អាមេរិក៖ មតិរិះគន់ ក្រោយប្រតិបត្តិការចាប់ប្រមូលជនអន្តោប្រវេសន៍ខុសច្បាប់ ៦៨០នាក់
កាលពីថ្ងៃពុធ ទី៧សីហា សមត្ថកិច្ចអាមេរិក នៅរដ្ឋ មីស៊ីស៊ីពី បានចុះចាប់ប្រមូលជនអន្តោប្រវេសន៍ខុសច្បាប់ ចំនួនប្រមាណ៦៨០នាក់ នៅតាមទីតាំងរោងចក្រដែលពួកគេកំពុងធ្វើការ។ វិធានការចុះចាប់ប្រមូលយកទៅដាក់ឃុំ យ៉ាងគំហុកបែបនេះ បានធ្វើឲ្យមានការរិះគន់ជាខ្លាំង ដោយសារកុមារ ដែលជាកូនៗ របស់ជនអន្តោប្រវេសន៍ទាំងនោះ ត្រូវនៅតែលតោលគ្មានអាណាព្យាបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ជនអន្តោប្រវេសន៍ខុសច្បាប់ មកពីតំបន់អាមេរិកកណ្តាល យ៉ាងហោច៦៨០នាក់ ត្រូវបានអាជ្ញាធរអាមេរិក ក្នុងរដ្ឋមីស៊ីស៊ីពី ចុះទៅចាប់ប្រមូលឃាត់ខ្លួន ក្នុងពេលដែលពួកគេកំពុងធ្វើការនៅតាមរោងចក្រ និងកសិដ្ឋានមួយចំនួន។ ប្រតិបត្តិការនេះ ត្រូវបានបណ្តាញផ្សព្វផ្សាយព័ត៌មានអាមេរិក ចុះផ្សាយយ៉ាងព្រោងព្រាត។
ជាមួយគ្នានេះផងដែរ បណ្តាញព័ត៌មានខ្លះ បានចុះផ្សាយពីស្ថានភាពតែលតោល យំសោករបស់កុមារ ដែលជាកូនៗរបស់ជនអន្តោប្រវេសន៍។ កុមារទាំងអស់ បានដឹងថាឪពុកម្តាយខ្លួន ត្រូវគេចាប់បញ្ជូនយកទៅដាក់ឃុំ នៅពេលពួកគេចេញពីសាលារៀន។ លោក William Truly អភិបាលក្រុងម្នាក់ ដែលជាប់ក្នុងប្រតិបត្តិការនេះ បានថ្លែងប្រាប់ទូរទស្សន៍CNN ថាអ្វីដែលលោកព្រួយបារម្ភបំផុត គឺកុមារតូចៗ ថាពួកគេនឹងទៅជាយ៉ាងណា?
លោកស្រី Nancy Pelosi ប្រធានសភាតំណាង បានលើកឡើងថា អ្វីដែលរដ្ឋាភិបាលកំពុងធ្វើ គឺជារឿងអាម៉ាសបំផុត សម្រាប់ប្រជាជនអាមេរិក ព្រោះទង្វើនេះវាប្រាសចាកពីទឹកចិត្តមនុស្សធម៌ ដែលជាតម្លៃរបស់សហរដ្ឋអាមេរិក។
យ៉ាងណាក៏ដោយ ស្របពេលដែលមានការរិះគន់ ស្តីពីចំណាត់ការជ្រុលហួសហេតុ ដោយអមនុស្សធម៌ ធ្វើទៅលើជនអន្តោប្រវេសន៍ រដ្ឋាភិបាលអាមេរិក បានអបអរអំពីជោគជ័យ នៃការទប់ស្កាត់ជនអន្តោប្រវេសន៍ ដែលឆ្លងដែនដោយខុសច្បាប់ មកពីប្រទេសមិចស៊ិក។ យោងតាមតួលេខផ្លូវការ នៅខែកក្កដាកន្លងទៅ ចំនួនអ្នកឆ្លងដែនដោយខុសច្បាប់ ចូលដីអាមេរិក បានថយចុះ២១% បើប្រៀបធៀបទៅខែមិថុនា។ ការចុះថយនេះ គឺជាលទ្ធផលនៃការអនុវត្តកិច្ចព្រមព្រៀង រវាងសហរដ្ឋអាមេរិក និងប្រទេសអាមេរិកកណ្តាលមួយចំនួន មានដូចជាមិចស៊ិក ហ្កាតេម៉ាឡា ហុងឌូរ៉ាស និងសាល់វ៉ាដ័រ។
សូមរំលឹកថា លោកដូណាល់ ត្រាំ ធ្លាប់បានលើកឡើងថា សហរដ្ឋអាមេរិក កំពុងតែត្រូវបានពួកអន្តោប្រវេសន៍ខុសច្បាប់ សម្រុកចូលមកទន្ទ្រាន និងដណ្តើមការងារធ្វើ។ លោកបានសន្យថា នឹងបណ្តេញជនអន្តោប្រវេសន៍ខុសច្បាប់រាប់លានអ្នកទាំងនេះ ចេញឲ្យអស់។ ទោះយ៉ាងណា ការលើកឡើងរបស់លោកដូណាល់ ត្រាំ ត្រូវបានមតិមួយចំនួនបដិសេធ ដោយថាអត្រាអ្នកអត់ការងារធ្វើបច្ចុប្បន្ន មានទាបបំផុត ជាងនេះទៀត ការងារដែលជនអន្តោប្រវេសន៍ខុសច្បាប់ធ្វើ គឺសុទ្ធតែជាការងារប្រើកម្លាំងលំបាកបំផុត ហើយដែលប្រជាជនអាមេរិកសាមញ្ញ មិនចង់ធ្វើឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ