តុលាការកំពូលទាត់ចោលការសម្រេចរបស់លោកដូណាល់ ត្រាំដែលចង់លុបកម្មវិធីជួយយុវជនអន្តោប្រវេសន៍
តុលាការកំពូលអាមេរិក នៅថ្ងៃព្រហស្បតិ៍ម្សិលមិញ បានបែរខ្នងសាជាថ្មី ដាក់លោកដូណាល់ ត្រាំ ដោយបានសម្រេចឲ្យគេបន្តរក្សាកម្មវិធីDACA ដែលរដ្ឋបាលលោកអូបាម៉ា បានបង្កើតឡើងដើម្បី ការពារយុវជនអន្តោប្រវេសន៍ នៅទឹកដីអាមេរិក ប៉ុន្តែ លោកដូណាល់ ត្រាំ ចង់ លុបចោល តាំងពី៣ឆ្នាំមុន។
ចុះផ្សាយនៅថ្ងៃ៖
ស្តាប់ - ០២:០៥
ប្រតិកម្មនឹងសេចក្តីសម្រេចរបស់តុលាការកំពូល លោកប្រធានាធិបតីអាមេរិកបានសរសេរចោទជាសំណួរថា តើគេកំពុងមានអារម្មណ៍ថា តុលាការកំពូលមិនចូលចិត្តលោកដែរឬទេ? លោកបារ៉ាក់ អូបាម៉ា នៅថ្ងៃព្រហស្បតិ៍ស្វាគមសេចក្តីសម្រេចរបស់តុលាការកំពូល និងអំពាវនាវឲ្យគេបោះឆ្នោត ឲ្យគណបក្សប្រជាធិបតេយ្យ ដើម្បី ធានាថា កម្មវិធីជួយយុវជនអន្តោប្រវេសន៍ Dreamers នៅមានជាប់ជានិច្ចនៅសហរដ្ឋអាមេរិក។
នៅក្នុងសេចក្តីសម្រេច កាលពីថ្ងៃព្រហស្បតិ៍ តុលាការកំពូលអាមេរិក បានចាត់ទុកការប៉ុនប៉ងរបស់លោកដូណាល់ ត្រាំ ក្នុងការលុបចោលកម្មវិធីជួយយុវជនអន្តោប្រវេសន៍ ថា ជាការបំពាន ច្បាប់ និងធ្វើឡើងតាមទំនើងចិត្ត។
កម្មវិធីជួយយុវជនអន្តោប្រវេសន៍ Dreamers ដែលមានឈ្មោះថា DACA ត្រូវបាន បង្កើតឡើងនៅឆ្នាំ ២០១២ ដោយអតីតប្រធានាធិបតីអាមេរិក លោកបារ៉ាក់អូបាម៉ា ដើម្បី អនុញ្ញាតឲ្យយុវជនអន្តោប្រវេសន៍ ដែលបានចូលទៅទឹកដីអាមេរិក ដោយខុសច្បាប់ តាំងពីនៅវ័យក្មេង អាចរៀន និងធ្វើការស្របច្បាប់ នៅអាមេរិក។ កម្មវិធីDACA បានជួយយុវជនអន្តោប្រវេសន៍ Dreamers ជាង ៧សែននាក់ ឲ្យបានរៀន ធ្វើការ និងបង់ពន្ធជូនរដ្ឋដូចពលរដ្ឋអាមេរិកាំង។ ប៉ុន្តែ លោកដូណាល់ ត្រាំ ដែលមានជំហរតឹងខាងនយោបាយអន្តោប្រវេសន៍បានប្រកាសលុបចោលកម្មវិធី នៅពាក់កណ្តាលឆ្នាំ ២០១៧ ក្នុងហេតុផលថា កម្មវិធីរបស់លោកអូបាម៉ា ធ្វើឡើងដោយខុសច្បាប់។
នៅក្នុងសេចក្តីសម្រេចរបស់ខ្លួន ចៅក្រមរបស់តុលាការកំពូលបានពន្យល់ថា តុលាការមិនបានពិចារណា តើថា កម្មវិធីជួយយុវជនអន្តោប្រវេសន៍ Dreamers ត្រឹមត្រូវ ដែរឬយ៉ាងណានោះទេ។ ប៉ុន្តែ វិធីសាស្រ្តដែលរដ្ឋបាលលោកដូណាល់ ត្រាំ ប្រើ ដើម្បី បិទបញ្ចប់កម្មវិធីនេះ ភ្លាមៗ គឺខុសច្បាប់ ពោលគឺ “រដ្ឋាភិបាលមិនបានអនុវត្តតាមនីតិវិធី និងគ្មានហេតុផលត្រឹមត្រូវដើម្បីបិទបញ្ចប់កម្មវិធីDACA”។
នៅក្រោយការសម្រេចរបស់តុលាការកំពូល ប្រធានាធិបតីអាមេរិកបានសរសេរភ្លាម សារ Twitter រិះគន់ការសម្រេចរបស់ចៅក្រម ថាអាក្រក់ និងមាននិន្នាការនយោបាយ។
សេចក្តីសម្រេចរបស់តុលាការកំពូល (ដែលមានសំឡេងគាំទ្ររបស់ ចៅក្រម៥រូប ក្នុងចំណោម៩រូប) នឹងបិទផ្លូវតវ៉ារបស់លោកដូណាល់ ត្រាំ ដែលបានសន្យា កាត់បន្ថយ ជនអន្តោប្រវេសន៍ នៅទឹកដីអាមេរិក តាមរយៈការបញ្ជូនចេញជនអន្តោប្រវេសន៍ខុសច្បាប់ ឲ្យបានច្រើនបំផុត នៅក្នុងអាណត្តិរបស់លោក។ គេប៉ាន់ស្មានថា មានជនអន្តោប្រវេសន៍១០លាននាក់ កំពុងរស់នៅទឹកដីអាមេរិក អស់ជាច្រើនទសវត្សរ៍ មកហើយ ដោយគ្មានកាន់លិខិតស្នាមស្របច្បាប់អ្វីទេ។ នៅឆ្នាំ ២០១២ លោកអូបាម៉ាបានចេញក្រឹត្យបង្កើតកម្មវិធី DACA ដើម្បីផ្តល់បណ្ណស្នាក់នៅ ស្របច្បាប់ (មានសុពលភាព ២ឆ្នាំ) ដែលការពារយុវជនអន្តោប្រវេសន៍Dreamers ពីការចាប់បណ្តេញចេញ ពីទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ