កាន់តែកៀកដល់ថ្ងៃចុះចេញពីអំណាច លោកដូណាល់ ត្រាំ កាន់តែឯកោ
បន្ទាប់ពីយល់ព្រមចុះហត្ថលេខាលើគម្រោងកញ្ចប់ថវិកាជួយសេដ្ឋកិច្ច ដោយសារតែរងសម្ពាធ លោកដូណាល់ ត្រាំ កំពុងប្រឈមទៅនឹងភាពអាម៉ាស់មួយទៀត ដែលកើតមានឡើងក្នុងសប្តាហ៍នេះ។ រឿងអាម៉ាស់នោះ គឺការបដិសេធរបស់សភាអាមេរិកទៅនឹងសិទ្ធិវ៉េតូរបស់លោកត្រាំ ចំពោះច្បាប់ថវិកាការពារជាតិ។
ចុះផ្សាយនៅថ្ងៃ៖
ស្តាប់ - ០២:០៣
ដើម្បីអាចប្រឆាំងជំទាស់ទៅនឹងការវ៉េតូរបស់លោកដូណាល់ ត្រាំបាន គេត្រូវការសំឡេងឆ្នោតភាគច្រើនចំនួនពីរភាគបីនៅក្នុងសភាអាមេរិក ដែលមានសមាជិក ៤៣៥ នាក់ និងតំណាងព្រឹទ្ធសភាដែលមានចំនួន ១០០ អាសនៈ។
ច្បាប់ថវិកាការពារជាតិ ៧៤០ ពាន់លានដុល្លារកន្លះត្រូវបានសភានិងព្រឹទ្ធសភាអាមេរិកបោះឆ្នោតអនុម័ត ក្នុងសំឡេងភាគច្រើនលើសលុបកាលពីសប្តាហ៍ទី២ នៃខែធ្នូនេះ។
ក៏ប៉ុន្តែ កាលពីថ្ងៃពុធទី ២៣ ធ្នូ លោកប្រធានាធិបតីទី៤៥ របស់សហរដ្ឋអាមេរិកបានជំទាស់ទៅនឹងច្បាប់ថវិកាការពារជាតិក្រោយហេតុផលម្យ៉ាងថាច្បាប់នេះ មិនបានលុបចោលមាត្រាទី២៣០ ដែលចែងអំពីការ ការពារភាពទទួលខុសត្រូវរបស់ក្រុមហ៊ុនអ៊ីនធ័នែត។ មួយវិញទៀត លោកត្រាំ ថាច្បាប់នេះ មានខ្លឹមសារប៉ុនប៉ងដកចេញនូវឈ្មោះមូលដ្ឋានកងទ័ពមួយចំនួនដែលមានជាប់ឈ្មោះក្រុមឧត្តមសេនីយ៍ដែលជាអ្នកបានប្រយុទ្ធការពារទាសភាពក្នុងសម័យសង្គ្រាមស៊ីវិលអាមេរិកពីឆ្នាំ ១៨៦១ ដល់១៨៦៥។
សភាអាមេរិក បានបោះឆ្នោតដោយសំឡេងភាគច្រើន ប្រឆាំងនឹងការវ៉េតូរបស់លោកត្រាំ កាលពីថ្ងៃចន្ទម្សិលមិញ។ ក្រុមអ្នកប្រជាធិបតេយ្យមានសុទិដ្ឋិនិយមថាពួកគេនឹងទទួលបានការគាំទ្រគ្រប់គ្រាន់ពីក្រុមអ្នកសាធារណរដ្ឋដើម្បីធ្វើដូច្នោះបាន។ ចំណែកឯព្រឹទ្ធសភាអាមេរិកវិញនឹងលើកយកបញ្ហានេះទៅជជែកពិភាក្សានៅថ្ងៃអង្គារនេះ។
ប្រសិនណាបើទាំងសភាទាំងពីរ បោះឆ្នោតដោយសំឡេងគាំទ្រភាគច្រើនបដិសេធទៅនឹងសិទ្ធិវ៉េតូរបស់លោកដូណាល់ ត្រាំដែលប្រឆាំងចំពោះច្បាប់ថវិកាការពារជាតិ នោះ មានន័យថា វាជាលើកទីមួយហើយដែលសភាទាំងពីររួមគ្នាពង្វាងសិទ្ធិវ៉េតូរបស់លោកប្រធានាធិបតីអាមេរិកទី៤៥ រូបនេះ។
ក្នុងករណីនេះ លោកដូណាល់ ត្រាំ ទំនងជាជៀសមិនផុតទៀតឡើយពីត្រូវបង្ខំចិត្តបែរមកយល់ព្រម ចុះហត្ថលេខាលើច្បាប់ថវិកាការពារជាតិដូចអ្វីដែលលោកបានធ្វើមុននេះបន្តិចរួចទៅហើយពាក់ព័ន្ធគម្រោងកញ្ចប់ថវិកាជួយសង្គ្រោះសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ