នាយកភ្នាក់ងារឱសថអាមេរិក ថាអាចផ្តល់អាជ្ញាបណ្ណដល់វ៉ាក់សាំងកូវីដ១៩ ទោះការសាកល្បងមិនទាន់ចប់
សហរដ្ឋអាមេរិក អាចនឹងផ្តល់អាជ្ញាបណ្ណឲ្យដល់ថ្នាំវ៉ាក់សាំងការពារជំងឺកូវីដ១៩ណាដែលមាន គេគិតថាមានប្រសិទ្ធិភាព បើទោះបីជាវាកំពុងស្ថិតក្នុងដំណាក់កាលសាកល្បង កម្រិតទី៣ក្តី។ នេះគឺជាការអះអាង របស់លោកនាយកទីភ្នាក់ងារឱសថអាមេរិក ដែលកាសែត The Financial Times បានចុះផ្សាយ កាលពីថ្ងៃអាទិត្យម្សិលមិញ។ ភាពប្រញ៉េបប្រញ៉ាប់ របស់អាជ្ញាធរឱសថអាមេរិកនេះ គឺត្រូវបានមតិមួយចំនួនរិះគន់ថា មកពីទទួលសំពាធពីលោកដូណាល់ ត្រាំ ដែលចង់បានថ្នាំវ៉ាក់សាំងការពារកូវីដ១៩ ឲ្យមានមុនពេលបោះឆ្នោតអាណត្តិថ្មី។
ចុះផ្សាយនៅថ្ងៃ៖
ស្តាប់ - ០២:៤០
លោក Stephen Hahn នាយកទីភ្នាក់ងារឱសថសហរដ្ឋអាមេរិក បានលើកឡើងថា វាអាចទៅរួចដែលស្ថាប័នរបស់លោក នឹងសម្រេចផ្តល់អាជ្ញាបណ្ណ ដល់ថ្នាំវ៉ាក់សាំងការពារកូវីដ១៩ណាមួយ បើទោះបីជា ដំណាក់កាលសាកល្បងទី៣ដើម្បីពិនិត្យពីប្រសិទ្ធិភាព នៅមិនទាប់ចប់សព្វគ្រប់ក្តី។
តែយ៉ាងណា លោកនាយកទីភ្នាក់ងារឱសថអាមេរិករូបនេះ បានអះអាងថា វាគឺជានីតិវិធីបន្ទាន់ និងពិសេស ដែលស្ថាប័នលោក ត្រូវតែពិនិត្យ វិភាគឲ្យបានល្អិតល្អន់ មុននឹងផ្តល់អាជ្ញាបណ្ណ។ មួយទៀតនោះ គឺថា វ៉ាក់សាំងដែលអាចត្រូវបានផ្តល់អាជ្ញាបណ្ណដោយបន្ទាន់នេះ គឺអាចយកទៅប្រើ តែទៅលើក្រុមមនុស្ស មួយចំនួនដែលងាយប្រឈម ឬដែលត្រូវការវ៉ាក់សាំងមុនគេ។
លោក Stephen Hahn ក៏បានបំភ្លឺផងដែរ ទាក់ទិននឹងការិះគន់ ដែលថាលោក បានទទួលសំពាធពីលោកដូណាល់ ត្រាំ ដែលចង់បានថ្នាំវ៉ាក់សាំងកូវីដ១៩ ឲ្យបានមុនពេលបោះឆ្នោតនៅខែវិច្ឆិកាខាងមុខ ដើម្បីយកទៅអួតរកសម្លេងឆ្នោត។ លោកនាយកទីភ្នាក់ងារឱសថអាមេរិក បានអះអាងថា ក្នុងករណីផ្តល់អាជ្ញាបណ្ណបន្ទាន់ ដល់វ៉ាក់សាំងណាមួយ គឺស្ថាប័នលោក សម្រេចដោយឈរលើគោលការណ៍វិទ្យាសាស្ត្រ និងវេជ្ជសាស្ត្រ មិនមែនជារឿងនយោបាយទេ។
សូមបញ្ជាក់ថា បច្ចុប្បន្នមានថ្នាំវ៉ាក់សាំងចំនួន៣ ដែលកំពុងស្ថិតក្នុងដំណាក់កាលសាកល្បងទី៣ ហើយដែលបានចុះឈ្មោះ សុំអាជ្ញាបណ្ណនៅសហរដ្ឋអាមេរិក។ ក្នុងនោះ មានវ៉ាក់សាំងស្រាវជ្រាវដោយមន្ទីរពិសោធន៍ AstraZeneca សហការជាមួយសកលវិទ្យាល័យ Oxford វ៉ាក់សាំងរបស់មន្ទីរពិសោធន៍ Moderna សហការជាមួយវិទ្យាស្ថានសុខភាពអាមេរិក និងទី៣ វ៉ាក់សាំងរបស់មន្ទីរពិសោធន៍ Pfizer និងមន្ទីរពិសោធន៍ BioNtech។ ក៏ប៉ុន្តែ លទ្ធផលសាកល្បងទ្រង់ទ្រាយធំ ទៅលើមនុស្សជាច្រើនពាន់នាក់ ក្នុងដំណាក់កាលទី៣នេះ នៅមិនទាន់មាននៅឡើយទេ ដោយត្រូវចាំច្រើនខែទៀត។
គួររំលឹកផងដែរថា នាយកទីភ្នាក់ងារឱសថសហរដ្ឋអាមេរិកនេះ ត្រូវបានគេរិះគន់ច្រើនដងមកហើយ ទាក់ទិនកិច្ចការមិនច្បាស់លាស់ ទន់ទោរទៅតាមការដាក់សំពាធពីសេតវិមាន។ កាលពីចុងខែមីនា ក្រោយពេលលោកដូណាល់ ត្រាំអួតសរសើរពីថ្នាំ អុីដ្រូស៊ីក្លូរ៉ូគីន ក៏ស្រាប់តែទីភ្នាក់ងារឱសថបានសម្រេចអនុញ្ញាតឲ្យប្រើថ្នាំនេះទៅលើអ្នកជំងឺកូវីដ។ ក្រោយមក ក៏បានហាមវិញ នៅខែមិថុនា ក្រោយពិនិត្យឃើញថាគ្មានប្រសិទ្ធិភាព និងមានផលវិបាកខ្លាំងដល់អ្នកជម្ងឺ។ ករណីមួយទៀតនោះ គឺលោកនាយកទីភ្នាក់ងារឱសថអាមេរិក បាននិយាយបំផ្លើសនៅក្នុងសន្និសីទកាសែត មួយដែលមានលោកដូណាល់ ត្រាំឈរពីក្រោយ អំពីប្រសិទ្ធិភាពនៃសារធាតុប្លាសម៉ា ដែលល្បីថាអាចជួយព្យាបាលកូវីដ១៩បាន។ ក្រោយមកលោកបានទទួលស្គាល់ថា វាគឺជាការភ័ន្តច្រឡំ។
លោក Eric Topol អគ្គនាយក Scripps Research Translational Institute បានសរសេរលើ Twitter ថា ការផ្តល់អាជ្ញាបណ្ណដល់វ៉ាក់សាំង ដោយតក់ក្រហល់ គឺជារឿងគ្រោះថ្នាក់ និងមិនសមហេតុផលទាល់តែសោះ ទោះបីចង់ថាលោក Stephen Hahn ធ្វើតាម ឬមិនធ្វើតាមការបញ្ជារបស់លោកដូណាល់ ត្រាំក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ