Starship ត្រូវផ្ទុះ នៅក្នុងការហោះសាកល្បងលើកទីមួយ
Starship ដែលជារ៉ុកកែតអវកាសដ៏ខ្លាំងបំផុតមិនធ្លាប់មាន ក្នុងប្រវត្តិសាស្រ្ត ត្រូវផ្ទុះ នៅក្រោយពេលហោះចេញផុតពីដី នៅក្នុងការបាញ់បង្ហោះសាកល្បងជាលើកដំបូង នៅថ្ងៃព្រហស្បតិ៍ ២០មេសានេះ។
ចុះផ្សាយនៅថ្ងៃ៖
រ៉ុកកែត Starship ជាមួយនឹងម៉ូទ័រ Raptor ទាំង ៣៣គ្រឿង នៅលើប៊ូស្ទ័រ Super Heavy ត្រូវបានបង្ហោះចេញផុតពីដី ក៏ប៉ុន្តែ បានត្រឹមតែប៉ុន្មាននាទី រ៉ុកកែតក៏ត្រូវផ្ទុះ នៅមុនពេលដែល Super Heavy ត្រូវផ្តាច់ខ្លួនចេញពីតួយាន Starship។
ទោះជាយ៉ាងនេះក៏ដោយ លោក Elon Musk បានអបអរសាទរ ចំពោះក្រុមការងាររបស់ SpaceX ដោយបានលើកឡើងថា អ្វីដែលកើតឡើងនៅថ្ងៃនេះនឹងជាបទពិសោធន៍ សម្រាប់ត្រៀមរៀបចំការបាញ់បង្ហោះសាកល្បងសាជាថ្មី នៅក្នុងរយៈពេលប៉ុន្មានខែខាងមុខ។
Congrats @SpaceX team on an exciting test launch of Starship!
— Elon Musk (@elonmusk) April 20, 2023
Learned a lot for next test launch in a few months. pic.twitter.com/gswdFut1dK
គួររំឮកឡើងវិញថា ការបាញ់បង្ហោះសាកល្បង Starship នេះ ត្រូវបានគេប៉ុនប៉ងធ្វើម្តងរួចមកហើយ កាលពីថ្ងៃចន្ទកន្លងទៅ ក៏ប៉ុន្តែត្រូវបានគេលើកពេល ដោយសារតែមានបញ្ហាបច្ចេកទេស ទាក់ទងនឹងស៊ូប៉ាប់ ក្នុងប្រព័ន្ធដំឡើងសម្ពាធក្នុងប៊ូស្ទ័រ Super Heavy។ យាន Starship មួយផ្នែកខាងលើ ធ្លាប់ត្រូវបានគេបាញ៉បង្ហោះសាកល្បងជាច្រើនលើករួចមកហើយ ក៏ប៉ុន្តែ នេះជាលើកទីមួយ ដែលគេសាកល្បង Starship ទាំងមូល គឺទាំងយាន និងទាំងប៊ូស្ទ័រ Super Heavy។
Starship ទាំងមូលនេះ គឺជារ៉ុកកែតអវកាសដ៏ខ្លាំងជាងគេបំផុតមិនធ្លាប់មានក្នុងប្រវត្តិសាស្រ្ត ពោលគឺ មានកម្លាំងខ្លាំងជាងរ៉ុកកែត SLS ក្នុងគម្រោងអារតេមីសរបស់ណាសាបច្ចុប្បន្ន និងខ្លាំងជាងរ៉ុកកែតធុន Saturn V ក្នុងគម្រោងអាប៉ូឡូ កាលពីអំឡុងទសវត្សរ៍ឆ្នាំ៦០ និង៧០ទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ