អាមេរិកជួបករណីបាញ់រះសម្លាប់ជាថ្មី នៅក្នុងបន្ទាយទាហាន
មានការបាញ់រះសម្លាប់មនុស្សទៀតហើយ នៅសហរដ្ឋអាមេរិក ! ទាហានម្នាក់ មានបញ្ហាផ្លូវចិត្ត បានបាញ់សម្លាប់មិត្តរួមអាវុធបីនាក់ កាលពីល្ងាចថ្ងៃពុធម្សិលមិញ មុនបាញ់សម្លាប់ខ្លួនឯង នៅក្នុងបន្ទាយ Fort Hood នៃរដ្ឋតិចសាស់។ Fort Hood ជាមូលដ្ឋានទ័ព ដ៏ធំជាងគេនៅអាមេរិក ធ្លាប់ជួបប្រទះហេតុការណ៍បាញ់រះដូចគ្នានេះ កាលពីឆ្នាំ២០០៩ ដែលកាលណោះ បានបង្កឱ្យមានទាហាន១៣នាក់ស្លាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
មានអាយុ៣៤ឆ្នាំ ជាទាហានធ្លាប់ចុះទៅសមរភូមិអ៊ីរ៉ាក់ ចំនួន៤ខែ កាលពីឆ្នាំ២០១១ មានជំងឺផ្លូវចិត្ត និងធ្លាប់បានទទួលការព្យាបាលជំងឺធ្លាក់ទឹកចិត្ត បានបាញ់រះ រយៈពេល ប្រមាណពី១០ ទៅ១៥នាទី ក្នុងអាគារពីរកន្លែងផ្សេងគ្នា។ ដំបូងឡើងទាហានអាមេរិករូបនេះ បានចូលទៅបាញ់នៅក្នុងអាគារការិយាល័យពេទ្យ មុននឹងចូលទៅបើកឡានបណ្តើរបាញ់បណ្តើរ រួចចុះចូលទៅក្នុងអាគារមួយទៀត ប៉ុន្តែនៅពេលប៉ូលិសចូលបង្ក្រាប ខ្មាន់កាំភ្លើងក៏បែរកាណុងមកសម្លាប់ខ្លួនឯង។
មានស្លាប់សរុបបួននាក់ និងរបួស១៦នាក់ ក្នុងនោះបួននាក់ស្ថិតក្នុងស្ថានភាពធ្ងន់ធ្ងរខ្លាំង។ សម្រាប់ពេលនេះ គ្មានសញ្ញាអ្វីបញ្ជាក់ថាជាអំពើភេរវកម្មទេ ប៉ុន្តែមេបញ្ជាការមិនច្រានចោលសម្មតិកម្មនេះទាំងស្រុងដែរ។
លោកប្រធានាធិបតី បារ៉ាក់ អូបាម៉ា បានសម្តែងភាពល្ហិតល្ហៃ នៅពេលឃើញបញ្ហាសន្តិសុខក្នុងបន្ទាយត្រូវចោទឡើងជាថ្មីដូច្នេះ។ លោកបានសន្យាធ្វើសង្កេតស៊ីជម្រៅ។ ចំណែករដ្ឋមន្ត្រីក្រសួងការពារជាតិវិញ យល់ថាពិតជាមានអ្វីដំណើរការមិនស្រួលហើយ បានជាសោកនាដកម្មអាចកើតឡើងបានដូច្នេះ។
សូមបញ្ជាក់ថាមូលដ្ឋានទ័ព Fort Hood ជាមូលដ្ឋានដ៏ធំជាងគេបង្អស់របស់សហរដ្ឋអាមេរិក ! បន្ទាយនេះ មិនអនុញ្ញាតឱ្យទាហានក្នុងបន្ទាយកាន់អាវុធទេ តាំងពីឆ្នាំ២០០៩មក ឆ្នាំដែលមេបញ្ជាការជាគ្រូពេទ្យចិត្តសាស្ត្រ Nidal Hasan បានបាញ់រះ សម្លាប់មនុស្ស១៣នាក់ និងរបួសជាង៣០នាក់។ អាវុធ ដែលខ្មាញ់កាំភ្លើងប្រើសម្រាប់បាញ់យប់មិញនេះ ជាកាំភ្លើងដៃ ពាក់កណ្តាលស្វ័យប្រវត្តិ ទិញផ្ទាល់ខ្លួន លួចកាន់ចូលដោយខុសច្បាប់។
ម្យ៉ាងវិញទៀត មូលដ្ឋានទ័ពនៅតិចសាស់នេះ ជាប្រភពផ្តល់កម្លាំងយោធា និងទាហាន សម្រាប់ចេញធ្វើសង្គ្រាមនៅបរទេស មានជាអាទិ៍សង្គ្រាមនៅវៀតណាម នៅអ៊ីរ៉ាក់ និងនៅអាហ្វហ្កានិស្ថាន។ ទាហានខ្លះ ក្រោយបញ្ចប់បេសកកម្ម វិលត្រលប់មកចូលបន្ទាយវិញ ជាមួយនឹងរបួសផ្លូវចិត្ត ខូចសតិ និងមានជំងឺបាក់ស្បាត ព្រោះតែគ្មានការយកចិត្តទុកគិតគូរត្រឹមត្រូវលើពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ