ដែនដីហ្គីយ៉ាន៖ វ៉េណេស៊ុយអេឡាបោះឆ្នោតប្រជាមតិទាត់ចោលការសម្រេចរបស់តុលាការព្រហ្មទណ្ឌយុត្តិធម៌
នៅថ្ងៃអាទិត្យទី៣ធ្នូ វ៉េណេស៊ុយអេឡារៀបចំការបោះឆ្នោតប្រជាមតិដើម្បីសម្រេចថា តើព្រម ឬមិនព្រម ទទួលស្គាល់ការសម្រេចរបស់តុលាការយុត្តិធម៌អន្តរជាតិ នៅក្នុងជម្លោះដែនដីជាមួយប្រទេសហ្គីយ៉ាន។ តាមលទ្ធផលឆ្នោត ដែលក្រុមប្រឹក្សាបោះឆ្នោតជាតិ ប្រកាសនៅយប់ថ្ងៃអាទិត្យ សន្លឹកឆ្នោតឆ្លើយ “មិនយល់ព្រម” ទទួលស្គាល់ការសម្រេចរបស់តុលាការក្រុងឡាអេ មានសំឡេងភាគច្រើន ដល់ទៅ៩៥%។ ការទាត់ចោលការសម្រេចរបស់តុលាការយុត្តិធម៌អន្តរជាតិ មានន័យថា ប្រជាជនវ៉េណេស៊ុយអេឡាគាំទ្រការកាត់បញ្ចូលដែនដីរបស់ប្រទេសជិតខាង ហ្គីយ៉ាន មកក្នុងផែនដីរបស់វេណេស៊ុយអេឡា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥១
ទោះតុលាការយុត្តិធម៌អន្តរជាតិចេញបញ្ជាហាមវ៉េណេស៊ុយអេឡាមិនឲ្យធ្វើសកម្មភាពទាំងឡាយណាដែលទៅផ្លាស់ប្តូរស្ថានភាពដើម នៅក្នុងតំបន់ វ៉េណេស៊ុយអេឡារបស់លោកប្រធានាធិបតី នីកូឡា ម៉ាឌូរ៉ូនៅតែផ្គើនរៀបចំការបោះឆ្នោតប្រជាមតិ មាន៥សំណួរ ដែលនៅក្នុងនោះ ប្រជាជនវ៉េណេស៊ុយអេឡាត្រូវឆ្លើយថា ព្រម ឬមិនព្រម ទទួលស្គាល់សមត្ថកិច្ចរបស់តុលាការយុត្តិធម៌អន្តរជាតិនៅក្នុងសំណុំរឿងដែនដី Essequibo។
តាមលទ្ធផលឆ្នោត ដែលក្រុមប្រឹក្សាបោះឆ្នោតជាតិ ប្រកាសនៅយប់ថ្ងៃអាទិត្យ សន្លឹកឆ្នោតឆ្លើយ “មិនយល់ព្រម” ទទួលស្គាល់ការសម្រេចរបស់តុលាការក្រុងឡាអេ មានសំឡេងភាគច្រើន ដល់ទៅ៩៥%។ ការទាត់ចោលការសម្រេចរបស់តុលាការយុត្តិធម៌អន្តរជាតិ មានន័យថា ប្រជាជនវ៉េណេស៊ុយអេឡាគាំទ្រការកាត់បញ្ចូលដែនដី Essequiboរបស់ហ្គីយ៉ាន មកដាក់ក្នុងផែនដីរបស់វ៉េណេស៊ុយអេឡា។
ដែនដីEssequiboដែលមានផ្ទៃដី ១៦០ ០០០គីឡូម៉ែត្រការ៉េ កំពុងស្ថិតក្រោមការកាន់កាប់របស់ប្រទេសហ្គីយ៉ាន ប្រទេសជិតខាងរបស់វ៉េណេស៊ុយអេឡា។ ដោយផ្អែកលើប្រវត្តិសាស្រ្តនៃការគ្រប់គ្រងរបស់អាណានិគមអង់គ្លេស វ៉េណេស៊ុយអេឡានៅតែទាមទារថា ដែនដី Essequibo គឺជាផ្នែកមួយនៃទឹកដីវ៉េណេស៊ុយអេឡា នោះបើទោះបីជាតុលាការអាជ្ញាកណ្តាលអន្តរជាតិធ្លាប់សម្រេចកាលពីឆ្នាំ ១៨៩៩ ថា ដែនដី Essequiboជាកម្មសិទ្ធិរបស់ប្រទេសហ្គីយ៉ានក្តី។
វ៉េណេស៊ុយអេឡាដែលធ្លាប់តែប្រឆាំងមិនទទួលស្គាល់ការសម្រេចរបស់តុលាការដែលខ្លួនចាត់ទុកថា អយុត្តិធម៌ បានចាប់ផ្តើមសើរើ ចង់បានដែនដីEssequibo របស់ហ្គីយ៉ាន បន្ទាប់ពី ក្រុមហ៊ុនអាមេរិករកឃើញមានអណ្តូងប្រេងដ៏ធំ នៅទីនោះ ដែលអាចផ្តល់ប្រេង ប្រមាណ១០ពាន់លានបារីល។
នៅយប់ថ្ងៃអាទិត្យ ប្រធានាធិបតីវ៉េណេស៊ុយអេឡាស្វាគមលទ្ធផលឆ្នោតគាំទ្រដ៏ធំធេងដែលបញ្ជាក់ថា ប្រជាជនវ៉េណេស៊ុយអេឡាចង់បានដែនដីដែលជាប់ជម្លោះជាមួយហ្គីយ៉ាន។
ការបោះឆ្នោតប្រជាមតិសើរើចង់បានដែនដី Essequibo ដែលតំណាងឲ្យ៦០%នៃផ្ទៃដីសរុបរបស់ហ្គីយ៉ានយ៉ាងដូច្នេះ បានធ្វើរដ្ឋាភិបាលហ្គីយ៉ាន បានដាក់ពាក្យបណ្តឹងទៅតុលាការយុត្តិធម៌អន្តរជាតិ នៅទីក្រុងឡាអេ ដើម្បីផ្តល់សុពលភាពបន្ថែម ទៅលើការសម្រេចរបស់តុលាការអន្តរជាតិកន្លងមក និងដើម្បីរារាំងកុំឲ្យវ៉េណេស៊ុយអេឡារៀបចំការបោះឆ្នោតប្រជាមតិ។
សម្រាប់ប្រធានាធិបតីហ្គីយ៉ាន លោក Irfaan Ali ការសម្រេចរបស់តុលាការយុត្តិធម៌អន្តរជាតិ នៅថ្ងៃសុក្រ កន្លងទៅ មានអត្ថន័យរារាំងមិនឲ្យវ៉េណេស៊ុយអេឡាកាត់យក ឬចូលឈ្លានពានដែនដី Essequibo។
មួយវិញទៀត ទោះបីជាមានការធានាអះអាងពីវ៉េណេស៊ុយអេឡាថា នឹងមិនប៉ុនប៉ងឈ្លានពានចូលគ្រប់គ្រងដែនដីជាប់ជម្លោះ ប៉ុន្តែ ហ្គីយ៉ាននៅតែមិនទុកចិត្ត និងបានបញ្ជូនមនុស្សរាប់ពាន់នាក់ឲ្យទៅធ្វើជាព្រំដែនមនុស្ស នៅត្រង់ខ្សែបន្ទាត់ព្រំដែនជាមួយប្រទេសវ៉េណេស៊ុយអេឡា។
សម្រាប់អ្នកជំនាញ ទោះប្រជាជនវ៉េណេស៊ុយអេឡាបោះឆ្នោតចង់បានដែនដី Essequiboពីប្រទេសហ្គីយ៉ាន ប៉ុន្តែ នៅក្នុងស្ថានភាពជាក់ស្តែង រដ្ឋាភិបាលវ៉េណេស៊ុយអេឡាមិនអាចធ្វើអ្វីបានភ្លាមៗដែរ។
គេជឿថា ក្នុងកាលៈទេសៈ ដែលវ៉េណេស៊ុយអេឡាកំពុងមានវិបត្តិសេដ្ឋកិច្ច លោកប្រធានាធិបតីនីកូឡា ម៉ាឌូរ៉ូ រៀបចំការបោះឆ្នោតប្រជាមតិដើម្បីបង្វែរចំណាប់អារម្មណ៍របស់ប្រជាជន និងដណ្តើមសំឡេងពីបក្សប្រឆាំង នៅប៉ុន្មានខែមុនការបោះឆ្នោតប្រធានាធិបតី ដែលត្រូវរៀបចំ នៅពាក់កណ្តាលឆ្នាំ ក្រោយ។ ទី២ សហគមន៍អន្តរជាតិ និងប្រេស៊ីលដែលជាប្រទេសជិតខាងរបស់ប្រទេសទាំងពីរពិតជាមិនយល់ព្រម។ ហ្គីយ៉ានផ្ទាល់ តែម្តងនឹងមិនសុខចិត្តរបូតបាត់ដែនដី ដែលតំណាងឲ្យ៦០%នៃទឹកដីរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ