សហរដ្ឋអាមេរិក៖គណបក្សប្រជាធិបតេយ្យវាយបកលើលោកដូណាល់ ត្រាំក្នុងសំណុំរឿងកូវីដ១៩
នៅសហរដ្ឋអាមេរិក ប្រសាសន៍របស់ប្រធានាធិបតីលោកដូណាល់ ត្រាំក្នុងរឿងកូវីដ១៩ កំពុងបន្តបង្កឲ្យមានប្រតិកម្មខ្លាំងក្លា។ ក្នុងថ្ងៃពុធ ទី១៦ កញ្ញា លោកត្រាំបានថ្លែងជំទាស់ជាសាធារណៈនឹងការលើកឡើងរបស់នាយកមជ្ឈមណ្ឌលត្រួតពិនិត្យ និងបង្ការជំងឺស្តីពីវ៉ាក់សាំងបង្ការកូវីដ១៩។ លោកត្រាំបានអះអាងពីការមានវ៉ាក់សាំងនៅមុនដំណាច់ឆ្នាំ ២០២០ តែនាយកមជ្ឈមណ្ឌលត្រួតពិនិត្យ និងបង្ការជំងឺបានបញ្ជាក់ថា គេត្រូវរង់ចាំនៅឆ្នាំ ២០២១។ បន្ទាប់ពីបានវាយបកលើនាយកមជ្ឈមណ្ឌលត្រួតពិនិត្យ និងបង្ការជំងឺ លោកត្រាំបានយល់ឃើញថា បើគេមិនរាប់បញ្ចូលអ្នកស្លាប់នៅតាមបណ្តារដ្ឋស្ថិតក្រោមការដឹកនាំរបស់គណបក្សប្រជាធិបតេយ្យទេ នោះចំនួនអ្នកស្លាប់ដោយកូវីដនៅអាមេរិកក៏មានមិនសូវច្រើនដែរ។ ការថ្លែងរបស់លោកត្រាំនេះត្រូវបានលោក Chuck Shumer ប្រធានក្រុមសំឡេងភាគតិចនៃគណបក្សប្រជាធិបតេយ្យនៅព្រឹទ្ធសភាវាយបកវិញយ៉ាងចាស់ដៃ។
ចុះផ្សាយនៅថ្ងៃ៖
ស្តាប់ - ០១:៣៤
« បាទ លោកប្រធានាធិបតី ប្រសិនបើលោកមិនរាប់ចំនួនពលរដ្ឋអាមេរិកទាំងអស់ដែលបានស្លាប់ទេ ប្រហែលជាលោកគិតថាវាមិនអាក្រក់ណាស់ណាទេ។ បើលោកបិទភ្នែក ហើយគិតថា ទឹកដីអាមេរិកមានតែពាក់កណ្តាលនោះ ប្រហែលជាមានមនុស្សមួយចំនួនអាចគិតថា លោកបានបំពេញការងារគ្រាន់បើ មិនជាអន់ពេកទេ។ តើមនុស្សប្រភេទណាដែលសម្លឹងឃើញចំនួនពលរដ្ឋស្លាប់នៅក្នុងប្រទេសដែលគាត់ត្រូវដឹកនាំ និងនៅក្នុងការព្យាយាមលើកដំកើងខ្លួនឯងដោយបានទាត់ចោលពលរដ្ឋអាមេរិកដែលបានស្លាប់នៅក្នុងបណ្តារដ្ឋដែលមិនបានបោះឆ្នោតឲ្យគាត់។
គួរឲ្យខ្មាសអៀនណាស់ គឺវាចំឡែកអស្ចារ្យ។ ខ្ញុំស្នើឱ្យប្រធានាធិបតីត្រាំចំណាយពេលខ្លះដើម្បីអានប្រវត្តិរបស់បុរស និងស្ត្រីនៅទូទាំងប្រទេសដែលបានស្លាប់ដោយសារវីរុសដ៏គួរឱ្យភ័យខ្លាចនេះ។ គឺមូលហេតុនេះហើយដែលចំណាប់អារម្មណ៍របស់ប្រធានាធិបតីពិតជាគួរឱ្យរន្ធត់ខ្លាំងណាស់។ តើលទ្ធផលនៃការបោះឆ្នោតមួយត្រូវកំណត់ដូចម្តេច បើជីវិតពលរដ្ឋអាមេរិកទាំងនេះមិនត្រូវបានរាប់បញ្ចូល?។ តើមិនគួរឱ្យខ្លាចទេឬ?។ តើមនុស្សវិកលចរិកបែបណាដែលអាចនិយាយថា ជីវិតរបស់ពលរដ្ឋអាមេរិកទាំងនេះមិនសំខាន់ទេនោះ? »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ