តុលាការកំពូលអាមេរិកផ្តល់សុពលភាពដល់ច្បាប់ធានារ៉ាប់រងសុខភាពរបស់លោកអូបាម៉ា
កាលពីថ្ងៃព្រហស្បតិ៍ម្សិលមិញនេះ តុលាការកំពូលរបស់សហរដ្ឋអាមេរិកបានចេញសេចក្តីសម្រេចផ្តល់សុពលភាពដល់ច្បាប់ ស្តីពីធានារ៉ាប់រងសុខភាព ដែលជាកំណែទម្រង់គន្លឹះរបស់លោកអូបាម៉ា។ សេចក្តីសម្រេច ដែលធ្វើឡើងតែប៉ុន្មានខែ មុនការបោះឆ្នោតប្រធានាធិបតីនេះ គឺជាដំណឹងល្អមួយ សម្រាប់លោកអូបាម៉ា។
ចុះផ្សាយនៅថ្ងៃ៖
ស្តាប់ - ០២:០៣
សេចក្តីសម្រេចរបស់តុលាការកំពូលអាមេរិក កាលពីម្សិលមិញ អាចនឹងជួយឲ្យឈ្មោះរបស់លោកអូបាម៉ាត្រូវកត់ត្រាក្នុងប្រវត្តិសាស្រ្តអាមេរិកថាជាប្រធានាធិបតី ដែលបានធ្វើកំណែទម្រង់ដ៏សំខាន់មួយ ដែលមិនមានប្រធានាធិបតីអាមេរិករូបណាធ្វើបានកន្លងមក គឺការផ្តល់ធានារ៉ាប់រងសុខភាពដល់ពលរដ្ឋអាមេរិកជាទូទៅ។
គួររំឭកឡើងវិញថា ច្បាប់ដែលលោកអូបាម៉ាបានចុះហត្ថលេខាប្រកាសឲ្យប្រើ កាលពីខែមីនា ឆ្នាំ២០១០កន្លងទៅនេះ មានចែងអំពីកាតព្វកិច្ចតម្រូវឲ្យពលរដ្ឋអាមេរិកគ្រប់រូបទិញធានារ៉ាប់រងសុខភាព។ អ្នកដែលមិនបំពេញកាតព្វកិច្ចនេះទេ នឹងត្រូវទទួលការពិន័យ។ រដ្ឋចំនួន ២៦ នាំមុខដោយរដ្ឋ Florida បានប្តឹងទៅតុលាការកំពូលអាមេរិក ដោយចោទថា ច្បាប់ដែលចាប់បង្ខំឲ្យពលរដ្ឋទិញធានារ៉ាប់រងសុខភាពបែបនេះ គឺជាការផ្ទុយនឹងរដ្ឋធម្មនុញ្ញអាមេរិក។
នៅទីបំផុតចៅក្រមតុលាការកំពូលបានចេញសេចក្តីសម្រេច ក្នុងសំឡេង ៥ ទល់នឹង ៤ ថា ច្បាប់របស់លោកអូបាម៉ានេះ មិនផ្ទុយនឹងរដ្ឋធម្មនុញ្ញនោះទេ។
សេចក្តីសម្រេចនេះ គឺជាជោគជ័យមួយ សម្រាប់លោកអូបាម៉ា នៅក្នុងពេលដែលការបោះឆ្នោតប្រធានាធិបតីជិតឈានចូលមកដល់។ ជោគជ័យក្នុងន័យថា លោកអូបាម៉ាមិនត្រូវប្រឈមមុខនឹងភាពអាម៉ាស់ ដោយសារតែកំណែទម្រង់របស់លោកត្រូវតុលាការកំពូលច្រានចោល។ ក៏ប៉ុន្តែ សេចក្តីសម្រេចជាវិជ្ជមានរបស់តុលាការកំពូលម្សិលមិញនេះ ក៏មិនប្រាកដថាអាចបញ្ចប់ភាពចម្រូងចម្រាសជុំវិញច្បាប់ធានារ៉ាប់រងសុខភាពរបស់លោកអូបាម៉ានេះបាននោះដែរ។
កំណែទម្រង់នេះ ថ្វីដ្បិតតែមានអ្នកគាំទ្រច្រើន ក៏ប៉ុន្តែ អ្នកប្រឆាំងក៏មានច្រើនដែរ។ ការដែលតុលាការកំពូលប្រកាសថាច្បាប់នេះមិនផ្ទុយនឹងរដ្ឋធម្មនុញ្ញ ក៏មិនប្រាកដថាអាចទាក់ទាញអ្នកប្រឆាំង ឲ្យបែរមកគាំទ្រច្បាប់នេះវិញបាននោះដែរ។
ផ្ទុយទៅវិញ លោក Mitt Romney បេក្ខជនប្រធានាធិបតីមកពីគណបក្សសាធារណរដ្ឋទំនងជាអាចទាញផលចំណេញ ពីសេចក្តីសម្រេចរបស់តុលាការកំពូល កាលពីម្សិលមិញ។ លោក Mitt Romney បានប្រកាសថា បើសិនជាលោកជាប់ឆ្នោតជាប្រធានាធិបតី លោកនឹងលុបច្បាប់របស់លោកអូបាម៉ាចោលវិញ បើទោះជាមានសេចក្តីសម្រេចរបស់តុលាការកំពូលក៏ដោយ។ ដូច្នេះ សម្រាប់អ្នកដែលប្រឆាំងនឹងប្រព័ន្ធធានារ៉ាប់រងសុខភាពរបស់លោកអូបាម៉ាអាចនឹងយល់ថា ដើម្បីលុបច្បាប់នេះចោលវិញ មធ្យោបាយមានតែមួយគត់ គឺបោះឆ្នោតឲ្យបេក្ខជនគណបក្សសាធារណរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ