លោកដូណាល់ ត្រាំប្រកាសបើកយុទ្ធនាការឃោសនាឆ្នោត នៅរដ្ឋដែលមានករណីឆ្លងកូវីដច្រើន
ចុះផ្សាយនៅថ្ងៃ៖
ស្តាប់ - ០៨:៣៨
នៅសហរដ្ឋអាមេរិក លោកប្រធានាធិបតីដូណាល់ ត្រាំបានប្រកាសថ្ងៃ ធ្វើយុទ្ធនាការឃោសនាបោះឆ្នោត ជាបន្តបន្ទាប់ ដោយមិនខ្វល់ពីជំងឺកូវីដ ដែលបានឆ្លងរាតត្បាតទៅមនុស្សជាង ២លាននាក់ និងសម្លាប់មនុស្សជាង១សែននាក់ នៅទឹកដីអាមេរិក។ លោកដូណាល់ ត្រាំ ប្រកាសបើកយុទ្ធនាការឃោសនាបោះឆ្នោត នៅចំពេលដែលការស្ទង់មតិក្នុងស្រុកបង្ហាញថា កូដប្រជាប្រិយភាពរបស់លោកបានធ្លាក់ចុះខ្លាំង បើប្រៀបធៀបនឹងលោកចូ បាយដិន ដែលជាគូប្រជែង មកពីគណបក្សប្រជាធិបតេយ្យ។
លោកដូណាល់ ត្រាំបានប្រកាសបើកយុទ្ធនាការឃោសនាបោះឆ្នោត នៅសប្តាហ៍ក្រោយ ដោយមិនខ្វល់ពីបញ្ហាឆ្លងជំងឺកូវីដ ដែលពេលនេះ បានសម្លាប់មនុស្សជាង ១សែន ១ម៉ឺននាក់ នៅអាមេរិក។ នៅថ្ងៃសៅរ៍នេះទៀត លោកដូណាល់ ត្រាំ ត្រូវទៅចូលរួមក្នុងពិធី ប្រគល់សញ្ញាប័ត្រដល់សិស្សទាហានអាមេរិកាំង នៅសាលាយោធាដ៏ល្បីឈ្មោះ Westpoint។
ករណីឆ្លងជំងឺកូវីដ នៅអាមេរិក នៅតែមានសន្ទុះខ្លាំង មិនចុះថមថយសោះ ជាពិសេស នៅTexas នៅរដ្ឋFlorida ជាទីដែលលោកដូណាល់ ត្រាំ និងគណបក្សសាធារណរដ្ឋ ប្រកាសបើកធ្វើយុទ្ធនាការឃោសនាបោះឆ្នោត។ ការប្រមូលផ្តុំមនុស្សឲ្យជួបជុំគ្នា នៅក្នុងពេលឃោសនាបោះឆ្នោត គឺជាការបើកឱកាសឲ្យមានការចម្លងយ៉ាងរហ័សជំងឺកូវីដ។ អ្នកជំនាញសុខភាព អាមេរិកាំងបានវាយតម្លៃថា បាតុកម្ម ដើម្បី ប្រឆាំងនឹងការរើសអើង ប្រកាន់ពូជសាសន៍ នៅប៉ុន្មានថ្ងៃកន្លងមក គឺជាបច្ច័យមួយ ធ្វើឲ្យចំនួនអ្នកឆ្លងជំងឺកូវីដ កើនឡើង និងធ្វើឲ្យអាមេរិកនាំមុខគេ ខាងមានអ្នកឆ្លង និងស្លាប់ច្រើនជាងគេ ក្នុងពិភពលោក។
ទោះបីជាមានការព្រមាន ពីអ្នកជំនាញសុខភាព ដែលណែនាំមិនឲ្យមានការជួបជុំគ្នា ដើម្បី ជៀសវាងការចម្លងជំងឺកូវីដក្តី លោកដូណាល់ ត្រាំ មិនខ្វល់នោះទេ។ នៅពេលការបោះឆ្នោតប្រធានាធិបតី កាន់តែខិតចូលមកដល់ គឺនៅសល់តែ ៥ខែទៀតប៉ុណ្ណោះ(ថ្ងៃទី៣វិច្ឆិកា) លោកដូណាល់ ត្រាំ ដែលចង់បន្តកាន់តំណែងប្រធានាធិបតី១អាណត្តិទៀត គិតតែចង់ឈ្នះឆ្នោត ដោយបានប្រកាសបើកយុទ្ធនាការឃោសនាបោះឆ្នោត នៅក្នុងរដ្ឋសំខាន់ចំនួន ៤ ដូចជា Florida Arizona North Caroline Oklahoma ចាប់ពីថ្ងៃទី ២០មិថុនា។
នៅក្នុងវិបសៃតិ៍របស់ក្រុមយុទ្ធនាការឃោសនាបោះឆ្នោតរបស់លោកដូណាល់ ត្រាំ គេមិនបានបញ្ជាក់ពីវិធានការ បង្កាកុំឲ្យឆ្លងជំងឺកូវីដ ដូចជាការពាក់ម៉ាស ឬត្រូវឈរឃ្លាតគ្នា ១ម៉ែត្រ អ្វីនោះទេ។ ផ្ទុយទៅវិញ គេបានទាមទារឲ្យអ្នកដែលចុះឈ្មោះ ចូលរួម ស្តាប់លោកដូណាល់ ត្រាំ ថា ត្រូវតែសន្យា មិនប្តឹង លោកដូណាល់ ត្រាំ ឬក្រុមឃោសនារបស់លោក នៅក្នុងករណីអ្នកចូលរួម អាចឆ្លងជំងឺកូវីដ នៅក្នុងយុទ្ធនាការឃោសនាបោះឆ្នោតរបស់លោកដូណាល់ ត្រាំ។ ការទាមទារយ៉ាងដូច្នេះរបស់ក្រុមឃោសនារបស់លោកដូណាល់ ត្រាំ បានបង្ហាញសាជាថ្មីថា លោកដូណាល់ ត្រាំ មិនសូវយកចិត្តទុកដាក់ លើបញ្ហាសុខភាពរបស់ប្រជាជន ប៉ុន្តែ ផ្ទុយទៅវិញ គឺផ្តោតសំខាន់តែទៅលើប្រយោជន៍បោះឆ្នោតរបស់លោកតែប៉ុណ្ណោះ។ គឺការមិនយកចិត្តទុកដាក់ គ្រប់គ្រង វិបត្តិកូវីដ មិនបានល្អ ដែលធ្វើឲ្យកូដប្រជាប្រិយភាពរបស់លោកដូណាល់ ត្រាំ ធ្លាក់ចុះ ជាបន្តបន្ទាប់។ ការស្ទង់មតិរបស់ក្រុមហ៊ុនអាមេរិកាំងមួយ បានបង្ហាញថា កូដប្រជាប្រិយភាពរបស់លោកដូណាល់ ត្រាំ ក្នុងចំណោមប្រជាជនអាមេរិកាំង បានធ្លាក់ចុះ ពី ៤៤% មកនៅត្រឹម៤១%។ គេវាយតម្លៃថា បើសិន កូដប្រជាប្រិយភាពរបស់លោកធ្លាក់មកនៅរង្វង់ ៤០% នោះលោកដូណាល់ ត្រាំ ពិបាកនឹងទទួលបានសំឡេងគាំទ្រគ្រប់គ្រាន់ ដើម្បីអាចជាប់ឆ្នោតសម្រាប់អាណត្តិទី២។
លោកចន បុលតុន អតីតទីប្រឹក្សាសន្តិសុខជាតិ រិះគន់លោកដូណាល់ ត្រាំ ថា ធ្វើនយោបាយការបរទេស សម្រាប់តែបានសំឡេងឆ្នោត ….
យុទ្ធនាការឃោសនាបោះឆ្នោត លោកដូណាល់ ត្រាំ លើកនេះ នឹងមិនរលូនស្រួលដូចលើកមុននោះទេ។ បន្ទាប់ពីរងការរិះគន់ ថា គ្រប់គ្រងមិនបានល្អ វិបត្តិ កូវីដ លោកដូណាល់ ត្រាំ ត្រូវរងរិះគន់ជុំទិស មួយជាន់បន្ថែម នៅក្នុងរឿងបាតុកម្ម ប្រឆាំងនឹងការរើសអើងពូជសាសន៍ ដែលផ្ទុះពេញទឹកដីអាមេរិក នៅក្រោយ ជនជាតិអាមេរិកាំងស្បែកខ្មៅ ស្លាប់ នៅក្នុងអន្តរាគមន៍ចាប់ខ្លួនរបស់ប៉ូលិស។ នៅក្នុងលិខិតចំហរ មួយ កាលពីពេលថ្មីៗនេះ អតីតរដ្ឋមន្រ្តី ការពារជាតិ របស់លោកដូណាល់ ត្រាំ បានចេញមុខ រិះគន់ លោកដូណាល់ត្រាំ ថា ជាប្រធានាធិបតី ដែលបំបែកបំបាក់ប្រជាជនអាមេរិកាំង។ រដ្ឋមន្រ្តីការពារជាតិបច្ចុប្បន្ន និងមេបញ្ជាការកងទ័ពអាមេរិកផង បានបង្ហាញជំហរ ផ្ទុយពីលោកដូណាល់ ត្រាំ ដែលធ្លាប់បាន ព្រមានប្រើកងទ័ព ដើម្បីបង្រ្កាបអំពើបាតុកម្មហិង្សា។
ឥលូវនេះ ដល់វេន អតីតទីប្រឹក្សាសន្តិសុខជាតិរបស់លោកដូណាល់ ត្រាំ ដែលត្រូវចេញមកបកអាកា្រតមុខមាត់របស់លោកដូណាល់ ត្រាំ។ លោកចន បុលតុន ដែលធ្លាប់ជាទីប្រឹក្សារបស់លោកដូណាល់ ត្រាំ និងមានជំហរដាច់ណាត់ ក្នុងរឿងចោទប្រកាន់រុស្ស៊ី និងកូរ៉េខាងជើង បានចុះចេញពីតំណែង នៅខែកញ្ញាឆ្នាំមុន។ នៅក្រោយចាកចេញពីសេតវិមាន អតីតទីប្រឹក្សា សន្តិសុខជាតិរបស់លោកដូណាល់ ត្រាំ ត្រៀមនឹងចេញ សៀវភៅ មួយក្បាល ដែលនៅក្នុងសៀវភៅនោះ លោកបុលតុន ចោទប្រកាន់លោកដូណាល់ ត្រាំ ជាប្រធានាធិបតី ដែល ធ្វើនយោបាយការបរទេស សម្រាប់តែបម្រើប្រយោជន៍ នយោបាយបោះឆ្នោត របស់លោកតែប៉ុណ្ណោះ។ សៀវភៅរបស់លោកបុលតុន និយាយផ្តោតច្រើនទៅលើកិច្ចសន្ទនាទូរស័ព្ទ រវាងលោកដូណាល់ ត្រាំ និងប្រធានាធិបតីអ៊ុយក្រែន ដែលធ្លាប់ជំរុញឲ្យដំណើរការ នៅសភា ដើម្បីបោះឆ្នោត ទម្លាក់លោកដូណាល់ ត្រាំ ចេញពីតំណែង នៅចុងឆ្នាំមុន។
នៅដើមឆ្នាំនេះ លោកដូណាល់ ត្រាំ ធ្លាប់បានព្រមានកុំឲ្យលោកចន បុលតុន ចេញសៀវភៅ នៅពេលលោកកំពុងកាន់តំណែងប្រធានាធិបតី ក្នុងហេតុផលថា សៀវភៅរបស់អតីតទីប្រឹក្សាសន្តិសុខជាតិ មាននិយាយពីចំណុចខ្លះ ដែលជាកិច្ចការសម្ងាត់របស់ជាតិ។ ប៉ុន្តែ ម្ចាស់រោងពុម្ពបានបញ្ជាក់កាលពីថ្ងៃម្សិលមិញហើយថា សៀវភៅរបស់លោកចន បុលតុន ដែលមានឈ្មោះថា បន្ទប់ដែលមានរឿងកើតឡើង និងការចងចាំរបស់សេតវិមាន នឹងចេញផ្សាយ នៅថ្ងៃទី ២៣មិថុនាខាងមុខ ទោះបីជាលោកដូណាល់ ត្រាំ មិនចង់ឲ្យគេឃើញ បានអាន យ៉ាងណាក៏ដោយ។
នៅក្នុងសៀវភៅ លោកចន បុលតុលនិយាយពីកំហុសរបស់ប្រធានាធិបតី ធ្ងន់ធ្ងរ ប៉ុន្តែ លោកចន បុលតុន ធ្លាប់បានបដិសេធមិនផ្តល់សក្ខីកម្ម នៅក្នុងដំណើរការបោះឆ្នោត ទម្លាក់លោកដូណាល់ ត្រាំ ចេញពីមុខតំណែងនោះទេ។ អតីតប្រធានក្រមវិជ្ជាជីវៈ អាមេរិក លោក Walter Shaub ដែលធ្លាប់ឈ្លោះជាមួយលោកដូណាល់ ត្រាំ បានអំពាវនាវកុំឲ្យគេទិញ សៀវភៅរបស់អ្នកបដិសេធមិនគោរពតួនាទី ឬអ្នកដែលផ្តោតសំខាន់លើផលប្រយោជន៍ផ្ទាល់ខ្លួន គឺ ការលក់សៀវភៅ ជាជាងប្រយោជន៍ជាតិ(ការផ្តល់សក្ខីកម្មដើម្បីដាក់បន្ទុកលោកដូណាល់ ត្រាំ)។ សម្រាប់ប្រធានក្រុមគណបក្សប្រជាធិបតេយ្យនៅព្រឹទ្ធសភា សក្ខីកម្មរបស់លោកចន បុលតុន អាចធ្វើឲ្យគណបក្សសាធារណរដ្ឋផ្លាស់ប្តូរជំហរទៅលើបេក្ខភាពរបស់លោកដូណាល់ ត្រាំ។
លោកដូណាល់ ត្រាំ សង្ឃឹមផ្តោតលើបញ្ហាសេដ្ឋកិច្ចដើម្បីស្តារមុខមាត់ឡើងវិញ
ប្រាកដណាស់ថា លោកដូណាល់ ត្រាំនឹងមានការលំបាកច្រើនជាងមុន នៅក្នុងការបោះឆ្នោតប្រធានាធិបតីលើកនេះ ដោយសារតែបញ្ហាវិបត្តិកូវីដ វិបត្តិសង្គម និងវិបត្តិសេដ្ឋកិច្ច ដែលកើតឡើងដោយសារតែវិធានការបិទទីក្រុង នៅក្នុងកាលៈទេសៈ កើតមានជំងឺរាតត្បាតកូវីដ។ នៅអាមេរិក ចំនួនអ្នកបាត់បង់ការងារធ្វើបានកើនឡើង ដល់ ៤៤លាននាក់ គិតចាប់តាំងពីអាមេរិកផ្អាកសកម្មភាពសេដ្ឋកិច្ច បិទទីក្រុងដោយសារវិបត្តិកូវីដ។
ប៉ុន្តែ លោកដូណាល់ ត្រាំ មិនអស់សង្ឃឹមនោះទេ។ មហាសេដ្ឋី អចលនទ្រព្យនឹងយកបញ្ហាសេដ្ឋកិច្ច ជាគ្រឹះចំបងសម្រាប់ការឃោសនាបោះឆ្នោតរបស់លោក។ ការសិក្សារបស់វិទ្យាស្ថានបារាំងផ្នែកស្ទង់មតិ មួយបង្ហាញថា សេដ្ឋកិច្ចជាសំណុំរឿងសំខាន់ របស់ប្រជាជន អាមេរិកាំង គឺសំខាន់ជាងបញ្ហាសុខភាព និងបញ្ហាការងារធ្វើទៅទៀត។ នៅពេលគណបក្សប្រជាធិបតេយ្យ ដែលជាគូប្រជែងរបស់លោកដូណាល់ ត្រាំ ផ្តោតសំខាន់តែទៅលើបញ្ហាសុខភាព ជំងឺកូវីដ ១៩
លោកដូណាល់ ត្រាំ ផ្តោតសំខាន់ ទៅលើបញ្ហាសេដ្ឋកិច្ច ដោយបានទាមទារឲ្យអភិបាល បើកទីក្រុងឡើងវិញ ដើម្បី ជំរុញសេដ្ឋកិច្ច។
ការស្ទង់មតិបង្ហាញថា មានប្រជាជនអាមេរិកាំង ដល់ទៅ ៥០%ដែលគាំទ្រជំហររបស់លោក ក្នុងរឿងជំរុញសេដ្ឋកិច្ច។ ស្ថិតនៅក្នុងស្ថានភាពបែបនេះ លោកដូណាល់ ត្រាំ សង្ឃឹមថា ការងើបឡើងវិញ សេដ្ឋកិច្ច នឹងអាចធ្វើឲ្យប្រជាជនអាមេរិកាំងបំភ្លេចចោលអស់វិបត្តិកូវីដ ឬបាតុកម្ម ប្រឆាំងនឹងការរើសអើងពូជសាសន៍ នៅក្នុងរយៈពេលប៉ុន្មានខែមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ