នាយករដ្ឋមន្រ្តីអ៊ីរ៉ាក់ប្រកាសបើកយុទ្ធនាការដាំដើមឈើ ដើម្បីការពារពីខ្យល់ព្យុះខ្សាច់
នៅអ៊ីរ៉ាក់ នាយករដ្ឋមន្រ្តីថ្មីប្រកាសបើកយុទ្ធនាការដាំដើមឈើ ជាពិសេសដើមត្នោត ដើម្បីទប់ស្កាត់កុំឲ្យប្រទេសអ៊ីរ៉ាក់ប្រែក្លាយខ្លួន ទៅជាវាលខ្សាច់។ ចូលរួមនៅក្នុងសន្និសីទស្តីពីអាកាសធាតុ ដែលចាប់ផ្តើម នៅថ្ងៃអាទិត្យ រហូតដល់ថ្ងៃចន្ទនេះ នៅទីក្រុងឆ្នេរសមុទ្រ Basra ប្រមុខរដ្ឋាភិបាលអ៊ីរ៉ាក់នៅបានប្រកាសផែនការដើម្បីជំរុញ ថាមពលស្អាតស្អំ និងទឹកស្អាតនៅក្នុងប្រទេសដែលមានទឹកដីមួយភាគធំគ្របដណ្តប់វាលខ្សាច់។
ចុះផ្សាយនៅថ្ងៃ៖
ជាប្រទេសសំបូរប្រេង អ៊ីរ៉ាក់ក្រខ្សត់ទឹកខ្លាំង កំពុងរងគ្រោះនឹងអាកាសធាតុក្តៅខ្លាំង ភាពរាំងស្ងួតផ្ទួនៗ ព្យុះខ្សាច់ និងការវាតទីរបស់វាលខ្សាច់ រហោឋាន។ នៅក្នុងសន្និសីទអាកាសធាតុ ដែលមានការចូលរួមពីមន្រ្តីអង្គការសហប្រជាជាតិ និងអ្នកតំណាងទូតបរទេស នាយករដ្ឋមន្រ្តីថ្មីរបស់អ៊ីរ៉ាក់ លោក Mahamed Chia Al Soudani សង្ខេបខ្លីពីស្ថានភាពប្រជាជនអ៊ីរ៉ាក់ នៅចំពោះមុខ ការធ្លាក់ថយចុះបរិមាណទឹកភ្លៀង និងការឡើងកំដៅនៅក្នុងតំបន់ដែលពួកគេរស់នៅ។
តាមនាយករដ្ឋមន្រ្តីអ៊ីរ៉ាក់ ប្រជាជនអ៊ីរ៉ាក់ជាង ៧លាននាក់រងប៉ះពាល់ដោយសារការប្រែប្រួលអាកាសធាតុ។ ប្រជាជនជាច្រើនសែននាក់ត្រូវបង្ខំចិត្ត ផ្លាស់ទី កន្លែងរស់នៅ បន្ទាប់ពី គ្រោះរាំងស្ងួតកាត់បន្ថយផលកសិកម្ម និងនេសាទ ដែលជាទីពឹងអាស្រ័យរបស់ពួកគេ។
ខ្វះទឹកភ្លៀង ព្យុះខ្សាច់ និងការធ្លាក់ចុះគម្របព្រៃបៃតង កំពុងគំរាមកំហែងប្រភពស្បៀង សុខភាព បរិស្ថាន និងសន្តិសុខសហគមន៍។
ជាក់ស្តែង នៅឆ្នាំមុន អ៊ីរ៉ាក់រងបោកបក់ដោយព្យុះដីខ្សាច់ជាង១០ ដែលជាហេតុធ្វើឲ្យក្រុងបាដដាត និងតំបន់ជុំវិញ ត្រូវគ្របដណ្តប់ ដោយស្បៃខ្សាច់ និងការបិទសាលារៀន ព្រលានយន្តហោះ ជាបន្ទាន់ ចំណែកប្រជាជនជួបបញ្ហាសុខភាពផ្លូវដង្ហើមធ្ងន់ធ្ងរ។
ដើម្បីដោះស្រាយបញ្ហាចំពោះមុខ នាយករដ្ឋមន្រ្តីថ្មីរបស់អ៊ីរ៉ាក់ដែលទើបចូលកាន់តំណែង កាលពីខែតុលាកន្លងទៅ បានប្រកាសគម្រោងការបៃតង តាមរយៈយុទ្ធនាការដាំដើមឈើ ៥លានដើម ជាពិសេសដើមត្នោត ដើម្បីទប់ស្កាត់ កុំឲ្យក្រុង ដីភូមិ ដីកសិកម្មរបស់ប្រជាជន ស្ងួតហួតហែងក្លាយទៅជាវាលខ្សាច់ ទីរហោឋាន។
ធ្លាប់ល្បីឈ្មោះថា ជាប្រទេសសំបូរដើមត្នោត៣០លាន ដែនដីបៃតងរបស់អ៊ីរ៉ាក់ត្រូវច្រិបបាត់មុខបន្តិចម្តងៗ ដោយជំនួសមកវិញ ដោយបេតុង សំណង់អគារ នៅក្នុងផែនការអភិវឌ្ឍ ពង្រីកក្រុង នៅប៉ុន្មានទសវត្សរ៍ចុងក្រោយនេះ។
ក្រៅពីដាំដើមឈើ ប្រមុខរដ្ឋាភិបាលអ៊ីរ៉ាក់សន្យាជំរុញ វិស័យផលិតថាមពលស្អាតស្អំ និងប្រព័ន្ធធារាសាស្រ្តថ្មីៗ។ តាមនាយករដ្ឋមន្រ្តីអ៊ីរ៉ាក់ អ៊ីរ៉ាក់កំពុងចរចាផងដែរ ដើម្បីរក្សាសិទ្ធិប្រើប្រាស់ទឹកទន្លេTigris និងEuphrates ដែលអ៊ីរ៉ាក់កំពុងជាប់ឈ្លោះដណ្តើមគ្នាជាមួយ តួកគីនិងអ៊ីរ៉ង់។ នៅត្រង់ចំណុចនេះ លោកនាយករដ្ឋមន្រ្តី អ៊ីរ៉ាក់និយាយចោទប្រកាន់ប្រទេសជិតខាងទាំងពីរថា បានសាងសង់ទំនប់វារីអគ្គិសនី ដែលជាដើមហេតុនៃការធ្លាក់ថយចុះ កម្រិតទឹកទន្លេ ក្នុងដែនដីអ៊ីរ៉ាក់។
មួយវិញទៀត លោកនាយករដ្ឋមន្រ្តី Soudani រដ្ឋាភិបាលរបស់លោកកំពុងត្រៀមចុះកិច្ចសន្យាសាងសង់រោងចក្រអគ្គិសនីដើរដោយថាមពលកកើតឡើងវិញ សម្រាប់ផ្គត់ផ្គង់ ១ភាគ៣នៃតម្រូវការអគ្គិសនីក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ