ដីព្រៃដុតបំផ្លាញនៅក្នុងភ្លើងឆេះព្រៃលើកនេះ នៅមានទំហំតិចតួចនៅឡើយ។ ប៉ុន្តែ អាជ្ញាធរឈីលី បារម្ភខ្លាចថា ជាមួយអាកាសធាតុក្តៅស្ងួតខ្លាំង និងរលកកំដៅជាបន្តបន្ទាប់ ភ្លើងឆេះព្រៃអាចរាលដាលបោះពួយក្នុងល្បឿនមួយលឿន និងឆេះងំខ្លាំងមិនងាយរលត់។ អ្នកវិទ្យាសាស្រ្តធ្លាប់ព្រមានថា គ្រោះមហន្តរាយភ្លើងឆេះនឹងបន្តអូសបន្លាយយូរ ព្រោះថា ភាគខាងត្បូងអាមេរិកកំពុងជួបបាតុភូតអែលនីញ៉ូដែលនឹងញ៉ាំងឲ្យតំបន់ងាយនឹងជួបគ្រោះធម្មជាតិធ្ងន់ធ្ងរ ដូចជារលកកំដៅ និងភ្លើងឆេះព្រៃ។ នៅតំបន់ខាងត្បូងអាមេរិក មិនមែនមានតែឈីលីមួយដែលកំពុងរងគ្រោះដោយសារភ្លើងឆេះព្រៃ កូឡុំប៊ីធ្លាប់បានទទូចសុំជំនួយអន្តរជាតិបន្ទាប់ពីប្រទេសមួយតស៊ូពន្លត់ភ្លើងឆេះព្រៃ ដូចប៉ារ៉ាហ្កាយ និងប្រេស៊ីល។ នៅអាហ្សង់ទីនឯណោះវិញ តាំងពីថ្ងៃទី២៥មករា ភ្នាក់ងារពន្លត់អគ្គិភ័យបន្តព្យាយាមពន្លត់ភ្លើងដែលឆេះបំផ្លាញដីព្រៃជាង៣០០០ហិចតា នៅក្នុងឧទ្យានជាតិ Los Alerces ដែលល្បីល្បាញខាងសម្រស់ធម្មជាតិ និងជីវចម្រុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ