យន្តហោះប៊ូអ៊ីងរបស់Alaska airlineត្រូវចុះចតបន្ទាន់ ក្រោយពីដាច់បាត់បង្អួចក្បែរកៅអីអ្នកដំណើរ
ក្រុមហ៊ុនហោះហើររបស់អាមេរិក Alaska airlineបានប្រកាសបញ្ឈរជើងយន្តហោះប៊ូអ៊ីងរបស់ខ្លួនទាំងអស់៦៥គ្រឿងមិនឲ្យហោះហើរ ចាប់ពីថ្ងៃសៅរ៍ទី៦មករា២០២៤ បន្ទាប់ពី យន្តហោះរបស់ក្រុមហ៊ុន ប្រភេទប៊ូអ៊ីង៧៣៧-៩មួយគ្រឿង ត្រូវបង្ខំចិត្ត បត់ក្បាលត្រលប់ទៅចុះចត បន្ទាន់ នៅព្រលានយន្តហោះក្នុងរដ្ឋOregon កាលពីសុក្រ ដោយសារតែយន្តហោះដាច់បាត់បង្អួច ក្បែរកៅអីអ្នកដំណើរ។ តាមក្រុមហ៊ុនអាកាសចរណ៍ Alaska យន្តហោះបានចុះចតដោយសុវត្ថិភាព គ្មានគ្រោះថ្នាក់ដល់អ្នកដំណើរ និងបុគ្គលិកធ្វើការនៅលើយន្តហោះម្នាក់ណាឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៩
យន្តហោះប៊ូអ៊ីង៧៣៧ របស់ក្រុមហ៊ុនហោះហើរ Alaska airlineដែលដឹកអ្នកដំណើរ១៧៧នាក់ និងបុគ្គលិកលើយន្តហោះ៦នាក់ បានចាកចេញពីព្រលានយន្តហោះក្នុងទីក្រុង Portland របស់រដ្ឋOregon នៅវេលាម៉ោង ៤ និង៥៧នាទីល្ងាចថ្ងៃសុក្រ សំដៅទៅរដ្ឋកាលីហ្វ័នីញ៉ា។ ប៉ុន្តែ យន្តហោះប៊ូអ៊ីងជើងហោះហើរ លេខ១២៨២បានបត់ត្រលប់ចុះចតជាបន្ទាន់ នៅព្រលានយន្តហោះ នៅ ៣៥នាទីក្រោយ បន្ទាប់ពីបុគ្គលិកនៅលើយន្តហោះទាញសញ្ញាអាសន្នពីការដាច់បាត់បង្អួច ក្បែរកៅអីអ្នកដំណើរ។
តាមទិន្នន័យរបស់វិបសៃតិ៍តាមដានជើងហោះហើរ ក្នុងពិភពលោក យន្តហោះប៊ូអ៊ីង៧៣៧របស់ក្រុមហ៊ុន Alaska airlineស្ថិតនៅកំពស់ជាង ៤៨០០ម៉ែត្រ នៅពេលយន្តហោះជួបស្ថានភាពអាសន្ន។
វីដេអូនៅលើបណ្តាញសង្គម បង្ហាញខ្សែអុកស៊ីសែនទម្លាក់សម្រាប់អ្នកដំណើរ ចំណែក ជញ្ជាំងយន្តហោះមានប្រហោងធំ ដោយសារដាច់បាត់បង្អួច។ សាក្សីជាអ្នកដំណើរនៅលើយន្តហោះ បាននិយាយប្រាប់ទូរទស្សន៍អាមេរិក CNN ថា គ្រាន់តែហោះឡើងដល់កម្ពស់មួយដ៏ខ្ពស់ បង្អួចមួយរបស់យន្តហោះស្រាប់ដាច់រហែក ហោះទៅបាត់។
តាមក្រុមហ៊ុន Alaska airline អ្នកដំណើរទាំង១៧៧នាក់ និងបុគ្គលិកនៅលើយន្តហោះ៦នាក់គ្មានជួបគ្រោះថ្នាក់ បន្ទាប់ពីយន្តហោះវិលត្រលប់ចុះចតដោយសុវត្ថិភាព នៅព្រលានយន្តហោះPortland។
ឧប្បត្តិហេតុ នៅថ្ងៃសុក្រ បានធ្វើឲ្យក្រុមហ៊ុន Alaska airlineប្រកាសផ្អាក ឬបញ្ឈរជើងយន្តហោះប៊ូអ៊ីង៧៣៧ របស់ខ្លួនទាំងអស់ ៦៥គ្រឿង មិនឲ្យហោះហើរ នៅក្នុងពេលរង់ចាំការស៊ើបអង្កេត និងការតាមដានត្រួតពិនិត្យផ្នែកសុវត្ថិភាពរបស់យន្តហោះ។ នៅក្នុងសេចក្តីប្រកាសព័ត៌មានកាលពីថ្ងៃសៅរ៍ នាយកប្រតិបត្តិរបស់ក្រុមហ៊ុន Alaska airlineនិយាយថា យន្តហោះប៊ូអ៊ីង ៧៣៧ -៩នឹងអាចដាក់ឲ្យដំណើរការសាជាថ្មី នៅបន្ទាប់ពីមានការជួសជុល ការត្រួតពិនិត្យបញ្ហាសុវត្ថិភាពរបស់យន្តហោះ។
អាជ្ញាធរអាកាសចរណ៍សហព័ន្ធ អាជ្ញាធរជាតិសុវត្ថិភាពដឹកជញ្ជូន និងក្រុមហ៊ុន Alaska airlineផ្ទាល់បានប្រកាសបើកការស៊ើបអង្កេតឧប្បត្តិហេតុលើកនេះ។ ក្រុមហ៊ុន airworthyទើបទិញទទួលបានយន្តហោះ ៧៣៧-៩ កាលពីពេលថ្មីៗនេះ បន្ទាប់ពីយន្តហោះប្រភេទនេះត្រូវបានអនុញ្ញាតឲ្យហោះហើរ កាលពីខែតុលាកន្លងទៅ។ នេះបើតាមវិបសៃតិ៍របស់អាជ្ញាធរអាកាសចរណ៍សហព័ន្ធ FAA។
ក្រុមហ៊ុនប៊ូអ៊ីងវិញបានសរសេរនៅលើបណ្តាញសង្គមX ថា ក្រុមហ៊ុននឹងផ្តល់គ្រប់ព័ត៌មាន និងក្រុមបច្ចេកទេសសម្រាប់ការស៊ើបអង្កេតលើឧប្បត្តិហេតុកាលពីថ្ងៃសុក្រ។ នៅប៉ុន្មានឆ្នាំមកនេះ ក្រុមហ៊ុនប៊ូអ៊ីង ដែលក្រុមហ៊ុនផលិតយន្តហោះដ៏ធំជាងគេនៅក្នុងពិភពលោកជួបការលំបាកច្រើន ដោយសារបញ្ហាបច្ចេកទេស និងការត្រួតពិនិត្យ ជាពិសេសសុវត្ថិភាពរបស់យន្តហោះប៊ូអ៊ីង ៧៣៧ផ្ទាល់តែម្តង។ រាល់យន្តហោះប៊ូអីង ៧៣៧Max ត្រូវផ្អាក មិនឲ្យហោះហើរនៅទូទាំងពិភពលោក បន្ទាប់ពីយន្តហោះប៊ូអ៊ីងប្រភេទនេះ ពីគ្រឿងធ្លាក់បន្តបន្ទាប់គ្នា នៅឆ្នាំ ២០១៨ និងឆ្នាំ ២០១៩ ដោយសម្លាប់មនុស្សសរុប ៣៤៦នាក់។ អាជ្ញាធរអាកាសចរណ៍សហព័ន្ធទើបអនុញ្ញាតឲ្យយន្តហោះប៊ូអ៊ីងអាចហោះហើរឡើងវិញ បន្ទាប់ពីក្រុមហ៊ុនផ្លាស់ប្តូរប្រព័ន្ធគ្រប់គ្រងការហើរហោះរបស់យន្តហោះ។
ប៉ុន្តែ នៅខែ ធ្នូកន្លងទៅ អាជ្ញាធរអាមេរិកដដែលធ្លាប់បានជូនដំណឹងទៅរាល់ក្រុមហ៊ុនហោះហើរទាំងអស់ឲ្យឆែក ត្រួតពិនិត្យគ្រឿងខ្ចៅខ្ចងរបស់ យន្តហោះ នៅមុនដាក់ឲ្យហោះហើរ ព្រោះថាក្រុមអធិការកិច្ចធ្លាប់រកឃើញថា យន្តហោះមានខ្វះគ្រឿងខ្ចៅ នៅក្នុងពេលគេកំពុងជួសជុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ