ហៃទី៖ផ្ទុះបាតុកម្មហិង្សា និងការលួចប្លន់ ក្រោយរដ្ឋាភិបាលប្រកាសដំឡើងថ្លៃប្រេងឥន្ធនៈ
នៅក្នុងប្រទេសហៃទី មានផ្ទុះបាតុកម្មយ៉ាងហិង្សាដោយមានការដុតបំផ្លាញ និងការចូលលួចប្លន់ទំនិញនៅតាមហាងលក់ទំនិញ ពិសេសនៅក្នុងឃ្លាំស្តុកឥវ៉ាន់របស់អង្គការកម្មវិធីស្បៀងពិភពលោក។ ក្បួនបាតុកម្មបានផ្ទុះឡើង ក្រោយពីរដ្ឋាភិបាលបានប្រកាសដំឡើងថ្លៃប្រេងឥន្ធនៈ។ លោកហ្សង់ ម៉ាតាំង បូអេ នាយកកម្មវិធីស្បៀងពិភពលោកប្រចាំហៃទីបានថ្លែងថា ឥវ៉ាន់ដែលកម្មវិធីស្បៀងពិភពលោកបានស្តុកក្នុងឃ្លាំនៅក្រុងហ្គោណៃអ៊ីវជាចំណីអាហារដែលអាចចិញ្ចឹមកូនសិស្សសាលាបានចំនួន ១០០ ០០០នាក់។ តាមលោកហ្សង់ ម៉ាតាំង បូអេ អំពើហិង្សា និងបាតុកម្មពេលនេះបានកើនឡើងមួយកម្រិតទៀត ខណៈដែលហៃទីបាន និងកំពុងបន្តជួបវិបត្តិខ្វះស្បៀង។ តែនាយកកម្មវិធីស្បៀងពិភពលោកប្រចាំហៃទីរូបនេះមិនភ្លេចបញ្ជាក់ថា អង្គការកម្មវិធីស្បៀងពិភពលោកនឹងបន្តជួយហៃទីដោយមិនបោះបង់ចោលទេ។
ចុះផ្សាយនៅថ្ងៃ៖
ស្តាប់ - ០១:៥៥
« មនុស្សមួយក្រុមមានគ្នាច្រើនគួរសមបានមកដល់មុខការិយាល័យរបស់កម្មវិធីស្បៀងពិភពលោកក្នុងក្រុងហ្គោណៃអ៊ីវ។ ពួកគេបានចាប់ផ្តើមសម្រុកចូលយកចំណីអាហារដែលយើងបានស្តុកទុកក្នុងឃ្លាំនៅទីនោះ។ បន្ទាប់មក ពួកគេក៏បានដុតឃ្លាំស្តុកឥវ៉ាន់របស់យើង។ តែសំណាងល្អ គ្មានបុគ្គលិករបស់យើងណាម្នាក់បានរងរបួសទេ។ ការបាត់បង់របស់យើងច្រើនជាសម្ភារៈ ពិសេសមានការលួចយកចំណីអាហារប្រមាណជា ១ ៤០០តោន។
ខ្ញុំមានការសោកស្តាយ ព្រោះចំណីអាហារទាំងនេះទុកសម្រាប់បម្រើឲ្យកម្មវិធីចំណីអាហាររបស់សិស្សសាលានៅហៃទី។ បរិមាណចំណីអាហារដែលក្រុមបាតុករបានលួចយកទៅ គឺគ្រប់គ្រាន់ដើម្បីចិញ្ចឹមកូនសិស្សសាលាចំនួន ១០០ ០០០នាក់សម្រាប់រយៈពេល ៣ខែ។ ព្រឹត្តិការណ៍នេះបានកើតមានឡើង ខណៈដែលថ្ងៃចូលរៀនត្រូវចាប់ផ្តើមនៅ ២សប្តាហ៍ខាងមុខ ពោលនៅដើមខែតុលា។
ដូច្នេះអ្នកដែលបានប្រឈមនឹងព្រឹត្តិការណ៍លួច ប្លន់ពេលនេះ គឺកូនសិស្សសាលាប្រុស ស្រី។ សព្វថ្ងៃនេះ ហៃទីកំពុងប្រឈមនឹងវិបត្តិខ្វះស្បៀង។ នៅទូទាំងប្រទេស មានពលរដ្ឋហៃទីជាង ៤លាននាក់កំពុងស្ថិតក្នុងស្ថានភាពអសន្តិសុខស្បៀង។ ហៃទីជាប្រទេសមួយដែលកំពុងត្រូវការជំនួយមនុស្សធម៌។ យើងនឹងបន្តកម្មវិធីរបស់យើងដើម្បីជួយទំនុកបម្រុងដល់តម្រូវការរបស់ប្រជាជនហៃទី។
តែខ្ញុំអាចនិយាយថា ដោយសារតែហេតុផលអសន្តិសុខសព្វថ្ងៃ យើងបានផ្អាកសកម្មភាពរបស់យើងតាំងពី ៤ថ្ងៃមកហើយ ព្រោះក្រុមការងាររបស់យើងមិនអាចធ្វើការបម្លាស់ទីនៅក្នុងប្រទេសបានទេ។ ដូច្នេះ គេត្រូវតែចាប់ដាក់ឲ្យដំណើរការឡើងវិញនូវកម្មវិធីផ្តល់ជំនួយដើម្បីជួយផ្គត់ផ្គង់ដល់ប្រជាជនដែលកំពុងជួបការលំបាកច្រើន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ