ហៃទី សុំជំនួយទ័ពពីអាមេរិកនិងអង្គការសហប្រជាជាតិ តែវ៉ាស៊ីនតោនបដិសេធ
បីថ្ងៃក្រោយឃាតកម្មសម្លាប់ប្រធានាធិបតី អាជ្ញាធរហៃទីបានស្នើសុំទៅសហរដ្ឋអាមេរិក និងអង្គការសហប្រជាជាតិ ឱ្យបញ្ជូនទ័ពមកជួយការពារសន្តិសុខប្រទេសហៃទី ដើម្បីអាចរៀបចំការបោះឆ្នោតប្រធានាធិបតី និងសភាបានតាមគម្រោង។ ប៉ុន្តែសហរដ្ឋអាមេរិកបានបដិសេធ ដោយព្រមផ្តល់ត្រឹមជំនួយសហការស៊ើបអង្កេតតែប៉ុណ្ណោះ។ ចំណែកអង្គការសហប្រជាជាតិ កំពុងពិចារណា។
ចុះផ្សាយនៅថ្ងៃ៖ កែប្រែថ្ងៃទី៖
ខ្លាចរចនាសម្ព័ន្ធយុទ្ធសាស្ត្រ ដូចជាអាកាសយានដ្ឋាន កំពង់ផែ កន្លែងស្តុកប្រេងឆៅ ឬការដឹកជញ្ជូនប្រេង ដែលជាអាយុជីវិតរបស់ប្រទេសរងការវាយប្រហារ ជាយថាហេតុណាមួយ រដ្ឋាភិបាលហៃទី បានដាក់សំណើសុំជំនួយកងទ័ពពីសហរដ្ឋអាមេរិក និងពីអង្គការសហប្រជាជាតិ ឱ្យមកជួយការពារសន្តិសុខទីតាំងទាំងអស់នេះ។ ម្យ៉ាងវិញ ហៃទីត្រូវការមានជំនួយយោធាអាមេរិកនិងអង្គការសហប្រជាជាតិ ដើម្បីធានាសុវត្ថិភាពនិងសន្តិសុខ នៅពេលរៀបចំបោះឆ្នោតប្រធានាធិបតីនិងសភា ដែលគ្រោងនឹងប្រព្រឹត្តទៅនៅថ្ងៃទី ២៦ កញ្ញា២០២១នេះ។
អ្នកនាំពាក្យក្រសួងការបរទេសអាមេរិកបានអះអាងថា រដ្ឋាភិបាលហៃទីពិតជាបានធ្វើសំណើនេះមែន ហើយសហរដ្ឋអាមេរិកកំពុងទាក់ទងជាមួយអ្នកទទួលខុសត្រូវហៃទី ជាប់រហូតមកដើម្បីរកដំណោះស្រាយ។ ប៉ុន្តែក្នុងដំណាក់កាលនេះ អាមេរិកមិនអាច និងគ្មានផែនការបញ្ជូនជំនួយយោធាទៅហៃទី តាមសំណើបានទេ។ នេះបើតាមការអះអាងរបស់អ្នកទទួលខុសត្រូវរដ្ឋបាលអាមេរិក។ ផ្ទុយទៅវិញ អាមេរិកនឹងបញ្ជូនអ្នកទទួលខុសត្រូវនៃទីភ្នាក់ងារសហព័ន្ធស៊ើបអង្កេតអាមេរិក FBI និងអ្នកជំនាញនៃក្រសួងមហាផ្ទៃអាមេរិក ទៅកាន់ក្រុងព័រអូប្រាំង ក្នុងពេលឆាប់ៗបំផុតតាមដែលអាចធ្វើទៅបាន ដើម្បីផ្តល់ប្រឹក្សានិងជំនួយខាងផ្នែកស៊ើបអង្កេត។
មេប៉ូលិសទទួលបន្ទុករក្សាសន្តិសុខប្រធានាធិបតីផ្ទាល់ ត្រូវបានតុលាការកោះហៅទៅសួរចម្លើយ។ ការសួរចម្លើយ នាយប៉ូលិសជាច្រើនទៀត ដែលសង្ស័យថាមានពាក់ព័ន្ធនឹងឃាតកម្មសម្លាប់ប្រធានាធិបតី បានមកច្របល់ហេតុការណ៍ឱ្យកាន់តែវិលវល់។
បើតាមប្រភពការទូតរបស់អង្គការសហប្រជាជាតិវិញ ការិយាល័យកិច្ចការនយោបាយនិងសន្តិភាព កំពុងចាប់ផ្តើមសិក្សាសំណើសុំជំនួយទ័ពរបស់ហៃទីហើយដែរ។ សំណើសុំទ័ព ទោះក្នុងលក្ខខណ្ឌណាក៏ដោយ ក៏ត្រូវសម្រេចដោយក្រុមប្រឹក្សាសន្តិសុខអង្គការសហប្រជាជាតិ តាមរយៈការចេញនិងអនុម័តជាសេចក្តីសម្រេចចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ