អ.ស.ប. ៖ មានសមាជិកជិតពាក់កណ្តាល មិនគោរពកិច្ចព្រមព្រៀងអាកាសធាតុក្រុងប៉ារីស
នៅក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ រដ្ឋជាសមាជិកអង្គការសហប្រជាជាតិទាំងប្រមាណ២០០ប្រទេសបានប្តេជ្ញាប្រឹងទប់ស្កាត់ការឡើងកម្តៅអាកាសធាតុឱ្យនៅ ក្រោម២អង្សា ឬបើអាចត្រឹមមួយអង្សាកន្លះ បើប្រៀបធៀបទៅនឹងសម័យមុនឧស្សាហកម្ម។ ប៉ុន្តែ៥ឆ្នាំក្រោយការចុះហត្ថលេខាលើកិច្ចព្រមព្រៀង មានបណ្តាប្រទេសជាសមាជិកអង្គការសហប្រជាជាតិតែជាងពាក់កណ្តាលបន្តិចប៉ុណ្ណោះ ដែលមានផែនការអាកាសធាតុប្រកបដោយមហិច្ឆតាពិតៗ។ នេះបើតាមអ្នកទទួលខុសត្រូវអាកាសធាតុនៅអង្គការសហប្រជាជាតិលោកស្រី Patricia Espinosa ដែលបានចេញសេចក្តីអំពាវនាវនៅថ្ងៃសៅរ៍ទី៣១កក្កដានេះ ឱ្យគ្រប់គ្នាពង្រឹងពង្រីកកម្មវត្ថុអាកាសធាតុ។
ចុះផ្សាយនៅថ្ងៃ៖
ស្តាប់ - ០២:២៣
បើតាមកិច្ចព្រមព្រៀងអាកាសធាតុក្រុងប៉ារីស ប្រទេសហត្ថលេខីទាំងអស់ ត្រូវកែសម្រួលកម្មវត្ថុប្រយុទ្ធប្រឆាំងនឹងការប្រែប្រួលអាកាសធាតុរបស់ខ្លួន ឬហៅថា “ផែនការអាកាសធាតុថ្នាក់ជាតិ" ឡើងវិញ និងត្រូវប្រគល់ជូនអង្គការសហប្រជាជាតិឱ្យបានយ៉ាងយូរត្រឹមចុងឆ្នាំ២០២០។
ប៉ុន្តែដោយហេតុកូវីដ និងដោយហេតុតែសន្និសីទអន្តរជាតិស្តីអំពីអាកាសធាតុលើកទី២៦ COP26 នៅក្រុង Glasgow ត្រូវលើកពេលទៅធ្វើនៅខែវិច្ឆិកា ២០២១វិញ រដ្ឋាភិបាលជាច្រើនក៏ឆ្លៀតឱកាសមិនគោរពកាលបរិច្ឆេទកំណត់ក្នុងកិច្ចព្រមព្រៀងដែរ។
មកទល់នឹងថ្ងៃទី ១ មករា ២០២១ មានប្រទេសចំនួន តែ៧៥ ប៉ុណ្ណោះ ដែលបានរៀបចំផែនការអាកាសធាតុថ្មីរួចស្រេចបាច់។ នៅក្នុងចំណោមនោះ ភាគច្រើនជាប្រទេសក្នុងសហភាពអឺរ៉ុប និងតិចតួចបំផុតជាប្រទេសបញ្ចេញផ្សែងពុលខ្លាំង។
ប្រឈមនឹងភាពយឺតយ៉ាវនេះ អង្គការសហប្រជាជាតិបានកំណត់ឱសានវាទថ្មី ទុកពេលឱ្យប្រទេសនីមួយៗសើរើមើលមហិច្ឆតាអាកាសធាតុរបស់ខ្លួនឡើងវិញ រហូតដល់ថ្ងៃទី ៣០កក្កដា ឆ្នាំ២០២១ និងឱ្យបានមុនជំនួបប្រជុំដ៏សំខាន់សម្រាប់អនាគតភពផែនដី។ ប៉ុន្តែជាថ្មីម្តងទៀត មកដល់ថ្ងៃសុក្រទី ២៩កក្កដាទៅហើយ មានប្រទេសចំនួនតែ១១០ទេ ដែលបានលាតត្រដាងផែនការអាកាសធាតុថ្មីរបស់ខ្លួន។ ពោលគឺមានប្រទេសហត្ថលេខីតែ៥៤%ប៉ុណ្ណោះដែលបានគោរពពាក្យសន្យា។
ការវិភាគបឋម បានបង្ហាញឱ្យឃើញថា ផែនការអាកាសធាតុរបស់៧៥ប្រទេសដំបូងនេះ អាចកាត់បន្ថយការបញ្ចេញឧស្ម័នកាបូនិក នៅឆ្នាំ២០៣០ (បើប្រៀបទៅនឹងឆ្នាំ២០១០) មិនបាន ១%ផង។ គឺទាបជាងការទាមទាររបស់ក្រុមអ្នកជំនាញអាកាសធាតុឆ្ងាយណាស់។ ភ្នាក់ងារជំនាញអាកាសធាតុអង្គការសហប្រជាជាតិ ព្យាករថា ដើម្បីអាចសម្រេចកម្មវត្ថុទប់កម្តៅអាកាសធាតុឱ្យឡើងត្រឹម១អង្សាកន្លះ នៅចុងសតវត្សរ៍ គេត្រូវកាត់បន្ថយឧស្ម័នផ្ទះកញ្ចក់ចំនួន ៤៥% បើប្រៀបទៅនឹងសម័យមុនឧស្សាហកម្ម។
ដូច្នេះគ្រប់ប្រទេសត្រូវតែមានផែនការអាកាសធាតុប្រកបដោយមហិច្ឆតាបំផុត និងឱ្យបានលឿនបំផុត ទើបអាចជួយផែនដីបាន។
សូមបញ្ជាក់នៅក្នុងចំណោមប្រទេសដែលទើបលើកផែនការអាកាសធាតុថ្មីចុងក្រោយគេ មានជាអាទិ៍កាណាដា និងសហរដ្ឋអាមេរិក ដែលក្រោមអាណត្តិលោកចូបៃដិនបានត្រលប់មកគោរពកិច្ចព្រមពៀងក្រុងប៉ារីសវិញ។ ចំណែកចិន ដែលប្រកាសធ្វើអព្យាក្រិតកាបោននៅឆ្នាំ២០៦០ មិនទាន់បង្ហាញផែនការអាកាសធាតុថ្មីជូនអង្គការសហប្រជាជាតិទេ។ ឥណ្ឌានិងអាហ្វ្រិកខាងត្បូង ក៏មិនទាន់មានផែនការថ្មីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ