អាមេរិក៖ហេតុអ្វីបានជាអ្នកចាក់វ៉ាក់សាំងដូសទី១ ហើយបែរជាមិនចង់ ឬមិនចាក់ដូសទី២?
នៅសហរដ្ឋអាមេរិក មានពលរដ្ឋចំនួន ២៤៣លាននាក់បានចាក់វ៉ាក់សាំងបង្ការកូវីដ១៩ ក្នុងនោះ មានជាង ៣០% បានចាក់ទាំង ២ដូស និងមាន ៥៥% ទើបបានចាក់ដូសទី១។ តែរដ្ឋអំណាចកំពុងបារម្ភពីអ្នកដែលមិនព្រមទៅចាក់ដូសទី២ តាមការណាត់ជួប។ មជ្ឈមណ្ឌលប្រយុទ្ធប្រឆាំងនឹងជំងឺឆ្លងបានឲ្យដឹងថា មាន ៨% នៃចំនួនអ្នកចាក់ដូសទី១ រួចហើយមិនបានទៅចង់ដូសទី២ តាមការកំណត់ទេ ពោលមានជាង ៥លាននាក់។ ហេតុអ្វីបានជាអ្នកចាក់វ៉ាក់សាំងដូសទី១ ហើយបែរជាមិនចង់ចាក់ដូសទី២?។
ចុះផ្សាយនៅថ្ងៃ៖
ស្តាប់ - ០១:៥៩
តាមការបញ្ជាក់របស់មជ្ឈមណ្ឌលប្រយុទ្ធប្រឆាំងនឹងជំងឺឆ្លង មានហេតុផលសំខាន់ចំនួន ៣ ដែលបញ្ជាក់ពីការមិនចង់ទៅចាក់ចាក់វ៉ាក់សាំងដូសទី២ របស់ពលរដ្ឋមួយចំនួនដែលបានចាក់ដូសទី១ រួចហើយ។ ហេតុផលទី១ ពលរដ្ឋអាមេរិកខ្លះបាននិយាយត្រង់ៗពីការខ្លាចផលរំខានសម្រាប់ដូសទី២ ជាងដូសទី១ ដូចយ៉ាងក្តៅខ្លួន ឈឺសាច់ដុំ ឬមួយក៏ឈឺក្បាលជាដើម។ ហេតុផលទី២ ពលរដ្ឋអាមេរិកខ្លះទៀតមានអារម្មណ៍ទទួលបានការពារគ្រប់គ្រាន់ប្រឆាំងនឹងវីរុសកូវីដ១៩ ជាមួយនឹងដូសទី១ និងគិតថា វាមិនចាំបាច់នឹងចាក់ដូសទី២ ទៀតទេ។ ចំណែកហេតុផលទី៣ ចុងក្រោយត្រូវបានមជ្ឈមណ្ឌលប្រយុទ្ធប្រឆាំងនឹងជំងឺឆ្លងមើលឃើញថា គឺការគ្មានប្រភេទវ៉ាក់សាំងដូចគ្នានឹងការចាក់ដូសទី១។
ឧទាហរណ៍ជាក់ស្តែង អ្នកដែលបានចាក់ដូសទី១ ជាវ៉ាក់សាំង Pfizer ពិបាកនឹងរកកន្លែងចាក់ដូសទី២ ជាប្រភេទវ៉ាក់សាំង Pfizer ដូចគ្នា។ ជាលទ្ធផល ចំនួនចាក់វ៉ាក់សាំងប្រចាំថ្ងៃមានការធ្លាក់ចុះយ៉ាងគំហុក ខណៈដែលរដ្ឋអំណាចបានបើកយុទ្ធនាការចាក់វ៉ាក់សាំងសម្រាប់មនុស្សធំទាំងអស់ដោយគ្មានលក្ខខណ្ឌ។ ក្រៅពីបារម្ភនឹងកំណើនចំនួនអ្នកដែលមិនព្រមទៅចាក់វ៉ាក់សាំងដូសទី២ តាមពេលវេលាកំណត់ រដ្ឋអំណាចកំពុងប្រឈមនឹងភាពរារែក អល់អែករបស់ពលរដ្ឋមួយចំនួនដែលបន្តមិនព្រមចាក់វ៉ាក់សាំងតែម្តង។ ហេតុផលទាំងពីរនេះនឹងអាចបង្កផលប៉ះពាល់ដល់កម្មវត្ថុនៃភាពស៊ាំរួម ខណៈដែលមានប្រទេសមួយចំនួនកំពុងបន្តប្រឈមនឹងកំណើនករណីឆ្លងកូវីដ១៩។
គួរបញ្ជាក់ថា គិតត្រឹមថ្ងៃអាទិត្យ ទី២ ឧសភា កូវីដ១៩ បានសម្លាប់មនុស្សជាង ៣លាននាក់ និងមានអ្នកឆ្លងជាង ១៥២លាននាក់នៅទូទាំងពិភពលោក។ អាមេរិកជាប្រទេសដែលមានចំនួនអ្នកស្លាប់ច្រើនជាងគេ និងបន្តពីក្រោយដោយប្រេស៊ីល ម៉ិចស៊ិក ឥណ្ឌា និងប្រទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ