NGO៖ប្រទេសកំពុងមានជម្លោះនៅមជ្ឈិមបូព៌ាកំពុងខ្វះថវិកាសម្រាប់ប្រយុទ្ធប្រឆាំងនឹងការប្រែប្រួលអាកាសធាតុ
នៅថ្ងៃព្រហស្បតិ៍ ទី១៨ ឧសភា អង្គការមនុស្សធម៌ពីរ គឺកាកបាទក្រហមអន្តរជាតិ និងកាកបាទក្រហមន័រវែសបានចេញផ្សាយរបាយការណ៍មួយស្តីពីបញ្ហាអាកាសធាតុនៅតំបន់មជ្ឈិមបូព៌ា។ នៅក្នុងរបាយការណ៍ អង្គការមនុស្សធម៌បានបញ្ជាក់ក្នុងន័យទាញសញ្ញាអាសន្នថា បណ្តាប្រទេសដែលប្រឈមខ្លាំងជាងគេនឹងការឡើងកម្តៅលើភពផែនដីជាក្រុមប្រទេសដែលបានធ្លាក់ចុះខ្សោយដោយជម្លោះប្រដាប់អាវុធ។ តាមរបាយការណ៍ដដែល ប្រទេសទាំងនេះទទួលបានលុយតិចតួច ឬមិនទទួលបានសោះសម្រាប់ចំណាយលើការប្រយុទ្ធប្រឆាំងនឹងការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:១៦
របាយការណ៍របស់កាកបាទក្រហមអន្តរជាតិ និងកាកបាទក្រហមន័រវែសបានលើកឡើងប្រទេសចំនួន ៣ នៅមជ្ឈិមបូព៌ា គឺយេម៉ែន ស៊ីរី និងប្រទេសអ៊ីរ៉ាក់។ តាមរបាយការណ៍ ផលវិបាកនៃការប្រែប្រួលអាកាសធាតុ និងការវិនាសហិនហោចបរិស្ថាននៅក្នុងប្រទេសទាំង ៣ នេះកំពុងរួមបញ្ចូលជាមួយនឹងការខ្ទេចខ្ទីរ បំផ្លិចបំផ្លាញដោយជម្លោះប្រដាប់អាវុធ។ ខណៈដែលលទ្ធភាពទទួលបានទឹកស្អាតប្រើប្រាស់កាន់តែលំបាក និងការប្រកបមុខរបរចិញ្ចឹមជីវិតត្រូវបានរំខាន ថវិកាដែលបានបម្រុងទុកដើម្បីជួយប្រទេសទាំងនេះឲ្យយកឈ្នះលើបញ្ហាអាកាសធាតុនៅតែមានតិចតួចស្តួចស្តើង។
តាមអង្គការ Climate Funds Update ដែលជាអ្នកប្រមូលទិន្នន័យពីម្ចាស់ជំនួយអន្តរជាតិចំនួន ២៧ប្រទេស និងអង្គការ ថវិកាចំណាយនៅក្នុងយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុសម្រាប់ប្រទេសអ៊ីរ៉ាក់ ស៊ីរី និងយេម៉ែនរហូតដល់ខែមករា ឆ្នាំ ២០២២ មានតែ ២០លាន ៦សែនដុល្លារប៉ុណ្ណោះ ពោលតិចជាង ០,៥% នៃការចំណាយសរុបនៅក្នុងលោក។ បញ្ហាមួយនេះត្រូវបានអគ្គលេខាធិការកាកបាទក្រហមន័រវែសលោកស្រី Anne Bergh បញ្ចេញប្រតិកម្មសោកស្តាយថា ទីកន្លែងដែលផុយស្រួយជាងគេ និងអស្ថិរភាពជាងគេបែរជាត្រូវបានគេដកចេញពីការមានចំណែកហិរញ្ញវត្ថុសម្រាប់បញ្ហាអាកាសធាតុទៅវិញ។
តាមលោកស្រី Anne Bergh វាច្បាស់ណាស់ដែលគេមិនអាចបន្តធ្វើរបៀបនេះបានទៀតឡើយ។ របាយការណ៍របស់កាកបាទក្រហមអន្តរជាតិ និងកាកបាទក្រហមន័រវែសបានធ្លាក់មក ៦ខែមុនសន្និសីទអន្តរស្តីពីអាកាសធាតុ COP២៨ ដែលគ្រោងរៀបចំក្នុងប្រទេសអេមីរ៉ាតអារ៉ាប់រួមនៅខែវិច្ឆិកា និងខែធ្នូខាងមុខ។ នាឱកាសនោះ ហិរញ្ញប្បទាននៃយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុត្រូវតែជាប្រធានបទមួយមិនអាចខ្វះបាន។ ទន្ទឹមគ្នានេះ COP២៨ ក៏ជាឱកាសមួយដើម្បីលើកយកស្ថានការណ៍នៅក្នុងប្រទេសកំពុងមានជម្លោះទៅនិយាយជាមួយម្ចាស់ជំនួយ ដូចយ៉ាងធនាគារអភិវឌ្ឃ រួមទាំងតួអង្គមនុស្សធម៌ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ