អាមេរិកថា សេដ្ឋកិច្ចរបស់ខ្លួនទទួលបានកំណើនយ៉ាងល្អ នៅត្រីមាសដំបូងដើមឆ្នាំនេះ
ឆ្នាំ២០១៩នេះ កំណើនសេដ្ឋកិច្ចអាមេរិក បានបន្តដើរទៅមុខយ៉ាងល្អប្រសើរ រង្វង់៣,២ភាគរយ នៅអំលុង៣ខែដំបូង ហើយគឺល្អលើសពីការរំពឹងទុកទៅទៀត។ នេះបើតាមការសន្និដ្ឋានបឋម ដែលមានបានចុះផ្សាយក្នុងរបាយការណ៍របស់ក្រសួងសេដ្ឋកិច្ចអាមេរិក ពីថ្ងៃសុក្រ ទី២៦មេសា។ ប្រធានាធិបតីអាមេរិក លោក ត្រាំ អបអរសាទរ និងថា ពិតជាគួរឲ្យរំភើបភ្ញាក់ផ្អើលណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ជាធម្មតា ក្នុងរដូវរងា ចន្លោះពីខែមករា ដល់ខែមីនា, សេដ្ឋកិច្ចអាមេរិក ខ្សោយជាង ខែធម្មតានារដូវដូវក្តៅ។ ក្នុងពេលអំលុងខែដំបូងៗនៃដើមឆ្នាំដូច្នេះ កំណើនសេដ្ឋកិច្ចអាមេរិក អាចត្រឹមចន្លោះក្រោម៣ភាគរយតែប៉ុណ្ណោះ។ តែពេលនេះ វាបានកើនឡើងដល់ទៅ៣.២ភាគរយទៅហើយ គឺគ្រាន់បើជាងការរំពឹងទុកឆ្ងាយ។ ពីព្រោះថា ពីដំបូងឡើយ គេបានគិតថា អាចកើនឡើងត្រឹមចន្លោះ ជាង២ភាគរយ ឬតិចតួចជាងនេះផង។ នេះបើតាមការលើកឡើងរបស់ប្រធានក្រុមអ្នកជំនាញសេដ្ឋកិច្ច នៅសេតវិមានអាមេរិក លោក Larry Kudlow ។
អ្នកជំនាញដដែល ឲ្យដឹងដែរថា កំណើននៃការវិនិយោគទុនរបស់ក្រុមហ៊ុនសហគ្រាសឯកជន បានកើនឡើង២.៧ភាគ វាតិចជាងត្រីមាសមុនៗក៏ពិតមិនមែន។ ក៏ប៉ុន្តែ វិស័យនេះ បានដើរទៅបានល្អ ក៏ដោយសារតែមានការជួយគាំទ្រ ការជួយឧបត្ថម្ភធន ទៅក្នុងការចំណាយផ្សេងៗ នៅលើវិស័យកម្មសិទ្ធិបញ្ញា។ វិស័យមួយនេះ ជាចំណុចរស៊ើបមួយ ក្នុងការប្រទាញប្រទងនៃជម្លោះសេដ្ឋកិច្ចរវាង ចិន និងអាមេរិក។ បើទោះបីជា ស្ថិតនៅក្នុងបរិបទនៃសង្គ្រាមពាណិជ្ជកម្មក្តី ជញ្ជីងពាណិជ្ជកម្មរបស់អាមេរិក នៅតែមានលំនឹងល្អ។ នេះបើតាមរបាយការណ៍ផ្ទាល់ខ្លួនរបស់អាមេរិក។
ព័ត៌មានពីដំណើនសេដ្ឋកិច្ច គឺជាដំណឹងដ៏គួរឲ្យភ្ជាប់ផ្អើលចំពោះប្រធានាធិបតីអាមេរិក ដែលជាមហាសេដ្ឋកិច្ចស្រាប់។ ដូចតាមទម្លាប់ លោក ដូណាល់ ត្រាំ បានសរសេរសារតាមប្រព័ន្ធសង្គម Twitter ដោយសេចក្តីអំណរ និងអំណួត ថា «កំណើនសេដ្ឋកិច្ចដ៏សម្បើមអស្ចារ្យក្រៃ ហើយតម្លៃអតិផរណាទំនិញ ក៏នៅទាប។ សេដ្ឋកិច្ចរបស់អាមេរិកយើងមានសុខភាពល្អណាស់។»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ