ក្នុងភាពតានតឹងក្រោយមរណភាពអ្នកកាសែតរុស្ស៊ី បទឈប់បាញ់ភាគខាងកើតអ៊ុយក្រែនអាចសម្រេចចេញក្នុងពេលឆាប់ៗ
ចុះផ្សាយនៅថ្ងៃ៖
ស្តាប់ - ០៥:៥៣
ភាពតានតឹងបានផ្ទុះសារជាថ្មី នៅអ៊ុយក្រែន ក្រោយពេល អ្នកសារព័ត៌មានរុស្ស៊ី២រូប បានស្លាប់ក្នុងការវាយប្រហាររបស់កងទ័ពអ៊ុយក្រែន ប្រឆាំងសកម្មជនគាំទ្ររុស្ស៊ី នៅថ្ងៃអង្គារម្សិលមិញ នៅជិតក្រុងលូហ្កង់ភាគខាងកើត។ អង្គការសហប្រជាជាតិបានថ្កោលទោសការស្លាប់របស់អ្នកសារព័ត៌មានរុស្ស៊ី។ ថ្ងៃពុធនេះ រុស្ស៊ីបានសម្រេចប្តឹងរដ្ឋមន្ត្រីមហាផ្ទៃអ៊ុយក្រែនពីបទបង្កឃាតកម្មអចេតនា ប្រឆាំងជនស៊ីវិល។
ស្របតាមផែនការសន្តិភាពសម្រាប់អាណត្តិដឹកនាំនៅអ៊ុយក្រែន ប្រធានាធិបតីអ៊ុយក្រែន ពេត្រូ ប៉ូរ៉ូឆិនកូ បានប្រកាសថា លោកនឹងបញ្ជាអោយមានបទឈប់បាញ់មួយ នៅភាគខាងកើតអ៊ុយក្រែន ក្នុងពេលឆាប់ៗនេះ ដើម្បីបិទបញ្ចប់អំពើបះបោររបស់សកម្មជនផ្តាច់ទឹកដីនិយម។ ការប្រកាសនេះ ធ្វើឡើងក្រោយពេលលោកប៉ូរ៉ូឆិនកូ បានជួបពិភាក្សាតាមទូរសព្ទ ពីបទ ឈប់បាញ់នៅអ៊ុយក្រែន ជាមួយប្រធានាធិបតីរុស្ស៊ី នៅល្ងាចថ្ងៃអង្គារម្សិលមិញ។
ភាពតានតឹងនៅអ៊ុយក្រែនផ្ទុះជាថ្មីឡើងវិញ ទោះបីមានជំនួបតាមទូរសព្ទរវាងប្រធានាធិបតីពូទីន និងលោកប៉ូរ៉ូឆិនកូ
ជំនួបតាមទូរសព្ទល្ងាចម្សិលមិញ រវាងប្រធានាធិបតីរុស្ស៊ី និងប្រធានាធិបតីអ៊ុយក្រែន ធ្វើឡើងក្រោយការស្លាប់របស់អ្នកសារព័ត៌មានរុស្ស៊ីទាំង២រូប ក៏ពិតមែន តែមិនមែនមានន័យថា រុស្ស៊ីអាចបិទភ្នែកនៅចំពោះមុខការស្លាប់របស់ប្រជាជនខ្លួនក្នុងទឹកដីអ៊ុយក្រែននោះទេ។ ពិសេសអ្នកកាសែតរុស្ស៊ីទាំង២រូបដែលស្លាប់ម្សិលមិញនេះ គឺស្លាប់ក្នុងពេលកំពុងបំពេញការងារទៀតផង។ ពួកគេទាំង២បានស្លាប់ ដោយការបាញ់ប្រហាររបស់កងទ័ពអ៊ុយក្រែន ក្នុងពេលកងទ័ពធ្វើសកម្មភាពប្រឆាំងសកម្មជនផ្តាច់ទឹកដីនិយម នៅភាគខាងកើត ជិតក្រុងលូហ្កង់។ ការស្លាប់របស់អ្នកកាសែត ម្សិលមិញ ធ្វើអោយមានការរំជើបរំជួលក្នុងទឹកដីរុស្ស៊ី។ គ្រប់ទូរទស្សន៍រុស្ស៊ីផ្សាយផ្តោតខ្លឹមសារសំខាន់ តែលើអ្នកកាសែតទាំង២រូបនេះ ហើយសហភាពអ្នកសារព័ត៌មានរុស្ស៊ីបានទាមទារអោយបិទបញ្ចប់អំពើហិង្សាលើអ្នកសារព័ត៌មាន។
រុស្ស៊ីតែងបង្ហាញការខឹងសម្បារ និងបរិហាររដ្ឋអំណាចអ៊ុយក្រែនជាញឹកញយថាធ្វើប្រតិបត្តិការប្រឆាំងភេរវកម្ម សម្លាប់ជនស៊ីវិល ក្នុងតំបន់ជម្លោះភាគខាងកើត។ មានមនុស្សស្លាប់ជាង៣០០នាក់ហើយ គិតពីថ្ងៃ១៣មេសា ថ្ងៃដែលទ័ពអ៊ុយក្រែនបើកប្រតិបត្តិការមក។ ឥឡូវនេះ ជនជាតិរុស្ស៊ីជាអ្នកសារព័ត៌មាន ត្រូវស្លាប់ក្នុងពេលកំពុងបំពេញភារកិច្ចខ្លួនទៀត។
កន្លងមក ក៏មានអ្នកសារព័ត៌មានបរទេសជនជាតិអ៊ីតាលី និងអ្នកជំនួយការជាជនជាតិរុស្ស៊ី ស្លាប់ ក្នុងតំបន់ជម្លោះភាគខាងកើតអ៊ុយក្រែនដែរ។ ហើយអ្នកសារព័ត៌មានអ៊ុយក្រែន និងអ្នកកាសែតបរទេសច្រើនរូប ក៏ធ្លាប់ត្រូវបានអាជ្ញាធរអ៊ុយក្រែន ចាប់ខ្លួនធ្វើបាបផងដែរ។
ដោយសារតែបញ្ហាអស់នេះ ទើបថ្ងៃពុធនេះ រុស្ស៊ីសម្រចប្តឹងរដ្ឋមន្ត្រីមហាផ្ទៃអ៊ុយក្រែន និងអ្នកទទួលខុសត្រូវអ៊ុយក្រែនច្រើនរូប ពីបទបង្កឃាតកម្មដោយអចេតនា លើជនស៊ីវិល នៅភាគខាងកើត។ អង្គការសហប្រជាជាតិបានទាមទារអោយមានការស៊ើបអង្កេតលើការស្លាប់របស់អ្នកកាសែតជនជាតិរុស្ស៊ី។ ប្រធានាធិបតីអ៊ុយក្រែនបានសន្យាថា នឹងស៊ើបអង្កេតលើរឿងរ៉ាវនេះ។
ប្រធានាធិបតីអ៊ុយក្រែន ប៉ូរ៉ូឆិនកូ បង្ហាញបំណងល្អចំពោះរុស្ស៊ី ដោយបានប្រកាសនឹងដាក់អោយមានបទឈប់បាញ់នៅភាគខាងកើតអ៊ុយក្រែនក្នុងពេលឆាប់ៗ
បទឈប់បាញ់នេះ ជាបទឈប់បាញ់ឯកតោភាគី ចែងក្នុងផែនការសន្តិភាពរបស់លោកប៉ូរ៉ូឆិនកូ សម្រាប់អាណត្តិដឹកនាំរបស់លោក។ បទឈប់បាញ់នេះ ត្រូវបានលើកឡើងពេលលោកប៉ូរ៉ូឆិនកូ និយាយតាមទូរសព្ទជាមួយលោកពូទីន ម្សិលមិញនេះ។ ប្រធានាធិបតីអ៊ុយក្រែនបានសន្យាដែរថា នឹងលើកលែងទោសសកម្មជនផ្តាច់ទឹកដីនិយមដែលព្រមដាក់អាវុធចុះ និងអ្នកដែលមិនបង្កបទឧក្រិដ្ឋធ្ងន់ធ្ងរ។ ប្រាកដណាស់ នៅចំពោះមុខហិង្សានៅភាគខាងកើត សម្លាប់មនុស្សរាប់រយនាក់កន្លងមកនេះ បទឈប់បាញ់នេះ អាចជាយុទ្ធសាស្ត្ររបស់អ៊ុយក្រែន ដើម្បីបន្ថយកំហឹងរបស់រុស្ស៊ីផងដែរ។ ពិសេសអ៊ុយក្រែនទើបតែត្រូវរុស្ស៊ីកាត់ផ្តាច់ឧស្ម័ន កាលពីថ្ងៃចន្ទផងនោះ ចង់មិនចង់ រដ្ឋាភិបាលលោកប៉ូរ៉ូឆិនកូ ដែលទើបជាប់ឆ្នោតថ្មីៗនេះ ត្រូវតែបង្ហាញអ្វីដែលជាក់ស្តែងដល់លោកពូទីន ក្រែងលោកពូទីនអាចប្តូរជំហររឿងឧស្ម័នឡើងវិញ។
គួររំលឹកថា ដោយសារមិនអាចសងបំណុលឧស្ម័នរុស្ស៊ី រុស្ស៊ីបានកាត់ផ្តាច់ការផ្គត់ផ្គង់ឧស្ម័នអោយអ៊ុយក្រែន ហើយថែមទាំងបានដាក់ពាក្យប្តឹងអ៊ុយក្រែន ទៅតុលាការអន្តរជាតិទៀតផង។ តែអ៊ុយក្រែនវិញ បានដាក់ពាក្យប្តឹងរុស្ស៊ីដូចគ្នា។ ដូច្នេះ ភាពតានតឹងមិនងាយបញ្ចប់ទេ ព្រោះថា អ៊ុយក្រែនជាកូនបំណុលសោះ អ៊ុយក្រែនជំពាក់រុស្ស៊ីរាប់ពាន់លានដុល្លារ ឯណោះ បែរជាហ៊ានប្តឹងម្ចាស់បំណុលទៅវិញ។ លើសពីនេះទៀត ម្សិលមិញ រដ្ឋមន្ត្រីមហាផ្ទៃអ៊ុយក្រែនបានពន្យុះភាពតានតឹងជាថ្មីទៀត ដោយចោទថា ការផ្ទុះលើបំពង់ឧស្ម័នអន្តរជាតិ នៅតំបន់ប៉ុលតាវ៉ា ភាគខាងជើងអ៊ុយក្រែន គឺជាស្នាដៃរុស្ស៊ី។ ផ្ទុយទៅវិញ ការផ្ទុះនេះមិនបានប៉ះពាល់ដំណើរការផ្គត់ផ្គង់ឧស្ម័នអោយអឺរ៉ុបទេ។
រុស្ស៊ីកាត់ផ្តាច់ការផ្គត់ផ្គង់ឧស្ម័នអោយអ៊ុយក្រែន តែសហភាពអឺរ៉ុបមិនដាក់ទណ្ឌកម្មបន្ថែមលើរុស្ស៊ី
អឺរ៉ុបនិងរុស្ស៊ីប្រទាញប្រទង់គ្នា ទាញយកអ៊ុយក្រែនអោយចូលមកខាងខ្លួន រៀងៗខ្លួនយូរហើយ។ ប៉ុន្តែ ក្នុងដំណោះស្រាយជម្លោះឧស្ម័នរវាងរុស្ស៊ី និងអ៊ុយក្រែន សហភាពអឺរ៉ុបធ្វើជាអាជ្ញាកណ្តាល មិនហ៊ានលំអៀងកាន់ជើងអ៊ុយក្រែនទេ ព្រោះថា អឺរ៉ុបក៏ពឹងផ្អែកលើឧស្ម័នរុស្ស៊ីដែរ។ ក្នុងដំណោះស្រាយវិបត្តិអ៊ុយក្រែន អឺរ៉ុបសង្ឃឹមថា ភាពតានតឹងនឹងកាត់បន្ថយ ក្រោយពេលសហភាពអឺរ៉ុបចុះហត្ថលេខាលើកិច្ចព្រមព្រៀងសហប្រតិបត្តិការយុទ្ធសាស្ត្រជាមួយអ៊ុយក្រែន នៅចុងខែមិថុនាខាងមុខ។ អឺរ៉ុបចង់យកកិច្ចព្រមព្រៀងជាមួយអ៊ុយក្រែននៅពេលខាងមុខនេះ មកធ្វើជាសម្ពាធគាបរុស្ស៊ី ជំរុញអោយរុស្ស៊ីបន្ទន់ជំហរចំពោះបញ្ហាឧស្ម័នឡើងវិញ។
ប៉ុន្តែ ក្រុងម៉ូស្គូមិនបានញញើតនឹងកិច្ចព្រមព្រៀងរវាងអឺរ៉ុបនិងអ៊ុយក្រែននៅពេលខាងមុខនេះទេ។ រុស្ស៊ីនៅតែមានប្រៀបជាងអឺរ៉ុប ព្រោះថា រុស្ស៊ីមានឧស្ម័នក្នុងដៃ។ ពិសេស ពេលនេះ រដ្ឋាភិបាលក្រុងម៉ូស្គូក៏មានអតិថិជនឧស្ម័នថ្មីរបស់ខ្លួនទៀតដែរ នោះគឺមហាអំណាចចិនដ៏មានឥទ្ធិពលនៅអាស៊ីនោះឯង។ ស្របតាមកិច្ចព្រមព្រៀងឧស្ម័នជាមួយរុស្ស៊ី តម្លៃ៤០០ពាន់លានដុល្លារ ចុះហត្ថលេខា កាលពីខែឧសភាកន្លងទៅ ក្នុងនាមជាអតិថិជនរបស់រុស្ស៊ី ចិនបានខំបង្ហាញបំណងល្អចំពោះរុស្ស៊ី ដោយបង់ថ្លៃឧស្ម័នទុកមុនដល់ទៅ២៥ពាន់លានដុល្លារ ខុសពីអ៊ុយក្រែន ដែលមិនចង់សងបំណុលរុស្ស៊ី។ ទឹកប្រាក់ចិននេះក៏សម្រាប់ជួយសាងសង់បំពង់ឧស្ម័នផងដែរ។ ពេលនេះ រុស្ស៊ីកំពុងសម្លឹងទីផ្សារអាស៊ី។ ក្រុងម៉ូស្គូថែមទាំងអួតថា ទើបតែបានចុះហត្ថលេខាលក់ឧស្ម័នធម្មជាតិអោយទៅឥណ្ឌាទៀតផង។ ដូច្នេះ រុស្ស៊ីនៅតែមានប្រៀបលើអឺរ៉ុប ក្នុងសំណុំរឿងអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ