លោកចូ បៃដិនជួបនាយករដ្ឋមន្ត្រីស៊ុយអែត និងអះអាងថាអាមេរិកគាំទ្រឲ្យស៊ុយអែត ក្លាយជាសមាជិកអូតង់
កាលពីថ្ងៃពុធទី៥កក្កដា លោកនាយករដ្ឋមន្ត្រីស៊ុយអែត បានទៅជួបលោកប្រធានាធិបតីចូ បៃដិន នៅឯសេតវិមាន។ នៅក្នុងជំនួបនោះ លោកចូ បៃដិន បានអះអាងថាសហរដ្ឋអាមេរិក ពិតជាចង់ឃើញស៊ុយអែត ក្លាយជាសមាជិកពេញសិទ្ធិរបស់អូតង់។ ការចូលជាសមាជិក ដែលមេដឹកនាំទាំង២ សង្ឃឹមថានឹងត្រូវសម្រេចនាឱកាសជំនួបកំពូលអូតង់ នៅទីក្រុងវីលនូស នាសប្តាហ៍ក្រោយនេះ។
ចុះផ្សាយនៅថ្ងៃ៖
ស្តាប់ - ០២:១៨
យោងតាមលិខិតប្រកាសរបស់សេតវិមាន លោក Ulf Kristersson នាយករដ្ឋមន្ត្រីស៊ុយអែត និងលោកចូ បៃដិន បានលើកឡើងអំពីការសហការជួយទំនុកបម្រុងអ៊ុយក្រែន ក្នុងការធ្វើសង្គ្រាមប្រឆាំងនឹងការឈ្លានពានរបស់រុស្ស៊ី។ មេដឹកនាំទាំង២ ក៏បាននិយាយគ្នាផងដែរ អំពីការសហការរួមគ្នា ទប់ទល់ជាមួយនឹងការគម្រាមរបស់ចិន ព្រមទាំងការពួតកម្លាំងគ្នាផ្នែកសន្តិសុខការពារជាតិ។
លោកចូ បៃដិន បានធានាប្រាប់លោកនាយករដ្ឋមន្ត្រីស៊ុយអែតថា រដ្ឋាភិបាលអាមេរិក គាំទ្រយ៉ាងពេញទំហឹងចំពោះបេក្ខភាពចូលជាសមាជិកអង្គការសម្ព័ន្ធមិត្តអូតង់ របស់ស៊ុយអែត។ ថ្នាកដឹកនាំទាំង២ បានប្រកាសដូចគ្នា ថារំពឹងរងចាំជំនួបកំពូលអូតង់នៅសប្តាហ៍ក្រោយ នៅទីក្រុងវីកនូស យ៉ាងអន្ទះសាបំផុត។
សូមបញ្ជាក់ថា អូតង់នឹងបើកជំនួបកំពូលរបស់ខ្លួន ចាប់ពីថ្ងៃទី១១ ដល់ថ្ងៃទី១២កក្កដា នៅរដ្ឋធានីប្រទេសលីទុយអានី។ តាមការរំពឹងទុក គេសង្ឃឹមថាបេក្ខភាពរបស់ស៊ុយអ៊ែត នឹងត្រូវប្រទេសសមាជិកអូតង់ទាំង៣១ប្រទេស អនុម័តយល់ព្រមនាពេលនោះ ព្រោះពេលវេលានេះសមស្របបំផុត ខណៈដែលអឺរ៉ុបកំពុងតែរងការគំរាមសន្តិសុខពីសណាក់រុស្ស៊ី។
តែយ៉ាងណាក៏ដោយ គិតត្រឹមពេលនេះ គឺមានប្រទេស២ដែលនៅតែមិនទាន់ យល់ព្រមទទួលយកបេក្ខភាពរបស់ស៊ុយអែតទេ នោះគឺតួកគី និងហុងគ្រី។ តួកគីបានបង្ហាញជំហររឹងរូសជាងគេ ដោយបានស្តីបន្ទោសរដ្ឋាភិបាលស៊ុយអែត ថាមានគោលនយោបាយគាំទ្របើកដៃ ឲ្យចលនានយោបាយប្រឆាំងនៅតួកគីមួយ ឈ្មោះថា បក្សពលករគួកឌីស្ថាន PKK អាចមានវត្តមានធ្វើសកម្មភាពនៅអ៊ុយអែត។ ចលនានយោបាយនេះ ត្រូវបានរដ្ឋាភិបាលលោកអ៊ែរដូហ្កាន់ ចាត់បញ្ចូលក្នុងបញ្ជីរខ្មៅជាក្រុមភេរវកម្ម។
គួរបញ្ជាក់ដែរថា ក្នុងសំណុំរឿងនេះ គេនឹងមានការប្រជុំមួយដើម្បីសម្រុះសម្រួល ចរចាគ្នានៅក្រុងព្រុចស៊ែល រវាងតំណាងរដ្ឋាភិបាលស៊ុយអែត និងតួកគី នៅថ្ងៃព្រហស្បតិ៍ទី៦កក្កដា។ កាលពីថ្ងៃពុធទីម្សិលមិញ លោកអង់តូនីប្លីងកិន បានថ្លែងក្នុងន័យដាស់តឿនទៅកាន់ភាគីតួកគីថា “ក្នុងអំឡុងពេលនេះ តួកគីត្រូវតែគិតគូរ ដល់សារៈសំខាននៃឯកភាពរបស់អង្គការសម្ព័ន្ធមិត្តអូតង់”។ ក្នុងន័យនេះ លោកបានអំពាវនាវថា តួកគីត្រូវតែឈប់បដិសេធរារាំង មិនឲ្យស៊ុយអែតចូលជាសមាជិកពេញសិទ្ធិរបស់អូតង់ តទៅទៀតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ