លោកដូណាល់ ត្រាំ ស្នើលើកថ្ងៃបោះឆ្នោត នៅក្រោយ ដំណឹងថា សេដ្ឋកិច្ចអាមេរិក ដើរថយក្រោយ
សេដ្ឋកិច្ចអាមេរិកបានដើរថយក្រោយ ជាផ្លូវការ នៅបន្ទាប់ពី ផលិតផលក្នុងស្រុកសរុប GDP បានធ្លាក់ថយចុះ នៅពីរត្រីមាសជាប់គ្នា ដោយសារ វិបត្តិកូវីដ ១៩។ នៅប៉ុន្មាននាទីក្រោយ ការប្រកាសរបស់ក្រសួងពាណិជ្ជកម្ម អាមេរិក ស្តីពីការធ្លាក់ថយចុះជាប្រវត្តិសាស្រ្តនៃ ផលិតផលក្នុងស្រុកសរុប លោកប្រធានាធិបតីអាមេរិក ដូណាល់ ត្រាំ បានសរសេរសារTwitter ស្នើជាលើកទី១ ឲ្យគេលើក ថ្ងៃបោះឆ្នោតប្រធានាធិបតី ដែលគ្រោងធ្វើនៅថ្ងៃទី ៣វិច្ឆិកាចុងឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៤៧
ប្រធានាធិបតីអាមេរិក លោកដូណាល់ ត្រាំ កាលពីថ្ងៃព្រហស្បតិ៍ម្សិលមិញ បានពន្លយពាក្យ ជាលើកទី១ ស្នើឲ្យគេលើកពេលបោះឆ្នោត ឆ្នាំ ២០២០ ក្នុងមូលហេតុថា ការបោះឆ្នោតនៅក្នុងកាលៈទេសៈកើតមានវិបត្តិកូវីដ នឹងត្រូវប្រឈមនឹងការលួចបន្លំសន្លឹកឆ្នោត។
នៅក្នុងបរិបទដែលអាមេរិកកំពុងញាំញីដោយជំងឺកូវីដ ដែលឆ្លងទៅមនុស្ស ជាង៤លានកន្លះ និងសម្លាប់មនុស្ស ជាង ១សែន ៤ម៉ឺននាក់ នៅអាមេរិក រដ្ឋជាច្រើនបានស្នើឲ្យរៀបចំការបោះឆ្នោតពីចម្ងាយ ដើម្បីជៀសវាងការចម្លងមេរោគកូរ៉ូណា នៅក្នុងការប្រមូលផ្តុំនៅតាមមណ្ឌលបោះឆ្នោត។ រដ្ឋមួយចំនួនបានអនុញ្ញាតឲ្យមានប្រព័ន្ធបោះឆ្នោត ពីចម្ងាយ ដែលដំណើរការជាច្រើនឆ្នាំមកហើយ និងមិនដែលជួបបញ្ហា ធំដុំដូចជាការលួចបន្លំសន្លឹកឆ្នោតនោះទេ។
ប៉ុន្តែ សម្រាប់ប្រធានាធិបតីអាមេរិក ជាមួយនឹងគំនិតផ្តួចផ្តើម ឲ្យមានការបោះឆ្នោត ពីចម្ងាយ តាមរយៈសំបុត្រ អ៊ីម៉ែល ការបោះឆ្នោតនៅឆ្នាំ ២០២០នឹងក្លាយជាការបោះឆ្នោត ដែលមិនជាក់លាក់ និងការបន្លំសន្លឹកឆ្នោត ដ៏សំខាន់មួយ នៅក្នុងប្រវត្តិសាស្រ្តអាមេរិក។
“នេះជារឿងដ៏អាម៉ាស់សម្រាប់អាមេរិក។ តើគេគួរលើកថ្ងៃបោះឆ្នោត រហូតដល់ពេលវេលាមួយ ដែលប្រជាជនអាចបោះឆ្នោត ធម្មតា និងដោយសុវត្ថិភាព?” នេះជាការចោទសួររបស់លោកដូណាល់ ត្រាំ នៅក្នុងសារ ដែលលោកបានសរសេរបង្ហោះផ្សាយនៅតែប៉ុន្មាននាទីក្រោយ ដែលក្រសួងពាណិជ្ជកម្ម ផ្សព្វផ្សាយ តួលេខមិនល្អស្តីពីសេដ្ឋកិច្ចរបស់អាមេរិក។
តាមសេចក្តីប្រកាសរបស់ ក្រសួងពាណិជ្ជកម្មអាមេរិក ផលិតផលក្នុងស្រុកសរុបរបស់អាមេរិក GDP នៅត្រីមាស ទី២បានធ្លាក់ថយចុះ អស់ ៣២,៩% នៅបន្ទាប់ពីធ្លាក់ថយម្តងហើយ នៅត្រីមាសទី១ ដោយសារ តែវិបត្តិកូវីដ ១៩។ ផលិតផលក្នុងស្រុកធ្លាក់ថយចុះ ពីរត្រីមាសជាប់គ្នា ឆ្លុះបង្ហាញឲ្យឃើញថា សេដ្ឋកិច្ចអាមេរិកដើរថយក្រោយជាផ្លូវការ។
ដោយលើកនិយាយពីលទ្ធភាព លើកថ្ងៃបោះឆ្នោតប្រធានាធិបតី តើលោកដូណាល់ ត្រាំ កំពុងតែលេបសំដីខ្លួនឯងឬយ៉ាងណា? នៅចុងខែមេសា លោកចូ បៃដិន គូប្រជែងរបស់លោក ធ្លាប់បាននិយាយទាយទុកជាមុនថា លោកដូណាល់ ត្រាំ នឹងរកលេស រកហេតុផលគ្រប់យ៉ាង ដើម្បីពន្យារថ្ងៃបោះឆ្នោត។ កាលណោះ លោកដូណាល់ ត្រាំ បាននិយាយបកវិញថា លោកគ្មានគំនិតចង់លើកថ្ងៃនោះទេ។ លោកដូណាល់ ត្រាំនៅបានចោទប្រកាន់ថា លោកចូ បៃដិនកំពុងនិយាយឃោសនាដើម្បី ប្រយោជន៍នយោបាយ។
លោកដូណាល់ ត្រាំ ដែលកំពុងមានកូដប្រជាប្រិយភាពធ្លាក់ចុះ ដោយសារតែវិបត្តិកូវីដ និងសេដ្ឋកិច្ចធ្លាក់ថយចុះក្នុងស្រុក បានស្នើឲ្យលើកពេលបោះឆ្នោតប្រធានាធិបតី។ ប៉ុន្តែ លើកពេល ឬមិនលើកពេល គឺមានតែសភាអាមេរិកទេ ដែលជាអ្នកសម្រេចបាន ដោយយោងទៅតាមច្បាប់រដ្ឋធម្មនុញ្ញអាមេរិក ដែលបានកំណត់ ថ្ងៃទី៣វិច្ឆិកាជាថ្ងៃបោះឆ្នោត ប្រធានាធិបតីអាមេរិក។ គេវាយតម្លៃថា សភាអ្នកតំណាងរាស្រ្ត អាមេរិក ដែលគ្រប់គ្រងដោយគណបក្សប្រជាធិបតេយ្យ ដែលជាគូប្រឆាំងរបស់លោកដូណាល់ ត្រាំ ទំនងជានឹងមិន យល់ព្រមលើកថ្ងៃបោះឆ្នោត ទៅតាមការចង់បានរបស់លោកដូណាល់ ត្រាំនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ