អ.ស.ប.៖ ២០២០ ជាឆ្នាំដែលមានអាកាសធាតុក្តៅខ្លាំងដូចឆ្នាំ ២០១៦ និងឆ្នាំ ២០១៩
នៅថ្ងៃពុធ ទី២ ធ្នូ អង្គការឧតុនិយមអន្តរជាតិដែលជាស្ថាប័នមួយរបស់អង្គការសហប្រជាជាតិបានចេញផ្សាយរបាយការណ៍មួយស្តីពីស្ថានភាពអាកាសធាតុក្នុងពិភពលោក។ របាយការណ៍បានបង្ហាញថា ពីមួយឆ្នាំទៅមួយឆ្នាំក្នុងរយៈពេល ១០ឆ្នាំចុងក្រោយ សីតុណ្ហភាពក្នុងលោកបន្តកើនឡើងជានិច្ច។ តាមរបាយការណ៍ដដែល ទសវត្សពីឆ្នាំ ២០១១ ដល់ឆ្នាំ ២០២០ ជាទសវត្សដែលមានអាកាសធាតុក្តៅខ្លាំង ហើយក្នុងរយៈពេល ៦ឆ្នាំចុងក្រោយគិតពីឆ្នាំ ២០១៥ ជារយៈពេលដែលមានអាកាសធាតុក្តៅខ្លាំងមែនទែន។នៅក្នុងសេចក្តីសន្និដ្ឋាន អង្គការឧតុនិយមសកលបានដាក់ឆ្នាំ ២០២០ ទៅក្នុងចំណាត់ថ្នាក់ទី២ នៃឆ្នាំដែលមានអាកាសធាតុក្តៅខ្លាំង បន្ទាប់ពីឆ្នាំ ២០១៦ និងឆ្នាំ ២០១៩។
ចុះផ្សាយនៅថ្ងៃ៖
ស្តាប់ - ០២:៤៩
« ជាអកុសល ឆ្នាំ ២០២០ ជាឆ្នាំដ៏អស្ចារ្យមួយទៀតសម្រាប់អាកាសធាតុរបស់យើង » នេះជាការថ្លែងរបស់អគ្គលេខាធិការអង្គការឧតុនិយមអន្តរជាតិលោក PetteriTaalas។ តាមរបាយការណ៍របស់អង្គការឧតុនិយមអន្តរជាតិ ពីខែមករាដល់ខែតុលា ឆ្នាំ ២០២០ សីតុណ្ហភាពសកលបានកើនឡើងជាមធ្យមប្រមាណជា ១,២អង្សារធៀបនឹងសីតុណ្ហភាពចន្លោះឆ្នាំ ១៨៥០ និងឆ្នាំ ១៩០០។ អត្រាកំណើននេះបានរុញឆ្នាំ ២០២០ ឲ្យចូលក្នុងឆ្នាំដែលមានសីតុណ្ហភាពក្តៅខ្លាំងលំដាប់ទី២ បន្ទាប់ពីឆ្នាំ ២០១៦ និងឆ្នាំ ២០១៩។ តែចំណាត់ថ្នាក់នេះអាចនឹងប្រែប្រួលនៅពេលដែលអង្គការឧតុនិយមអន្តរជាតិទទួលបានទិន្នន័យពេញមួយឆ្នាំ ២០២០។
ទោះជាយ៉ាងនេះក្តី ស្ថាប័នអន្តរជាតិមួយនេះបានបញ្ជាក់ដោយមិនអល់អែកថា ពិភពលោកនឹងមិនអាចគោរពបាននូវកម្មវត្ថុរបស់កិច្ចព្រមព្រៀងក្រុងប៉ារីសស្តីពីអាកាសធាតុដែលបានចុះហត្ថលេខាដោយ ១៩៥ប្រទេសក្នុងឆ្នាំ ២០១៥ បានឡើយ។ នៅកិច្ចព្រមព្រៀងកាលណោះ ក្រុមប្រទេសហត្ថលេខីបានប្តេជ្ញាទប់សីតុណ្ហភាពក្នុងបរិយាកាសមិនឲ្យកើនលើសកម្រិត ១,៥អង្សារធៀបនឹងសម័យមុនឧស្សាហកម្ម។ តាមការព្យាករណ៍របស់អង្គការឧតុនិយមអន្តរជាតិ សីតុណ្ហភាពសកលជាមធ្យមអាចនឹងកើនលើសពីកម្រិត ១,៥អង្សារពីពេលនេះទៅឆ្នាំ ២០២៤។
កម្តៅខ្លាំង ភ្លើងឆេះព្រៃ ទឹកជំនន់ កំណើនជាតិអាស៊ីតនៅក្នុងសមុទ្រ និងកំណើនព្យុះសង្ឃរានៅអាត្លង់ទិក ទាំងនេះសុទ្ធសឹងជាសញ្ញាដែលបញ្ជាក់ថា បម្រែបម្រួលអាកាសធាតុបានបន្តកើនឡើងមិនចេះចប់ក្នុងឆ្នាំ ២០២០ នេះជាការលើកឡើងរបស់អង្គការឧតុនិយមអន្តរជាតិ។ កំណើនកម្តៅគួរឲ្យចាប់អារម្មណ៍ គឺនៅអាស៊ីខាងត្បូង ពិសេសនៅតំបន់អាក់ទិកស៊ីបេរីដែលសីតុណ្ហភាពបានកើនលើសជាមធម្យមជាង ៥អង្សារ។ នៅតំបន់ស៊ីបេរី សីតុណ្ហភាពនាដំណាច់ខែមិថុនាមានដល់ទៅ ៣៨អង្សារ។ អគ្គីភ័យឆាបឆេះព្រៃឈើនៅប្រទេសអូស្រា្តលី តំបន់ស៊ីបេរី នៅឆ្នេរខាងលិចសហរដ្ឋអាមេរិក និងនៅអាមេរិកឡាទីនជាអគ្គីភ័យសកម្មជាងគេនារយៈពេល ១៨ឆ្នាំចុងក្រោយនេះ។
តំបន់ខ្លះក្នុងទ្វីបអាហ្រ្វិក និងនៅអាស៊ីអាគ្នេយ៍បានជួបប្រទះនូវគ្រោះទឹកជំនន់ដែលបណ្តាលឲ្យមានជនបម្លាស់ទីយ៉ាងច្រើនសម្បើម និងបានធ្វើឲ្យប៉ះពាល់ដល់សន្តិសុខស្បៀងរបស់ប្រជាជនរាប់សិបលាននាក់។ ទន្ទឹមគ្នានេះ បម្រែបម្រួលអាកាសធាតុក៏បានធ្វើឲ្យប៉ះពាល់ដល់សម្បត្តិបេតិភណ្ឌពិភពលោករបស់អង្គការ Unesco ដែរ។ តាមរបាយការណ៍ចេញផ្សាយដោយសហភាពអន្តរជាតិសម្រាប់ការអភិរក្សធម្មជាតិក្នុងថ្ងៃពុធ ទី២ ធ្នូ មានទីតាំងធម្មជាតិចំនួន ១ភាគ៣ ក្នុងចំណោមទីតាំងធម្មជាតិទាំង ២៥២ របស់អង្គការ Unisco បានរងការគំរាមកំហែងដោយបម្រែបម្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ