យន្តហោះBoeing 737 Max 9 ៖ ក្រុមស៊ើបអង្កេតរកឃើញមាន “ខ្ចៅរលុង” នៅលើទ្វារយន្តហោះ
បន្ទាប់ពីមានករណីយន្តហោះ Boeing 737 Max 9 មួយគ្រឿង បានរបើកទ្វារ ពេលកំពុងហោះលើមេឃ កាលពីថ្ងៃសុក្រសប្តាហ៍កន្លងទៅ អាជ្ញាធរអាកាសចរណ៍ស៊ីវីលសហរដ្ឋអាមេរិក បានតម្រូវឲ្យក្រុមហ៊ុនអាកាសចរណ៍ទាំងអស់ ត្រូវស៊ើបអង្កេត ពិនិត្យសុវត្ថិភាពយន្តហោះប្រភេទនេះទាំងអស់។ ឆ្លងកាត់ការពិនិត្យប៉ុន្មានថ្ងៃមកនេះ ក្រុមហ៊ុនអាកាសចរណ៍ Alaska Airlines និង United Airlines បានអះអាងថា គេបានរកឃើញ “ខ្ចៅរលុង” នៅត្រង់ចំណុចទ្វារ ដូចគ្នាទៅនឹងទ្វារយន្តហោះដែលបានរបើកដាច់ កាលពីថ្ងៃសុក្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:១១
នៅសហរដ្ឋអាមេរិក យន្តហោះ Boeing ប្រភេទ 737 Max 9 ចំនួន១៧១គ្រឿង ត្រូវចតនៅដី មិនអាចហោះដំណើរការបានទេក្នុងពេលនេះ ដោយត្រូវរងចាំការត្រួតពិនិត្យ ពីក្រុមជំនាញសុវត្ថិភាព។ ក្រុមហ៊ុន United Airlines ដែលប្រើប្រាស់យន្តហោះប្រភេទនេះ ចំនួន៧៩គ្រឿង បានឲ្យដឹងថា គេបានរកឃើញ “ខ្ចៅរលុង” នៅត្រង់ចំណុចទ្វារយន្តហោះ ដូចគ្នាទៅនឹងទ្វារយន្តហោះរបស់ ក្រុមហ៊ុន Alaska Airlines ដែលបានរបើកដាច់ជ្រុះទៅដី ក្នុងពេលកំពុងហោះ កាលពីថ្ងៃសុក្រ។ ដូចគ្នាដែរ ក្រុមហ៊ុន Alaska Airlines បានប្រកាសដំណឹងថា ខ្លួនក៏បានរកឃើញ បញ្ហា “ខ្ចៅរលុង” នៅលើយន្តហោះប្រភេទនេះខ្លះទៀត របស់ខ្លួនដែរ បន្ទាប់ពីបានត្រួតពិនិត្យ ក្រោយកើតឧបទ្ទវហេតុ។
ចំណែកទីភ្នាក់ងារសន្តិសុខដឹកជញ្ជូនអាមេរិក (NTSB) វិញ បានឲ្យដឹងថា គិតត្រឹមថ្ងៃចន្ទទី៨មករា គឺគេមិនទាន់រកឃើញ គ្រាប់ខ្ចៅយន្តហោះ ក្នុងចំណោមបំណែកដែលបានរបើកប៉ើង ដាច់ពីយន្តហោះរបស់ Alaska Airlines ឡើយ។ លោកស្រី Jennifer Hemendy អគ្គនាយកទីភ្នាក់ងារសន្តិសុខដឹកជញ្ជូនអាមេរិក មិនបានប្រតិកម្មអ្វី ទៅនឹងដំណឹងប្រកាសរបស់ Alaska Airlines និង United Airlines ទេ។ លោកស្រីបានត្រឹមអះអាងថា សម្រាប់ពេលនេះ ការស៊ើបអង្កេតកំពុងផ្តោតលើករណីឧបទ្ទវហេតុ ដែលបានកើតឡើងកាលពីថ្ងៃសុក្រ ហើយបើត្រូវមានវិធានការបន្ទាន់ផ្នែកសុវត្ថិភាពត្រូវសម្រេច គឺអាជ្ញាធរលោកស្រីនឹងសម្រេចភ្លាមៗ។
សូមបញ្ជាក់ថា កាលពីយប់ថ្ងៃសុក្រទី៥មករា យន្តហោះBoeing ប្រភេទ 737 Max 9 របស់ក្រុមហ៊ុន Alaska Airlines ដែលហោះចេញពីទីក្រុង Portland បានរបើកប៉ើងដាច់ទ្វារមួយ នៅខាងឆ្វេងយន្តហោះ ក្នុងពេលដែលយន្តហោះនេះ ហោះបានកំពស់៤គីឡូម៉ែត្រ។ ជាសំណាងល្អ យន្តហោះបានហោះចុះវិញជាបន្ទាន់ មិនបណ្តាលឲ្យមានគ្រោះថា្នក់ដល់ជីវិតមនុស្សទេ។ ចំណែកទ្វារយន្តហោះដែលបានរបើក ត្រូវបានគេប្រទះឃើញជ្រុះនៅក្នុងសួនច្បារ ផ្ទះប្រជាជនម្នាក់នៅក្រុងPortland។
ក្រុមហ៊ុនBoeing បានអះអាងថា ខ្លួនកំពុងតែទាក់ទងជាប់ជាប្រចាំ ជាមួយអាជ្ញាធរ ព្រមទាំងក្រុមហ៊ុនអាកាសចរណ៍ នៅក្នុងការត្រួតពិនិត្យតាមដានសុវត្ថិភាពនៃយន្តហោះ Boeing 737 Max 9។ Boeing អះអាងថា ខ្លួនសន្យាគោរព និងធានា ចំពោះលក្ខខណ្ឌសុវត្ថិភាពដ៏ខ្ពស់បំផុត។
គួរកត់សំគាល់ថា ក្រោយហេតុការណ៍របើកទ្វារយន្តហោះនេះ គឺយ៉ាងហោចជើងហោះហើរ ដែលប្រើយន្តហោះ Boeing 737 Max 9 ចំនួន១០០០ជើង ត្រូវបានលុបចោល បើគិតចាប់ពីថ្ងៃសៅរ៍មក។ ភាគហ៊ុនរបស់ក្រុមហ៊ុន Boeing បានធ្លាក់ថ្លៃចំនួន ៨,០៣%នៅ Wall Street។ លោក Richard Aboulafia នាយក AeroDynamic Advisory បានលើកឡើងថា ថ្នាក់ដឹកនាំក្រុមហ៊ុន Boeing គួរតែដល់ពេលបើកភ្នែក ធ្វើការផ្លាស់ប្តូរឲ្យបានរួសរាន់ឡើង ទាក់ទិននឹងសុវត្ថិភាពគួរឲ្យទុកចិត្ត របស់យន្តហោះខ្លួន។
សូមបញ្ជាក់ថា គិតត្រឹមចុងខែធ្នូ Boeing បានទទួលការបញ្ជាទិញយន្តហោះ Boeing 737 Max ចំនួន៤០០០គ្រឿង ដែលក្នុងនោះ មាន ១៣៧០គ្រឿង ដែលត្រូវបានប្រគល់ទៅឲ្យអតិថិជនរួចរាល់។ ហើយផ្អែកតាមទីភ្នាក់ងារអាកាសចរណ៍ស៊ីវីលអាមេរិក គឺគេធ្លាប់បានប្រទះឃើញ ករណី “ខ្ចៅមួលមិនតឹងណែនល្អ” នៅលើយន្តហោះប្រភេទនេះ ដែល Boeing មិនទាន់ប្រគល់ទៅឲ្យអតិថិជន។
គួររំលឹកដែរថា នេះមិនមែនជាលើកទី១ទេ ដែលយន្តហោះរបស់ក្រុមហ៊ុន Boeing ជួបបញ្ហាសុវត្ថិភាពបែបនេះ។ កាលពីខែធ្នូ Boeing បានប្រាប់ទៅអតិថិជនខ្លួន ឲ្យពិនិត្យមើលឡើងវិញ នូវប្រព័ន្ធគ្រប់គ្រងចង្កូតយន្តហោះ Boeing 737 Max 9។ ហើយគឺយន្តហោះប្រភេទនេះឯង ដែលបានធ្លាក់២ដងផ្ទួនៗគ្នា មួយនៅខែតុលា ឆ្នាំ២០១៨ នៅឥណ្ឌូណេស៊ី មួយទៀតនៅខែមីនាឆ្នាំ២០១៩ នៅអេត្យូពី បណ្តាលឲ្យស្លាប់មនុស្សសរុបចំនួន ៣៤៦នាក់។ គ្រោះថ្នាក់ធ្លាក់ទាំង២លើកនេះ បានធ្វើឲ្យក្រុមហ៊ុនអាកាសចរណ៍ទាំងអស់ សម្រេចផ្អាកការហោះហើរយន្តហោះ Boeing 737 Max អស់រយៈពេល២០ខែ ទំរាំមានការកែលម្អប្រព័ន្ធសុវត្ថិភាពហោះហើរឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ