សហរដ្ឋអាមេរិកនឹងត្រូវក្ស័យធននៅក្នុងរយៈពេល៣សប្តាហ៍ទៀត?
ការចរចារវាងលោកអូបាម៉ា និងមេដឹកនាំសភាអាមេរិកត្រូវបរាជ័យជាថ្មីម្តងទៀត កាលពីថ្ងៃអាទិត្យ ១០ កក្កដា ២០១១ ជុំវិញបំណុលសាធារណៈអាមេរិក។ យោងតាមមន្រ្តរដ្ឋាភិបាលរបស់លោកអូបាម៉ា ប្រសិនបើសភាអាមេរិកមិនអនុញ្ញាតឲ្យរដ្ឋាភិបាលខ្ចីបំណុលបន្ថែម នៅមុនថ្ងៃទី២ សីហា ២០១១ខាងមុខនេះទេ អាមេរិកនឹងត្រូវក្ស័យធន។ តើរដ្ឋមួយអាចនឹងក្ស័យធនបានដោយរបៀបណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៤៩
នៅសហរដ្ឋអាមេរិក សភាគឺជាអ្នកកំណត់កម្រិតអតិបរមា នៃបំណុលសាធារណៈ (Debt limit/Debt ceiling)។ ប្រសិនបើបំណុលសាធារណៈ នៅទាបជាងដែនកំណត់នេះ រដ្ឋាភិបាលអាចខ្ចីបំណុលគេបាន ដោយមិនចាំបាច់សុំការអនុញ្ញាតពីសភានោះទេ។ ក៏ប៉ុន្តែ សព្វថ្ងៃ បំណុលសាធារណៈរបស់អាមេរិកបានកើនឡើងដល់កម្រិតអតិបរមានេះហើយ។ ដូច្នេះ រដ្ឋាភិបាលរបស់លោកអូបាម៉ាមិនអាចខ្ចីបំណុលគេបន្ថែមទៀតបានទេ លើកលែងតែសភាអនុម័តច្បាប់ថ្មី ដើម្បីដំឡើងកម្រិតបរិមាណបំណុលអតិបរមានេះ។
អស់រយៈពេលជាច្រើនសប្តាហ៍កន្លងទៅហើយ ដែលលោកអូបាម៉ា និងមេដឹកនាំសភាអាមេរិកចរចាគ្នាជុំវិញបញ្ហាបំណុលនេះ។ គណបក្សសាធារណរដ្ឋ ដែលជាគណបក្សប្រឆាំង ហើយដែលមានសំឡេងភាគច្រើននៅរដ្ឋសភា (House of Representatives) បានដាក់លក្ខខណ្ឌថា គេនឹងយល់ព្រមឲ្យរដ្ឋាភិបាលលោកអូបាម៉ាខ្ចីបំណុលគេបន្ថែមទៀត លុះត្រាតែរដ្ឋាភិបាលរៀបផែនការកាត់បន្ថយបំណុលសាធារណៈ។
លោកអូបាម៉ាបានទទួលយកលក្ខខណ្ឌនេះ ក៏ប៉ុន្តែ ភាពចម្រូងចម្រាសគ្នាបានកើតឡើង ជុំវិញការអនុគ្រោះពន្ធ។ តាមសំណើរបស់លោកអូបាម៉ា និងគណបក្សប្រជាធិបតេយ្យ ដើម្បីកាត់បន្ថយបំណុលសាធារណៈ គេចាំបាច់ត្រូវតែកាត់បន្ថយចំណាយសាធារណៈផង និង ក្នុងពេលជាមួយគ្នា លុបចោលការអនុគ្រោះពន្ធលើពួកអ្នកមាន និងលើក្រុមហ៊ុន ដែលអនុម័តកាលពីពេលលោកប៊ូសធ្វើជាប្រធានាធិបតី។ ក៏ប៉ុន្តែ គណបក្សសាធារណរដ្ឋបានប្រឆាំងយ៉ាងដាច់អហង្ការនឹងការលុបចោលការអនុគ្រោះពន្ធនេះ។
បើយោងតាមមន្រ្តីក្រសួងសេដ្ឋកិច្ចអាមេរិក ប្រសិនបើអាមេរិកមិនអាចខ្ចីបំណុលគេបន្ថែមទៀត នៅមុនថ្ងៃទី២ សីហា ២០១១ (ប្រមាណ ៣សប្តាហ៍ទៀត) អាមេរិកនឹងត្រូវធ្លាក់ក្នុងស្ថានភាពក្ស័យធន។
រដ្ឋក៏មិនខុសពីក្រុមហ៊ុនប៉ុន្មានដែរ ប្រសិនបើដល់ពេលសងបំណុលគេ ហើយមិនមានលុយសង រដ្ឋនឹងត្រូវធ្លាក់ក្នុងស្ថានភាពក្ស័យធន។ ករណីនេះគេធ្លាប់បានឃើញជាច្រើនដងរួចមកហើយ កាលពីអតីតកាល ដូចជា ម៉ិចស៊ិក (១៩៨២) និងអាហ្សង់ទីន (២០១១)។ ក៏ប៉ុន្តែ ចំណុចដែលខុសពីការក្ស័យធនរបស់ក្រុមហ៊ុន គឺគេមិនអាចរំលាយរដ្ឋចោល ឬរឹបអូសទ្រព្យសម្បត្តិរដ្ឋមកលក់ឡាយឡុង ដើម្បីយកលុយមកសងម្ចាស់បំណុលនោះទេ។ រហូតមកទល់ពេលបច្ចុប្បន្ននេះ គេមិនដែលឃើញមានរដ្ឋណាមួយត្រូវរលាយខ្លួនបាត់ពីផែនទីពិភពលោកដោយសារតែការក្ស័យធននោះទេ។ ជាទូទៅ នៅពេលក្ស័យធន រដ្ឋតែងតែចរចាជាមួយម្ចាស់បំណុល ដើម្បីកាត់បន្ថយបំណុលមួយផ្នែក ឬពន្យារពេលសងបំណុល។ ដោយសារតែគ្មានអ្នកណាមានអំណាចលើរដ្ឋ ម្ចាស់បំណុលមិនមានជម្រើសអ្វី ក្រៅតែពីចរចានេះទេ។
ក៏ប៉ុន្តែ រដ្ឋដែលបណ្តោយខ្លួនឲ្យធ្លាក់ក្នុងស្ថានភាពក្ស័យធនបែបនេះ ពិបាកនឹងស្តារទំនុកចិត្តពីអ្នកវិនិយោគឡើងវិញខ្លាំងណាស់។ រដ្ឋក៏មិនខុសពីបុគ្គលឯកជនដែរ នៅពេលដែលខ្ចីលុយគេហើយមិនសង ថ្ងៃក្រោយ គ្មានអ្នកណាចង់ឲ្យខ្ចីលុយទៀតទេ។ តើសហរដ្ឋអាមេរិក ដែលជាមហាអំណាចសេដ្ឋកិច្ចពិភពលោក ពិតជាបណ្តោយខ្លួនឲ្យធ្លាក់ក្នុងស្ថានភាពក្ស័យធននេះមែនឬ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ