ចិននិងអាមេរិកប្រកាសបង្កើតក្រុមការងាររួម ដើម្បីអាកាសធាតុ
ចិននិងសហរដ្ឋអាមេរិកបានប្រកាសនៅថ្ងៃពុធទី១៥វិច្ឆិកា២០២៣ បង្កើតក្រុមការងាររួមថ្មីមួយស្តីពីអាកាសធាតុ។ ការពង្រឹងកិច្ចសហប្រតិបត្តិការផ្នែកអាកាសធាតុរវាងប្រទេសទាំងពីរដែលជាលទ្ធផលនៃការជួបប្រជុំថ្នាក់បេសិតពិសេសទទួលបន្ទុកអាកាសធាតុ លោកចនឃែរី និងលោក ស៊ី សេនហួរ ប្រកាសឡើងតែប៉ុន្មានម៉ោងមុនជំនួបរវាងលោកប្រធានាធិបតីអាមេរិកចូបៃដិន និងសមភាគីចិនលោកស៊ីជីនពីង នៅសាន់ហ្វ្រាន់ស៊ីស្កូតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
សហរដ្ឋអាមេរិកនិងចិន មហាអំណាចពិភពលោកបញ្ចេញផ្សែងពុលខ្លាំងជាងគេទាំងពីរធ្លាប់សហការនិងមានភាពសម្រុងគ្នាក្នុងវិស័យអាកាសធាតុតាំងពីជាយូរឆ្នាំមកហើយ។ នៅថ្ងៃពុធនេះ មហាអំណាចទាំងពីរ បានសម្រេចបង្កើតក្រុមការងាររួមថ្មីទៀត ដើម្បីផ្តុំគិតគូរអំពីអន្តរកាលថាមពល មេតាន អំពីគំរូសេដ្ឋកិច្ចបែបនិរន្តភាព និងប្រសិទ្ធភាពនៃធនធានធម្មជាតិ ព្រមទាំងការកាប់ព្រៃឈើ។ នេះបើតាមសេចក្តីថ្លែងការណ៍រួមរបស់រដ្ឋចិននិងអាមេរិក។ បើតាមសេចក្តីថ្លែងការណ៍ដដែល សមាជិកក្រុមការងាររួមត្រូវដឹកនាំជជែកពិភាក្សានិងសម្របសម្រួលគ្នា ដើម្បីពន្លឿនសកម្មភាពជាក់ស្តែងក្នុងផ្នែកអាកាសធាតុ ដោយធ្វើការរួមគ្នាផង ធ្វើការជាមួយភាគីផ្សេងផង សម្រាប់ជាប្រយោជន៍មនុស្សជាតិសម័យនេះនិង ជំនាន់ក្រោយ។
ក្រុមការងារក៏មានភារៈផ្តល់សន្ទុះដល់កិច្ចចរចាទ្វេភាគីស្តីពីនយោបាយ និងយុទ្ធសាស្ត្រថាមពល ព្រមទាំងការផ្តោះប្តូរនយោបាយជុំវិញដំណោះស្រាយសេដ្ឋកិច្ចថាមពលរនិងការកាត់បន្ថយការបញ្ចេញឧស្ម័នកាបូនឱ្យកាន់តែស៊ីជម្រៅ។ ជាងនេះទៅទៀត សហរដ្ឋអាមេរិកនិងចិនបានប្តេជ្ញាផងដែរ ថានឹងចាប់បើកកិច្ចសហប្រតិបត្តិការបច្ចេកទេសស្តីពីការកាត់បន្ថយឧស្ម័នមេតានភ្លាម។ ភាគីទាំងពីរបានព្រមព្រៀងគ្នាថាកម្មវត្ថុកាត់បន្ថយការបញ្ចេញផ្សែងពុលមេតាននឹងមានចែងក្នុង ផែនការជាតិកាត់បន្ថយឧស្ម័នផ្ទះកញ្ចក់នៅឆ្នាំ២០៣៥។ ចិនដែលជាប្រទេសបញ្ចេញមេតានខ្លាំងជាងគេនៅលើពិភពលោក បានបង្ហើបបង្ហាញផែនការគ្រប់គ្រងការបញ្ចេញឧស្ម័នផ្ទះកញ្ចក់កាលពីសប្តាហ៍មុន តែមិនបានកំណត់កម្មវត្ថុជាក់ច្បាស់ទេ។
ជាចុងក្រោយ ចិននិងសហរដ្ឋអាមេរិកបានបញ្ជាក់ជាថ្មីរួមគ្នានូវឆន្ទៈគោរពកម្មវត្ថុមានចែងក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ ដែលចង់ទប់ការឡើងកម្តៅនៃភពផែនដីក្រោម២អង្សាឬបើអាចត្រឹម១,៥អង្សា។
សេចក្តីប្រកាសបង្កើតក្រុមការងាររួមស្តីពីអាកាសធាតុរវាងអាមេរិកនិងចិន ធ្វើឡើងតែប៉ុន្មានម៉ោងមុនជំនួបរវាងលោកប្រធានាធិបតីអាមេរិកចូបៃដិន និងលោកប្រធានាធិបតីចិនស៊ីជិនពីង នៅក្រុងសាន់ហ្វ្រាន់ស៊ីស្កូ និងត្រូវបានគេចាត់ទុកជាកម្លាំងចលករដ៏គន្លឹះសម្រាប់ផ្តល់សន្ទុះដល់កិច្ចចរចាអាកាសធាតុ។ ជោគជ័យនៃសន្និសីទអង្គការសហប្រជាជាតិស្តីពីអាកាសធាតុCOP២៨នៅទីក្រុងឌូបៃប្រទេសអារ៉ាប៊ីសាអូឌីតពីថ្ងៃទី៣០វិច្ឆិកាដល់ថ្ងៃទី១២ធ្នូ២០២៣ រំពឹងមួយភាគធំលើកិច្ចសហប្រតិបត្តិការចិនអាមេរិកនេះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ